బీహార్ అసెంబ్లీ ఎన్నికల ఫలితాలు బయటకు వచ్చాక రాష్ట్ర రాజకీయాల్లో ఆసక్తికర చర్చలు మొదలయ్యాయి. ప్రతిపక్ష పార్టీ రాష్ట్రీయ జనతా దళ్ (ఆర్జేడీ) ఈసారి కాంగ్రెస్, వామపక్షాలతో కలిసి మహాఘట్ బంధన్‌గా బరిలోకి దిగినా, ఫలితాలు మాత్రం వారికి తీవ్ర నిరాశ మిగిల్చాయి. అయితే సీట్ల పరంగా నిరాశ చెందిన ఆర్జేడీకి ఓట్ల పరంగా మాత్రం ఊహించని స్థాయిలో ప్రజా మద్దతు లభించడం ఈ ఎన్నికల పెద్ద ట్విస్ట్‌గా నిలిచింది.

ఎన్నికల సంఘం ప్రకటించిన వివరాల ప్రకారం.. ఆర్జేడీ ఓటు షేర్ 23 శాతంగా ఉంది. మ‌రోవైపు బీజేపీకి 20 శాతం ఓట్లు పోలవగా.. సీఎం నితీశ్ కుమార్ సారథ్యంలోని జేడీయూకు 19.25 శాతం ఓట్లు పడ్డాయి. అంటే ఆర్జేడీ రాష్ట్ర వ్యాప్తంగా అత్యధిక ఓట్లను సాధించింది. కానీ ఈ మద్దతు సీట్లు గెలిపించలేదు. మొత్తం మహాఘట్ బంధన్ గెలుచుకున్న సీట్లు 35, అందులో ఆర్జేడీ సొంతం 25 మాత్రమే. ఆర్జేడీ చరిత్రలో ఇంత కనిష్ట సీట్లు రావడం ఇది రెండోసారి.

ఆర్జేడీకి రాష్ట్రవ్యాప్తంగా విస్తృత మద్దతు ఉన్నప్పటికీ, ఈ మద్దతు సీట్లను గెలిపించేలా ఏకాగ్రంగా కేంద్రీకృతం కాలేదు. ఆర్జేడీ ఎక్కువ నియోజకవర్గాల్లో సన్నని తేడాలతో ఓడిపోయింది. ఒక్కో నియోజకవర్గంలో వచ్చిన భారీ ఓట్లు, సీట్లుగా మారకపోయే పరిస్థితి ఏర్పడింది. అదేవిధంగా మహాఘట్ బంధన్‌లో స్థానిక స్థాయిలో జరిగిన సీటు సర్దుబాట్లు కూడా ఆర్జేడీకి నష్టంగా మారాయి.