త్వరలో కేంద్ర మంత్రివర్గ పునర్వ్యవస్థీకరణ(Cabinet Reshuffle) జరిగే అవకాశం ఉందన్న వార్తలు రాజకీయ వర్గాల్లో తీవ్ర చర్చనీయాంశంగా మారాయి. రాబోయే ఐదు రాష్ట్రాల అసెంబ్లీ ఎన్నికలతో పాటు, అత్యంత కీలకమైన 2024 లోక్‌సభ ఎన్నికలను దృష్టిలో ఉంచుకుని ఈ మార్పులు చేయనున్నట్లు తెలుస్తోంది. బీజేపీ అధిష్టానం ఈసారి వ్యూహాత్మకంగా అడుగులు వేస్తున్నట్లు సమాచారం.

ఇప్పటికే బీజేపీ(BJP) కొత్త జాతీయ కార్యవర్గంలో 51 మంది కొత్తవారికి అవకాశం కల్పించే యోచనలో ఉన్నట్లు జోరుగా ప్ర‌చారం జ‌రుగుతోంది. అదే విధంగా కేబినెట్ విస్తరణలోనూ యువ రక్తానికి, సరికొత్త ముఖాలకు తగిన ప్రాధాన్యత ఇస్తూ కీలక శాఖలను కేటాయించే ఆలోచనలో పార్టీ హైకమాండ్ ఉన్నట్లు బ‌లంగా వార్త‌లు వినిపిస్తున్నాయి. అయితే కేవలం పార్టీ అంతర్గత సమీకరణలే కాకుండా, ఎన్డీఏ కూటమిని మరింత బలోపేతం చేసే దిశగా బీజేపీ పావులు కదుపుతోంది. 

ఇటీవల కాలంలో ఎన్డీఏ(NDA)లో చేరిన కొత్త మిత్రపక్షాలకు సైతం కేంద్ర మంత్రివర్గంలో చోటు కల్పించే అవకాశాలు స్పష్టంగా కనిపిస్తున్నాయి. దీనివల్ల జాతీయ స్థాయిలో కూటమి ఐక్యతను చాటడంతో పాటు, ప్రాంతీయంగా పార్టీ పట్టును మరింత పెంచుకోవచ్చని కమలనాథులు భావిస్తున్నారు. ఇక ఈ మంత్రివర్గ పునర్వ్యవస్థీకరణలో తెలుగు రాష్ట్రాలకు తగిన ప్రాతినిధ్యం లభించే అవకాశం ఉందన్న ప్రచారం జోరుగా సాగుతోంది. ముఖ్యంగా రెండు తెలుగు రాష్ట్రాల నుంచి కొద్ది మంది సీనియర్, ప్రభావశీల నాయకుల పేర్లు ప్రముఖంగా తెరపైకి వస్తున్నాయి.

తెలంగాణ నుంచి మహిళా కోటాలో జాతీయ స్థాయిలో చురుకైన పాత్ర పోషిస్తున్న ఎంపీ డీకే అరుణకు కేంద్ర కేబినెట్‌లో చోటు దక్కవచ్చన్న టాక్ రాజకీయ వర్గాల్లో గట్టిగా వినిపిస్తోంది. ఒకవేళ ఇది నిజమైతే తెలంగాణ(Telangana) నుంచి మహిళా ప్రాతినిధ్యం మరింత బలపడుతుంది. మ‌రోవైపు ఓబీసీ కోటాలో బలమైన వెనకబడిన వర్గాల నేతగా, పార్టీలో కీలక బాధ్యతలు నిర్వహిస్తున్న డాక్టర్ కె. లక్ష్మణ్ పేరు కూడా ప్రముఖంగా పరిశీలనలో ఉన్నట్లు తెలుస్తోంది. ఓబీసీ సమీకరణలను దృష్టిలో ఉంచుకుని ఆయనకు మంత్రివర్గంలో స్థానం కల్పించే అవకాశాలపై ఊహాగానాలు ఊపందుకుంటున్నాయి. మరి, అధిష్టానం తలపెట్టిన ఈ పునర్వ్యవస్థీకరణలో తెలుగు రాష్ట్రాల నుంచి ఎవరికి అదృష్టం వరించనుంది? కేబినెట్ కూర్పు ఎలాంటి మార్పులకు శ్రీకారం చుట్టబోతోంది? వేచి చూడాల్సిందే.