రాజమండ్రి సెంట్రల్ జైలులో రిమాండ్ ఖైదీగా ఉన్న వైఎస్సార్ కాంగ్రెస్ పార్టీ సీనియర్ నేత, మాజీ మంత్రి అంబటి రాంబాబుకు సంబంధించి ఒక ఆసక్తికర విషయం వెలుగులోకి వచ్చింది. టీడీపీ అధినేత, ముఖ్యమంత్రి నారా చంద్రబాబు నాయుడుపై అనుచిత వ్యాఖ్యలు చేసిన కేసులో ఇటీవ‌ల అంబ‌టి అరెస్ట్ అయిన సంగ‌తి తెలిసిందే. గుంటూరు మొబైల్ కోర్ట్ 14 రోజులు రిమాండ్ విధించ‌డంతో ఆయ‌న్ను రాజమండ్రి సెంట్రల్ జైలు కు తరలించారు. అయితే, గత కొన్ని రోజులుగా అంబ‌టి నిద్రలో శ్వాస సంబంధిత సమస్యతో ఇబ్బంది పడుతున్నట్లు సమాచారం.

వైద్య పరిభాషలో దీనిని `స్లీప్ అప్నియా` అని పిలుస్తారు. ఈ సమస్య ఉన్నవారికి నిద్రిస్తున్న సమయంలో అకస్మాత్తుగా శ్వాస ఆగిపోవడం లేదా చాలా నెమ్మదించడం జరుగుతుంది. దీనివల్ల శరీరంలో ఆక్సిజన్ స్థాయిలు పడిపోయి ప్రాణాపాయం సంభవించే అవకాశం ఉంటుంది. అంబటి రాంబాబు గత కొంతకాలంగా ఈ సమస్యతో బాధపడుతుండటంతో, నిద్రపోయే సమయంలో ఆయనకు నిరంతరం వైద్య పర్యవేక్షణ లేదా ప్రత్యేక పరికరం అవసరమని వైద్యులు తేల్చారు.

అంబటి ఆరోగ్య పరిస్థితిని పరిగణనలోకి తీసుకున్న కోర్టు, ఆయనకు జైలులో అవసరమైన వైద్య సదుపాయాలు కల్పించాలని అధికారులను ఆదేశించింది. ఈ మేరకు జైలు అధికారులు ఆయనకు `సిపిఎపి(Continuous Positive Airway Pressure)` వంటి ప్రత్యేక స్లీప్ అప్నియా పరికరాన్ని సమకూర్చారు. నిద్రకు ఉపక్రమించే ముందు ఈ పరికరాన్ని అమర్చుకోవడం వల్ల, శ్వాస నాళాల్లో గాలి ప్రవాహం అడ్డుపడకుండా ఉంటుంది. తద్వారా ఆక్సిజన్ స్థాయిలు పడిపోకుండా ప్రశాంతంగా నిద్రపోయే వీలుంటుంది. ప్ర‌స్తుతం అంబ‌టి ఆ ప్రత్యేక పరికరం సాయంతోనే నిద్రిస్తున్నారు. 

సాధారణంగా జైలులో ఖైదీలకు ప్రాథమిక వైద్యం అందుబాటులో ఉన్నప్పటికీ, అంబటి రాంబాబు విషయంలో ఇలాంటి ప్రత్యేక పరికరాన్ని అనుమతించడం చర్చనీయాంశమైంది. అయితే నిబంధనల మేరకే అన్ని సౌకర్యాలు కల్పిస్తున్నామని అధికారులు చెబుతున్నారు.