ఎన్నికలంటేనే హోరాహోరీ ప్రచారాలు, రాత్రిపూట విందులు, ఓటర్లను ప్రసన్నం చేసుకునే తంతు, కోట్ల రూపాయల ఖర్చు, చివరకు వర్గపోరుతో గ్రామంలో జరిగే ఘర్షణలు.. ఇవన్నీ కామన్. కానీ, ఏ ఆంధ్రప్రదేశ్(Andhra Pradesh) రాజకీయాల్లోనైనా సర్పంచ్ ఎన్నిక అంటే రసాభాస ఖాయమనే అభిప్రాయం ఉంటుంది. అలాంటిది అనంతపురం జిల్లాలోని ఓ మారుమూల గ్రామం ఇవేం లేకుండానే వినూత్నంగా ఆలోచించింది. ప్రచారాల గొడవలకు, ఎన్నికల ఖర్చులకు స్వస్తి పలికి, కేవలం ఒకే ఒక్క చీటీతో సర్పంచ్ పీఠాన్ని ఎగరేసుకుపోయింది.
అనంతపురం(Anantapur) జిల్లా బెలుగుప్ప మండలం నక్కలపల్లి గ్రామ పంచాయతీ ఎన్నికల వేళ ఇప్పుడు రాష్ట్రవ్యాప్తంగా చర్చనీయాంశంగా మారింది. ఈసారి నక్కలపల్లి సర్పంచ్ స్థానం జనరల్ మహిళకు రిజర్వ్ అయింది. సాధారణంగా అయితే ఇక్కడ టికెట్ దక్కించుకోవడానికి తీవ్ర పోటీ, రాజకీయ నాయకుల పైరవీలు ఉండేవి. కానీ గ్రామస్తుల ఆలోచన వేరు. ఊరిలో రాజకీయ కుమ్ములాటలు, గ్రూపు రాజకీయాలు వద్దనుకున్నారు. ఎన్నికల కోసం లక్షలు ఖర్చు పెట్టే బదులు, ఆ మొత్తాన్ని గ్రామాభివృద్ధికి కేటాయిస్తే ఊరు బాగుపడుతుందని ఒక నిర్ణయానికి వచ్చారు. దీనికోసం గ్రామంలో పెద్దలు ఒక ప్రత్యేక సమావేశం ఏర్పాటు చేశారు. సర్పంచ్ పదవిని ఆశిస్తున్న ఆశావహులందరినీ అక్కడికి పిలిచారు. "గ్రామాభివృద్ధికి మీలో ఎవరు ఎంత మొత్తం విరాళంగా ఇవ్వగలరో ఒక చీటీ మీద రాసి ఈ డబ్బాలో వేయండి" అని కండిషన్ పెట్టారు. సర్పంచ్ పదవిపై ఆశ ఉన్న తొమ్మిది మంది అభ్యర్థులు పోటీపడి మరీ తమకు వీలైనంత పెద్ద మొత్తాలను చీటీలపై రాసి బాక్స్లో డ్రాప్ చేశారు.
అందరి సమక్షంలో గ్రామస్తులు ఆ చీటీలను తెరిచి చూడగా.. పోటీపడిన వారిలో సుదర్శనరెడ్డి తన భార్య పేరుతో గ్రామాభివృద్ధికి ఏకంగా రూ.25.6 లక్షలు ఇస్తానని రాశారు. మిగతా ఎనిమిది మందితో పోలిస్తే ఇదే అత్యధిక మొత్తం కావడంతో, గ్రామస్తులంతా ఏకగ్రీవంగా ఆయన ప్రతిపాదనకు జై కొట్టేశారు. అలా క్షణాల వ్యవధిలో సుదర్శనరెడ్డి సతీమణి నక్కలపల్లి సర్పంచ్(Nakkalapalli Sarpanch)గా ఏకగ్రీవంగా ఎన్నికైనట్లు అధికారికంగా తేలిపోయింది. కాగా, గ్రామస్తులు ఈ ప్రయోగానికి తెరలేపడం ఇదే తొలిసారేం కాదు. గతేడాది జరిగిన ఎన్నికల్లోనూ ఇదే ఫార్ములాను సక్సెస్ఫుల్గా అమలు చేశారు. అప్పట్లో రామిరెడ్డి అనే వ్యక్తి గ్రామాభివృద్ధి నిధికి రూ.21 లక్షలు ఇస్తానని ముందుకురావడంతో ఆయన్ను ఏకగ్రీవంగా ఎన్నుకున్నారు. సరిగ్గా అదే ట్రెండ్ను ఈసారి మరింత పెంచి మరీ కంటిన్యూ చేశారు. గత ఎన్నికలతో పోలిస్తే ఈసారి అదనంగా మరో రూ.4.6 లక్షలు పెంచి మరీ రూ.25.6 లక్షలకు బిడ్ వేశారు సుదర్శనరెడ్డి. మొత్తానికి ఒకవైపు ప్రభుత్వం ఏకగ్రీవ పంచాయతీలకు నజరానాలు ప్రకటిస్తుంటే, మరోవైపు నక్కలపల్లి వాసులు మాత్రం ఎవరికీ భారపడకుండా తమ ఊరి అభివృద్ధికి తామే ఈ సరికొత్త మార్గాన్ని ఎంచుకున్నారు. ఎన్నికల ఖర్చులు, కోర్టు కేసులు, రాజకీయ కక్షలకు వంద మైళ్ల దూరంగా ఉంటూ వీరు అనుసరిస్తున్న ఈ చీటీ పద్ధతి ఇప్పుడు రాజకీయ వర్గాల్లోనూ ఆసక్తికర చర్చకు దారితీసింది.