మూడోసారి ప్రధానిగా బాధ్యతలు చేపట్టిన తర్వాత నరేంద్ర మోదీ(Narendra Modi) తొలిసారిగా తెలంగాణ గడ్డపై అడుగుపెట్టబోతున్నారు. మే 10న జరగనున్న ఈ పర్యటన కేవలం రాజకీయ ప్రాధాన్యతతోనే కాకుండా, రాష్ట్ర అభివృద్ధికి సరికొత్త ఊపిరి పోసేలా భారీ నిధులతో కూడిన ప్రాజెక్టుల వరానికి వేదిక కానుంది. కేంద్ర మంత్రి కిషన్ రెడ్డి వెల్లడించిన వివరాల ప్రకారం, ఈ ఒక్క పర్యటనలోనే సుమారు రూ. 7,823 కోట్ల విలువైన అభివృద్ధి పనులకు ప్రధాని శ్రీకారం చుట్టనున్నారు.

ఈ పర్యటనలో ప్రధాన ఆకర్షణ జహీరాబాద్ ఇండస్ట్రియల్ సిటీ. తెలంగాణ(Telangana) పారిశ్రామిక ముఖచిత్రాన్ని మార్చేసే సామర్థ్యం ఉన్న ఈ మెగా ప్రాజెక్టును ప్రధాని మోదీ జాతికి అంకితం చేయనున్నారు. దీనివల్ల వేల సంఖ్యలో ఉద్యోగ అవకాశాలు రావడమే కాకుండా, రాష్ట్రానికి భారీ పెట్టుబడులు వస్తాయని విశ్లేషకులు భావిస్తున్నారు. పారిశ్రామిక రంగంలో తెలంగాణను అగ్రపథంలో నిలపాలనే కేంద్రం సంకల్పం ఈ ప్రాజెక్టుతో స్పష్టమవుతోంది.

మ‌రోవైపు తెలంగాణలో రైల్వే నెట్‌వర్క్‌ను ఆధునీకరించేందుకు కేంద్ర ప్రభుత్వం పెద్దపీట వేస్తోంది. ఇప్పటికే రాష్ట్రంలో దాదాపు రూ. 85 వేల కోట్ల విలువైన రైల్వే ప్రాజెక్టులు శరవేగంగా జరుగుతున్నాయి. ఇందులో భాగంగా హైదరాబాద్(Hyderabad) నుంచి యాదగిరిగుట్ట వరకు ఎంఎంటీఎస్ పనులు ఇప్పటికే ప్రారంభం కావడం భక్తులకు, ప్రయాణికులకు తీపి కబురుగా మారింది. మోదీ పర్యటనలో ఈ ప్రాజెక్టులకు సంబంధించిన మరిన్ని కీలక అప్‌డేట్స్ వచ్చే అవకాశం ఉంది.

అభివృద్ధి పనుల సంగతి పక్కన పెడితే, రాజకీయంగా కూడా ఈ పర్యటన పెను సంచలనానికి వేదిక కానుంది. సికింద్రాబాద్ పరేడ్ గ్రౌండ్స్‌లో నిర్వహించనున్న భారీ బహిరంగ సభకు బీజేపీ(BJP) శ్రేణులు సిద్ధమవుతున్నాయి. దాదాపు 3 లక్షల మందిని తరలించి, తెలంగాణలో తమ బలాన్ని చాటాలని పార్టీ నాయకత్వం భావిస్తోంది. ప్రధాని రాకతో రాష్ట్ర రాజకీయాల్లో కొత్త సమీకరణాలు మొదలయ్యే సూచనలు కనిపిస్తున్నాయి. మొత్తానికి, మే 10వ తేదీన తెలంగాణకు ఒకవైపు అభివృద్ధి కానుకలు, మరోవైపు భారీ బహిరంగ సభతో రాజకీయ సందడి నెలకొనబోతోంది.