వైఎస్సార్ కాంగ్రెస్ పార్టీ అధికారంలో ఉన్నపుడు ఈనాడు, ఆంధ్రజ్యోతి పత్రికల్లో ఎప్పుడో కానీ ప్రభుత్వ ప్రకటనలు కనిపించేవి కావు. ఇక వైఎస్సార్ కాంగ్రెస్ పార్టీ ప్రకటనలు అయితే మరీ అరుదు. ఈనాడు లార్జెస్ట్ సర్క్యులేటెడ్ డైలీ కాబట్టి కొన్ని ప్రభుత్వ ప్రకటనలు అనివార్యంగా ఇవ్వక తప్పదు కానీ.. పార్టీ ప్రకటనలైతే అందులో కనిపించేవి కావు. జిల్లా ఎడిషన్లలో అయినా కింది స్థాయి నాయకులు రీచ్ కోసం ఈనాడు, ఆంధ్రజ్యోతిల్లో ప్రకటనలు ఇస్తారు కానీ.. రాష్ట్ర స్థాయిలో మాత్రం పార్టీ ప్రకటనలు ఆ రెండు మీడియాల్లో ఉండవు. ఇక సాక్షిలో తెలుగుదేశం పార్టీ ప్రకటనల విషయంలోనూ ఇంతే. ఆ పత్రికలో ప్రభుత్వ ప్రకటనలు ఇవ్వాల్సిన కంపల్షన్ లేదు. ఇక రాష్ట్ర స్థాయిలో తెలుగుదేశం పార్టీకి సంబంధించిన ప్రకటనలైతే ఇన్నేళ్లలో ఒకటీ అరా కూడా వచ్చి ఉండవేమో. ఈ నేపథ్యంలో తాజాగా సాక్షి పత్రికలో ఫుల్ పేజీ టీడీపీ యాడ్ దర్శనమివ్వడం ఏపీ రాజకీయాల్లో చర్చనీయాంశంగా మారింది.