జూబ్లీహిల్స్ ఉప ఎన్నిక‌లో అనూహ్య విజ‌యం ద‌క్కించుకున్న కాంగ్రెస్ పార్టీ అభ్య‌ర్థి న‌వీన్ యాద‌వ్.. ప‌ట్టువ‌ద‌ల‌ని విక్ర‌మార్కుడ‌నే చెప్పాలి. అనేక ప‌రాజ‌యాలు.. అనేక అవ‌మానాలు ఎదురైనా.. ఆయ‌న ప‌ట్టువ‌ద‌లకుండా జూబ్లీహిల్స్‌లో విజ‌యం ద‌క్కించుకున్నారు. వృత్తి రీత్యా ఆర్కిటెక్ట్ అయిన న‌వీన్‌.. తొలుత ఓ కంపెనీలో ఉద్యోగం చేశారు. ఆ త‌ర్వాత‌.. సొంత‌గా రియ‌ల్ ఎస్టేట్ వ్యాపారిగా మారారు. జూబ్లీహిల్స్ స‌హా.. హైద‌రాబాద్ శివారులో అపార్ట్‌మెంట్ల నిర్మాణం, వ్యాపారం చేశారు.

అనంత‌రం.. 2009లోనే న‌వీన్ రాజ‌కీయ రంగంలోకి దిగారు. అప్ప‌టి ప‌బ్బ‌తి రెడ్డి జ‌నార్ద‌న్ రెడ్డికి అనుచ రుడిగా ఆయ‌న రాజ‌కీయాల్లోకి వ‌చ్చారు. ఆ ఎన్నిక‌ల్లో జ‌నార్ద‌న్ రెడ్డి విజ‌యానికి ఆయ‌న కృషి చేశారు. ఆ త‌ర్వాత‌.. 2014లో కాంగ్రెస్ పార్టీ టికెట్ ద‌క్క‌లేదు. దీంతో ఆయ‌న ఎంఐఎం నుంచి టికెట్ తెచ్చుకుని పోటీ చేశారు. కానీ, ఓడిపోయారు(41 వేల ఓట్లు వ‌చ్చాయి). ఆ త‌ర్వాత‌.. 2018లో ఇండిపెండెంటుగా న‌వీన్ యాద‌వ్ పోటీ చేశారు. ఆ స‌మ‌యంలో 19 వేల ఓట్ల‌కు ప‌రిమితం అయ్యారు.

ఆ త‌ర్వాత‌.. 2023 ఎన్నిక‌ల్లో టికెట్ రాలేదు.అయితే.. కాంగ్రెస్ పార్టీకి మాత్రం అనుకూలంగా ప‌నిచేశారు. ముఖ్యంగా పార్టీ సీనియ‌ర్ నాయ‌కుల‌తో అనుబంధం పెంచుకున్నారు. తాజాగా ఉప ఎన్నిక‌లో సీఎం రేవంత్ రెడ్డి ప‌ట్టుబ‌ట్టి నవీన్ యాద‌వ్‌కు అవ‌కాశం ఇప్పించారు. తాజాగా 25 వేల ఓట్ల మెజారిటీతో విజ‌యం ద‌క్కించుకున్నారు. ఇలా అనేక మార్లు ఓట‌మిని చ‌విచూసిన న‌వీన్ యాద‌వ్‌తొలిసారి ప్ర‌జ‌ల మద్ద‌తును కూడ‌గట్టార‌నే చెప్పాలి.

న‌వీన్ యాద‌వ్ యూస‌ఫ్ గూడ‌కు చెందిన వారు. తండ్రి చిన్నశ్రీశైలంయాదవ్ కాంగ్రెస్ పార్టీకి మ‌ద్ద‌తు దారుగా ఉన్నారు. 42 ఏళ్ల న‌వీన్ యాద‌వ్ బీఆర్క్ చేసి.. ఆర్టిటెక్ట్‌గా వృత్తిలో ఉన్నారు. నవ యువ ఫౌండేషన్‌ను స్థాపించి నియోజకవర్గంలో పలు సేవా కార్యక్రమాలు నిర్వహిస్తున్నారు. ఇదే.. ఇప్పుడు ఆయ‌న‌కు విజ‌యాన్ని ద‌క్కించింది. ఆయ‌నకు భార్య‌, కుమారుడు ఉన్నారు.