కేంద్ర ప్ర‌భుత్వం చేప‌ట్టిన ఆప‌రేష‌న్ క‌గార్ కొన‌సాగుతోంది. మావోయిస్టుల‌కువ్య‌తిరేకంగా చేప‌ట్టిన ఈ ఆప‌రేష‌న్ లో ఇప్ప‌టికే 300 మంది మావోయిస్టులు మృతి చెందారు. ఇంత‌కు రెండింత‌ల మంది పోలీసుల ముందు.. ప్ర‌భుత్వాల ముందు లొంగిపోయారు. ఇదిలావుంటే.. తాజాగా అల్లూరి సీతారామ‌రాజు జిల్లాలోని మారేడుమిల్లి అట‌వీ ప్రాంతంలో ఈ రోజు ఉద‌యం జ‌రిగిన ఎదురు కాల్పుల్లో ప‌లువురు మావోయిస్టులు మృతి చెందారు.

వీరిలో మావోయిస్టు అగ్ర‌నేత హిడ్మా అలియాస్ సంతోష్‌ స‌హా ఆయ‌న భార్య రాజీ కూడా ఉన్న‌ట్టు అధికారులు తెలిపారు. వీరితో పాటు మ‌నో న‌లుగురు మావోయిస్టులు కూడా ఈ ఎదురుకాల్పుల్లో మృతి చెందిన‌ట్టు పేర్కొన్నారు. మారేడుమిల్లి అట‌వీ ప్రాంతంలో మావోయిస్టులు భేటీ అయ్యార‌న్న స‌మాచారం అందుకున్న పోలీసులు.. ఈ రోజు ఉద‌యం రంగంలోకి దిగారు. ఈ క్ర‌మంలో పోలీసులు, మావోయిస్టుల‌కు మ‌ధ్య ఎదురు కాల్పులు చోటు చేసుకున్నాయి.

ఇదిలావుంటే.. మావోయిస్టు పార్టీ అగ్ర‌నేత‌గా ఉన్న హిడ్మా 30 ఏళ్ల కింద‌టే ఉద్య‌మంలో చేరారు. గెరిల్లా యుద్ధ‌రీతుల్లో శిక్ష‌ణ పొందిన హిడ్మా.. అనేక దాడుల్లో పాల్గొన్న‌ట్టు పోలీసులు తెలిపారు. ఛ‌త్తీస్‌గ‌ఢ్‌లోని సుక్మా జిల్లాకు చెందిన హిడ్మా.. బ‌స్త‌ర్ ప్రాంతంలో మావోయిస్టు కార్య‌క్ర‌మాల‌ను బ‌లోపేతం చేశారు. పీపుల్ రిబ‌రేష‌న్ ఆర్మీ క‌మాండ‌ర్‌గా, దండ‌కారణ్య స్పెష‌ల్ జోన్ క‌మిటీ స‌భ్యుడిగా కూడా హిడ్మా ప‌నిచేశారు. దంతెవాడ‌, సుమ్మాల్లో జ‌రిగిన 30కి పైగా దాడుల‌కు హిడ్మానే సూత్ర‌ధారి అని   జిల్లా ఎస్పీ కిరణ్‌ చవాన్‌ తెలిపారు.