ఎన్నికల సమయంలో ఇచ్చిన ప్రతి మాటనూ తూచా తప్పకుండా అమలు చేస్తామంటూ అధికారంలోకి వచ్చిన కూటమి ప్రభుత్వం, మరోసారి తన చిత్తశుద్ధిని నిరూపించుకుంది. నిరుద్యోగ యువతకు ఇచ్చిన మాటను నిలబెట్టుకుంటూ విద్యాశాఖ మంత్రి నారా లోకేష్(Nara Lokesh) కీలక అడుగు వేశారు. జాబ్ క్యాలెండర్‌లో ఇచ్చిన షెడ్యూల్ ప్రకారమే తాజాగా ఉపాధ్యాయ ఉద్యోగాల భర్తీకి రంగం సిద్ధం కావడంతో, రాష్ట్రవ్యాప్తంగా ఉన్న అభ్యర్థుల్లో నూతనోత్సాహం వెల్లివిరుస్తోంది. దసరా పండుగ వేళ వెలువడిన ఈ ప్రాథమిక ప్రకటన నిరుద్యోగులకు నిజంగానే అసలైన పండుగ కానుకగా మారింది.

ఈ విడతలో మొత్తం 2,721 ఉపాధ్యాయ పోస్టులను భర్తీ చేయనున్నట్లు పాఠశాల విద్యాశాఖ స్పష్టంచేసింది. ఇందులో ప్రభుత్వ, జెడ్పీ, ఎంపీపీ, మున్సిపల్ పాఠశాలలకు సంబంధించిన స్కూల్ అసిస్టెంట్, సెకండరీ గ్రేడ్ టీచర్ (SGT) పోస్టులతో పాటు, స్పెషల్ ఎడ్యుకేషన్ కేటగిరీలు అలాగే వివిధ గురుకుల సొసైటీల పరిధిలోని ప్రిన్సిపాల్స్, PGT, TGT, PD, PET పోస్టులు కూడా ఉన్నాయి. అన్ని వర్గాల అర్హులైన అభ్యర్థులకు మేలు జరిగేలా ఈ నియామక ప్రక్రియను పారదర్శకంగా చేపట్టనున్నారు. ఎలాంటి న్యాయపరమైన చిక్కులు రాకుండా పకడ్బందీ ప్రణాళికలతో ముందుకు వెళ్లాలని మంత్రి లోకేష్ అధికారులను ముందునుంచే అప్రమత్తం చేయడం విశేషం.

ఇక ప్రిపరేషన్‌లో ఉన్న అభ్యర్థులు ఏమాత్రం ఆలస్యం చేయకుండా తమ వేగాన్ని పెంచాల్సిన సమయం వచ్చేసింది. ఇప్పటికే రాత పరీక్షలకు సంబంధించిన సిలబస్, ఇతర ముఖ్యమైన వివరాలను అధికారిక వెబ్‌సైట్లలో అందుబాటులో ఉంచారు. రాబోయే డిసెంబర్ నెలలోనే కంప్యూటర్ ఆధారిత పరీక్షలను (CBT) నిర్వహించేందుకు అధికార వర్గాలు ఏర్పాట్లు చేస్తున్నాయి. కేవలం ప్రకటనలకే పరిమితం కాకుండా, నిర్దేశిత కాలపరిమితిలోగా నియామకాలను పూర్తి చేసి ఉద్యోగాలు అందిస్తామన్న ప్రభుత్వ భరోసాతో అభ్యర్థులు ఫుల్ జోష్‌లో ప్రిపరేషన్ సాగిస్తున్నారు.