తెలంగాణ(Telangana) రాజకీయాల్లో మరోసారి అధికార కాంగ్రెస్ పార్టీకి చెందిన నేతల మధ్య అంతర్గత రగడ తెరపైకి వచ్చింది. మహబూబ్ నగర్ జిల్లా జడ్చర్ల ఎమ్మెల్యే అనిరుధ్ రెడ్డి తన సొంత ప్రభుత్వంపైనే చేసిన సంచలన వ్యాఖ్యలు రాష్ట్ర రాజకీయాల్లో తీవ్ర చర్చనీయాంశంగా మారాయి. అభివృద్ధి నిధుల కేటాయింపులో జరుగుతున్న వివక్షపై ఆయన ఏకంగా ముఖ్యమంత్రి రేవంత్‌ రెడ్డి(Revanth Reddy) సర్కార్‌ను నిలదీయడం పార్టీ వర్గాల్లో తీవ్ర కలవరం రేపుతోంది.

రాజాపూర్ మండల పరిధిలోని పలు గ్రామాల్లో పర్యటించిన అనంతరం మీడియాతో మాట్లాడిన అనిరుధ్ రెడ్డి(Anirudh Reddy) ప్రభుత్వ తీరుపై తీవ్ర స్థాయిలో విరుచుకుపడ్డారు. కేవలం మంత్రులు ప్రాతినిధ్యం వహిస్తున్న నియోజకవర్గాలకే బిల్లులు చెల్లిస్తారా అని ఆయన సూటిగా ప్రశ్నించారు. మిగతా ఎమ్మెల్యేలు ప్రజలకు ఏం సమాధానం చెప్పాలని నిలదీశారు. ఈ సందర్భంగా ఆయన చేసిన ఒక వ్యాఖ్య ప్రస్తుతం రాష్ట్రవ్యాప్తంగా హాట్ టాపిక్‌గా మారింది. ఇటీవలి కాలంలో మృతి చెందిన ఒక కాంట్రాక్టర్‌కు రూ. 5 కోట్ల బిల్లు వెంటనే మంజూరు చేశారని గుర్తుచేస్తూ.. అలాగైతే తమ నియోజకవర్గ పనులు పూర్తి కావాలంటే తాము కూడా చనిపోవాల్సిందేనా అంటూ తీవ్ర ఆగ్రహం వ్యక్తం చేశారు.

నియోజకవర్గంలో ఇప్పటికే పూర్తయిన, అలాగే ప్రస్తుతం కొనసాగుతున్న అభివృద్ధి పనులకు సంబంధించిన నిధులను ప్రభుత్వం వెంటనే విడుదల చేయాలని ఆయన డిమాండ్ చేశారు. ఒకవేళ సర్కార్ నుంచి స్పందన రాకపోతే వెనక్కి తగ్గేది లేదని హెచ్చరించారు. తన నియోజకవర్గ ప్రజల సంక్షేమం కోసం, సాగునీటి సాధన కోసం ఏకంగా 30 వేల మందితో కలిసి ఆమరణ నిరాహార దీక్షకు దిగడానికి సైతం సిద్ధంగా ఉన్నానని ఆయన తేల్చిచెప్పారు. రాష్ట్రంలోని ప్రతి నియోజకవర్గం సమాంతరంగా అభివృద్ధి చెందితేనే ప్రభుత్వానికి మనుగడ ఉంటుందని హితవు పలికారు. మొత్తానికి సొంత పార్టీ ప్రభుత్వంలోనే ఒక ఎమ్మెల్యే(MLA) ఇలా బాహాటంగా అసంతృప్తి వెళ్లగక్కడం, ముఖ్యంగా నిధుల కేటాయింపుపై తీవ్ర స్థాయిలో విమర్శలు గుప్పించడం రాజకీయ వర్గాల్లో పెద్ద దుమారమే రేపుతోంది. రాబోయే రోజుల్లో ఈ పరిణామాలు ఎలాంటి రాజకీయ మలుపులు తిప్పుతాయోనన్న ఉత్కంఠ సర్వత్రా నెలకొంది.