విదేశాల్లో స్థిరపడి, ఎన్నో ఆశలతో కష్టపడుతున్న తెలుగు వలసదారులకు ఆంధ్రప్రదేశ్ ప్రభుత్వం ఒక తిరుగులేని భరోసా ఇచ్చింది. ప్రవాసాంధ్రుల సమస్యలను శాశ్వతంగా, వేగంగా పరిష్కరించే దిశగా ప్రతి జిల్లా స్థాయిలో “మైగ్రేషన్ మేనేజ్‌మెంట్ సెంటర్స్(Migration Management Centers)”  ఏర్పాటు చేస్తూ ముఖ్యమంత్రి శ్రీ నారా చంద్రబాబు నాయుడు నేతృత్వంలోని ప్రభుత్వం ఒక చారిత్రాత్మక నిర్ణయం తీసుకుంది. విదేశాల్లో ఉన్న తెలుగు వారికి న్యాయం, భద్రత, సహాయం ఒకే వేదికపై అందించాలనే ప్రభుత్వ సంకల్పానికి ఈ నిర్ణయం అద్దం పడుతోంది.

ఈ వినూత్న వ్యవస్థపై గౌరవ ఎన్‌ఆర్‌ఐ (NRI) శాఖ మంత్రి శ్రీ కొండపల్లి శ్రీనివాస్ హర్షం వ్యక్తం చేశారు. ముఖ్యంగా APNRTS ఆధ్వర్యంలో క్రిమినల్, సివిల్, మ్యాట్రిమోనియల్, ఫ్రాడ్ తదితర సమస్యలకు వేగవంతమైన పరిష్కారం కల్పించే ఈ విధానం విదేశాల్లో ఉన్న తెలుగు ప్రజలకు మరింత ధైర్యాన్ని, నమ్మకాన్ని కలిగిస్తుందని ఆయన పేర్కొన్నారు.

అలాగే ఇకపై వలసదారులు తమ సమస్యల కోసం ఎక్కడికో వెళ్లాల్సిన అవసరం లేదు. ప్రతి జిల్లా కలెక్టరేట్‌లో ప్రత్యేక సెల్స్ ఏర్పాటు కాబోతున్నాయి. ఈ కేంద్రాలు APNRT సొసైటీతో సంపూర్ణ సమన్వయంతో పనిచేస్తూ, విదేశీ వలసదారుల సేవలకు ఒక ప్రత్యేక వ్యవస్థగా నిలుస్తాయి. ఇక్కడ కింది ప్రధాన సమస్యలపై తక్షణ సహాయం అందుతుంది:

చట్టపరమైన సమస్యలు: క్రిమినల్ మరియు సివిల్ కేసులు.

వ్యక్తిగత సమస్యలు: కుటుంబం / వివాహ (మ్యాట్రిమోనియల్) వివాదాలు.

ఉపాధి & మోసాలు: విదేశీ ఉద్యోగ సమస్యలు, ఏజెంట్ల మోసాలు, మరియు కార్మిక వివాదాలు.

సింగిల్ విండో వ్యవస్థ (Single Window System): ఎన్‌ఆర్‌టీల ఫిర్యాదులన్నింటినీ ఒకే వేదికపై పరిష్కరించడానికి ప్రభుత్వం ఈ సింగిల్ విండో విధానాన్ని తీసుకొచ్చింది. దీనివల్ల ప్రవాసాంధ్రులకు వేగవంతమైన సేవలు అందడమే కాకుండా, రాష్ట్రంలో పెట్టుబడులు పెట్టడానికి వారికి ప్రభుత్వంపై మరింత నమ్మకం మరియు ప్రోత్సాహం లభిస్తుంది. ఈ వ్యవస్థ కేవలం కాగితాలకే పరిమితం కాకుండా, క్షేత్రస్థాయిలో పక్కాగా అమలు కావడానికి ప్రభుత్వం ప్రత్యేక అధికారులను నియమిస్తోంది. ప్రతి జిల్లాలోనూ ఈ క్రింది విధంగా అధికారులు బాధ్యతలు స్వీకరిస్తారు:

స్పెషల్ ఆఫీసర్ (NRT Affairs): జిల్లా స్థాయిలో ఒక MRO (తాసిల్దార్) స్థాయి అధికారి దీని పర్యవేక్షణ చూసుకుంటారు.

స్పెషల్ పోలీస్ ఆఫీసర్ (NRT Affairs): పోలీస్ వ్యవస్థను అనుసంధానం చేస్తూ ఒక SI లేదా CI స్థాయి అధికారి బాధ్యతలు నిర్వర్తిస్తారు.

ఈ సమగ్ర మైగ్రేషన్ మేనేజ్‌మెంట్ సిస్టమ్ విజయవంతం కావడానికి APNRT సొసైటీ కీలక పాత్ర పోషించనుంది. ఇది జిల్లా కలెక్టర్లు, పోలీస్ శాఖ, మరియు ఐటీ & సీ (IT & C) శాఖలతో నిరంతరం సమన్వయం చేసుకుంటూ సేవలను పర్యవేక్షిస్తుందని APNRTS అధ్యక్షులు డాక్టర్ రవికుమార్ వేమూరు తెలిపారు. ఇది కేవలం ఒక పరిపాలనా నిర్ణయం మాత్రమే కాదని, విదేశాల్లో కష్టపడుతున్న లక్షలాది తెలుగు కుటుంబాలకు భరోసా కలిగించే మానవతా కార్యక్రమమని ఆయన కొనియాడారు.

గల్ఫ్ కార్మికులకు రక్షణ కవచం!
విదేశాల్లో ఇబ్బందులు ఎదుర్కొంటున్న తెలుగు ప్రజలకు ప్రభుత్వం మీ వెంటే ఉంది అనే గట్టి నమ్మకాన్ని ఈ నిర్ణయం ఇస్తుందని APNRTS డైరెక్టర్ (ఆపరేషన్స్ అండ్ సర్వీసెస్) శ్రీ నాగేంద్ర బాబు అక్కిలి పేర్కొన్నారు. ముఖ్యంగా గల్ఫ్ దేశాలలో చిన్న చిన్న ఉద్యోగాలు చేస్తూ, మోసపోతున్న పేద కార్మికులకు ఈ మైగ్రేషన్ మేనేజ్‌మెంట్ సెంటర్స్ ఒక రక్షణ కవచంలా నిలుస్తాయని ఆయన ఆశాభావం వ్యక్తం చేశారు.

రాష్ట్ర చరిత్రలోనే ఒక గొప్ప మైలురాయిగా నిలిచిపోయే ఈ నిర్ణయాన్ని సాకారం చేసిన ముఖ్యమంత్రి శ్రీ నారా చంద్రబాబు నాయుడు గారికి, మంత్రి శ్రీ కొండపల్లి శ్రీనివాస్ గారికి, ప్రభుత్వ ప్రధాన కార్యదర్శులకు, APNRTS అధ్యక్షులు డాక్టర్ రవికుమార్ వేమూరు గారికి, అలాగే సంస్థ సీఈఓ (CEO) శ్రీ కృష్ణమోహన్ గారికి మరియు అధికారులందరికీ ప్రవాసాంధ్రుల తరఫున హృదయపూర్వక కృతజ్ఞతలు తెలియజేశారు. ఈ చారిత్రాత్మక ముందడుగుతో విదేశాల్లో ఉన్న ప్రతి తెలుగు బిడ్డకు భద్రత, న్యాయం, మరియు సంక్షేమం మరింత వేగంగా చేరబోతున్నాయి.