ఆంధ్రప్రదేశ్(Andhra Pradesh) రాజకీయాల్లో ఇప్పుడు హాట్ టాపిక్‌గా మారిన మున్సిపల్ కార్పొరేషన్ల మేయర్ పీఠాల లెక్క తేలిపోయింది. రాష్ట్రంలోని మొత్తం 17 మున్సిపల్ కార్పొరేషన్ల మేయర్ పదవులకు సంబంధించి ప్రభుత్వం ఎట్టకేలకు రిజర్వేషన్లను ఖరారు చేసింది. మున్సిపల్ పరిపాలన, పట్టణాభివృద్ధి శాఖ ముఖ్య కార్యదర్శి సురేష్ కుమార్ పేరిట విడుదలైన జీవో నంబర్ 252 ఇప్పుడు రాష్ట్రవ్యాప్తంగా రాజకీయ వర్గాల్లో తీవ్ర చర్చకు దారితీసింది. ఎన్నాళ్లుగానో ఎదురుచూస్తున్న ఆశావహులకు ఈ ఉత్తర్వులు కొందరికి ఆనందాన్ని, మరికొందరికి నిరాశను మిగిల్చాయి.

సామాజిక సమీకరణాల కోణంలో చూస్తే, ఈసారి రిజర్వేషన్ల(Reservations) కేటాయింపులో అన్ని వర్గాలకు చోటు దక్కినట్లు స్పష్టమవుతోంది. షెడ్యూల్డ్ కులాలు (ఎస్సీ), తెగలకు (ఎస్టీ) తగిన ప్రాధాన్యం ఇస్తూనే, వెనుకబడిన తరగతులకు (బీసీ) సర్కార్ పెద్ద పీట వేసింది. ఇందులో భాగంగా ఎస్టీలకు కేవలం ఒక్క స్థానం దక్కగా, ఎస్సీలకు రెండు మేయర్ పదవులు రిజర్వ్ అయ్యాయి. ఇక బలహీన వర్గాల ఓటు బ్యాంక్‌ను దృష్టిలో ఉంచుకుని బీసీలకు ఏకంగా ఐదు మేయర్ స్థానాలను కేటాయించడం విశేషం.

మహిళా సాధికారతకు పట్టం కడుతూ ప్రభుత్వం తీసుకున్న నిర్ణయాలు ఇప్పుడు సర్వత్రా ఆసక్తి రేకెత్తిస్తున్నాయి. కేవలం రిజర్వ్డ్ వర్గాలకే కాకుండా, జనరల్ కేటగిరీలోనూ మహిళల సత్తా చాటేలా ఏకంగా ఐదు మేయర్ పదవులను జనరల్ మహిళలకు కేటాయించారు. ఇందులో విశాఖపట్నం (జీవీఎంసీ) లాంటి ప్రతిష్టాత్మక మహా నగరంతో పాటు గుంటూరు, కడప(Kadapa), విజయనగరం, శ్రీకాకుళం కార్పొరేషన్లు ఉండటం గమనార్హం. దీనివల్ల ఈ నగరాల్లో మేయర్‌గా పగ్గాలు చేపట్టేందుకు మహిళా నాయకురాళ్లకు సువర్ణావకాశం లభించినట్లయింది.

ఇక ప్రాంతాల వారీగా చూస్తే రాజకీయ లెక్కలు పూర్తిగా మారిపోయాయి. ముఖ్యమైన నగరాల్లో మంగళగిరి-తాడేపల్లి పీఠం ఎస్టీ జనరల్ ఖాతాలో పడగా, కర్నూలు ఎస్సీ మహిళకు, రాజమహేంద్రవరం ఎస్సీ జనరల్‌కు కేటాయించారు. బీసీ(BC) మహిళల కోసం కాకినాడ, మచిలీపట్నం రిజర్వ్ కాగా.. ఏలూరు, అనంతపురం, చిత్తూరు స్థానాలు బీసీ జనరల్‌ను వరించాయి. మరోవైపు, ఏ రకమైన ముందస్తు రిజర్వేషన్ల బెడద లేకుండా తిరుపతి, విజయవాడ, ఒంగోలు, నెల్లూరు కార్పొరేషన్ల మేయర్ పదవులను అన్‌రిజర్వ్‌డ్‌గా ప్రకటించారు. ఇక్కడ పోటీ హోరాహోరీగా సాగే అవకాశం ఉంది. కాగా, ఈ రిజర్వేషన్ల జీవో వెలువడటంతోనే అధికార, ప్రతిపక్ష పార్టీల శిబిరాల్లో కదలిక వచ్చింది. నగరాల్లో తమ పార్టీ జెండా ఎగరవేయాలని ప్లాన్ చేస్తున్న నాయకులు, ఇప్పుడీ రిజర్వేషన్లకు తగినట్లుగా తమ అభ్యర్థుల వేటను ప్రారంభించారు. ఏ కార్పొరేషన్ పీఠం ఎవరిని వరిస్తుందో, ఏ పార్టీ వ్యూహాలు ఏ విధంగా ఫలించనున్నాయో వేచి చూడాల్సిందే.