ఆంధ్రప్రదేశ్(Andhra Pradesh) రాజకీయాల్లో స్థానిక సమరం హీటెక్కుతోంది. ఎన్డీయే కూటమిలో దూకుడు పెంచిన జనసేన పార్టీ, రాబోయే ఎన్నికల కోసం వ్యూహాత్మకంగా అడుగులు వేస్తోంది. అధికారిక సీట్ల సర్దుబాటులో భాగంగా తాజాగా తమ తొలి విడత అభ్యర్థుల జాబితాను గుమ్మం ముందుకు తెచ్చింది జనసేన అధిష్టానం. ఈ లిస్ట్ లో ఏకంగా రెండు ప్రముఖ కార్పొరేషన్లతో పాటు పన్నెండు కీలక మున్సిపాలిటీలకు సంబంధించిన అభ్యర్థుల పేర్లను ప్రకటించి రాజకీయ వర్గాల్లో ఒక్కసారిగా చర్చకు తెరలేపింది.

ఈ జాబితాలో హైలైట్ గా నిలిచిన అంశం విజయవాడ(Vijayawada) నగర పాలక సంస్థ మేయర్ బరి. ఇటీవల జనసేన గూటికి చేరిన టీడీపీ నేత వంగవీటి రాధాకృష్ణను విజయవాడ మేయర్ అభ్యర్థిగా అధిష్టానం ఖరారు చేయడం స్థానిక రాజకీయాల్లో హాట్ టాపిక్ గా మారింది. ఆయన ఎంట్రీతో విజయవాడ రాజకీయం పూర్తిగా రసవత్తరంగా మారింది. ఇక మరో కీలకమైన ఏలూరు కార్పొరేషన్ మేయర్ స్థానానికి అప్పల నాయుడును బరిలోకి దించి గెలుపే లక్ష్యంగా పక్కా ప్లాన్ తో ముందుకు వెళ్తోంది జనసేన.

కేవలం కార్పొరేషన్లకే పరిమితం కాకుండా, పలు మున్సిపాలిటీల్లోనూ తమ సత్తా చాటేందుకు బలమైన అభ్యర్థులను రంగంలోకి దించారు. అమలాపురం(Amalapuram) నుంచి నల్లా శ్రీధర్, చిలకలూరిపేట నుంచి తోట రాజరాజేశ్వరి, గొల్లప్రోలు నుంచి కడారి తమ్మయ్య నాయుడు, నర్సాపురం నుంచి కొత్తపల్లి శైలజ, నిడదవోలు నుంచి కల్లం జ్యోతి, పెడన నుంచి మట్టా శివపావని పేర్లు ఖరారయ్యాయి.

అలాగే, పిఠాపురం నుంచి బీరా విజయ్ శేఖర్, పుత్తూరు నుంచి డి. ఏలుమలై, సాలూరు నుంచి గొర్లె విజయకుమారి, సామర్లకోట నుంచి పిట్టా జానకి రామారావు, తెనాలి నుంచి టి. వెంకటరమణారావు, తిరువూరు నుంచి పి. మాధవిలను తమ పార్టీ తరఫున అధికారిక అభ్యర్థులుగా అధిష్టానం ప్రకటించింది. కూటమి బలాన్ని కూడగట్టుకుంటూ, స్థానిక సంస్థల ఎన్నికల్లో ఏమాత్రం తగ్గకూడదనే పట్టుదలతో జనసేన(JanaSena) దూసుకుపోతుండటంతో ఈ తొలి జాబితా ప్రస్తుతం ఏపీ రాజకీయాల్లో హాట్ డిస్కషన్ గా మారింది. ఈ అభ్యర్థుల ప్రకటనతో కూటమి శ్రేణుల్లో జోష్ మరింత పెరిగిందని చెప్పవచ్చు. రాబోయే ఎన్నికల్లో ఈ స్థానాల్లో ఎలాంటి పోరు జరగనుంది? జనసేన వ్యూహాలు ఎంతవరకు ఫలిస్తాయి? వేచి చూడాల్సిందే.