ఏపీ రాజకీయాల్లో ఒక్కసారిగా వేడి రాజుకుంది. రాష్ట్రంలో ఎంతో కాలంగా ఎదురుచూస్తున్న స్థానిక సంస్థల ఎన్నికల(AP Local Body Elections) సమరానికి తెరలేచింది. రాష్ట్ర ఎన్నికల కమిషనర్ అనిల్ చంద్ర పునేఠా బుధవారం మీడియా ముందుకు వచ్చి, స్థానిక పోరుకు సంబంధించిన పూర్తి స్థాయి షెడ్యూల్‌ను అధికారికంగా ప్రకటించారు. ఈ ప్రకటనతో రాష్ట్రవ్యాప్తంగా అధికార, ప్రతిపక్ష పార్టీల్లో ఒక్కసారిగా ఉత్కంఠ నెలకొంది.

మున్సిపల్ పోరు(Municipal Elections)తో మొదలుపెట్టి పంచాయతీల వరకు అన్ని స్థానిక సంస్థలకు ఒకేసారి దిశా నిర్దేశం చేయడంతో పొలిటికల్ హీట్ అమాంతం పెరిగింది. తొలి విడతగా రాష్ట్రవ్యాప్తంగా ఉన్న 100 అర్బన్ లోకల్ బాడీస్‌కు ఎన్నికలు నిర్వహించనున్నారు. ఇందులో భాగంగా 13 మున్సిపల్ కార్పొరేషన్లు, 77 మున్సిపాలిటీలు, మరో 10 నగర పంచాయతీలకు పోలింగ్ జరగనుంది. ఈ నెల 16 నుంచి 18 వరకు నామినేషన్ల ప్రక్రియ ప్రారంభం కానుండగా, 19న నామినేషన్ల పరిశీలన, 21లోపు నామినేషన్ల ఉపసంహరణ గడువును ముగించనున్నారు. అసలు సిసలైన పోరు అక్టోబర్ 28న జరగనుండగా, కేవలం రెండు రోజుల వ్యవధిలోనే అంటే అక్టోబర్ 30న ఫలితాలు వెల్లడై గెలుపోటముల తేలబోతున్నాయి.

కేవలం మున్సిపాలిటీలతోనే ఆగకుండా, గ్రామీణ ప్రాంతాల్లోనూ ఎన్నికల శంఖారావం పూరించారు. నవంబర్ 3న ఎంపీటీసీ(MPTC), జడ్పీటీసీ(ZPTC) ఎన్నికలు జరగనుండగా, నవంబర్ 5నే ఫలితాలు రానున్నాయి. ఇక రాష్ట్రంలోని గ్రామాల్లో రాజకీయ రణాన్ని తలపించే పంచాయతీ ఎన్నికలను మూడు విడతలుగా నిర్వహించనున్నారు. నవంబర్ 26న తొలి దశ, నవంబర్ 29న రెండో దశ, డిసెంబర్ 2న మూడో దశ పంచాయతీ పోలింగ్ జరగనుంది. కాగా, ఎన్నికల షెడ్యూల్ వెలువడిన క్షణం నుంచే రాష్ట్రవ్యాప్తంగా ఎన్నికల కోడ్ కఠినంగా అమల్లోకి వచ్చింది. రాజకీయ పార్టీల నాయకులు, ఆశావహులు తమ వ్యూహాలను పదునుపెట్టే పనిలో పడ్డారు. ఎవరికి వారు గెలుపే లక్ష్యంగా పావులు కదుపుతుండటంతో, రాబోయే కొన్ని రోజులు ఏపీ రాజకీయాలు రసవత్తరంగా మారడం ఖాయంగా కనిపిస్తోంది.