విజయవాడ రాజకీయాలు చెప్పుకుంటే, వంగవీటి మోహన రంగా పేరు ముందుగా వస్తుంది. కాపు సామాజిక వర్గానికి ఆయన కేవలం నాయకుడే కాదు ఆరాధ్య దైవం. ప్రజల సమస్యలకు అండగా నిలబడటం, ప్రజల మధ్య బలమైన ప్రాతిపదికను ఏర్పరచుకోవడం ఆయన ప్రత్యేకత. రంగా ఇకలేరని దశాబ్దాలు గడిచినా, విజయవాడలో వంగవీటి కుటుంబానికి ఉన్న ప్రభావం ఏమాత్రం తగ్గలేదు. ప్రతి ఎన్నికల్లోనూ వారి పేరుకు ప్రత్యేకమైన బలం, ప్రాధాన్యం ఉంది.

ఇలాంటి కుటుంబం నుంచి మరో వారసురాలు రాజకీయాల్లోకి రావడం సహజంగానే రాష్ట్రవ్యాప్తంగా చర్చనీయాంశమైంది. దివంగత రంగా కుమార్తె వంగవీటి ఆశా కిరణ్ ఆదివారం విజయవాడ రాఘవయ్య పార్క్ వద్ద రంగా విగ్రహానికి నివాళులర్పించి, తన రాజకీయ ప్రవేశాన్ని అధికారికంగా ప్రకటించారు. ``నా జీవితాన్ని పూర్తిగా ప్రజలకే అంకితం చేస్తాను. రాధా రంగా మిత్రా మండలి ఆహ్వానం మేరకు ప్రజల్లోకి వస్తున్నాను. కులం,మతం బేధం లేకుండా సహాయం చేసిన వ్యక్తి రంగా గారు. ఆయ‌న‌ ఆశయ సాధన కోసం కృషి చేస్తాను. ప్రజలకు ఏ కష్టం వచ్చినా అండగా ఉంటాను.`` అని ఆమె వ్యాఖ్యానించారు

అత్యంత నిశ్శబ్దంగా, పబ్లిక్ లైఫ్‌కు దూరంగా గడిపిన ఆశా కిరణ్, ఇప్పుడు సరికొత్త ప్రయాణానికి శ్రీకారం చుట్టడం రాజకీయ పరిశీలకులకు ఆసక్తి కలిగిస్తోంది. అయితే వంగవీటి కుటుంబం నుంచి వస్తున్న ప్రతి అడుగు ఎప్పుడూ ప్రాధాన్యమే. ప్రస్తుతం ఆశా కిరణ్ రాజకీయ ప్రవేశం కూడా ఏపీ రాజకీయాల్లో కొత్త దిశ చూపే అవకాశం ఉందని నిపుణులు భావిస్తున్నారు. మ‌రి వంగవీటి కుటుంబానికి విజయవాడలో ఉన్న బలం దృష్ట్యా ఏ పార్టీ ఆమెను తనవైపు తిప్పుకుంటుందో, లేక ఆమె స్వతంత్రంగా కొత్త మార్గాన్ని ఎంచుకుంటారో చూడాలి.