ప్రఖ్యాత టూరిస్టు ప్రదేశంగా..ఎంజాయ్ అన్నంతనే గుర్తుకు వచ్చే దేశాల్లో ఒకటిగా చెప్పే హాంకాంగ్.. తాజాగా మాత్రం అందుకు భిన్నంగా ఒక భారీ అగ్నిప్రమాదం చోటు చేసుకుంది. అదెంత తీవ్రమైనదంటే.. 2 వేల ఫ్లాట్స్ ఉన్న భవన సముదాయం మొత్తం అగ్నికీలకలు అంటుకున్నట్లుగా ప్రత్యక్ష సాక్ష్యలు చెబుతున్నారు. బుధవారం అర్థరాత్రి సమయానికి ఈ ఘోర ప్రమాదంలో దాదాపు 36 మంది వరకు మరణించినట్లుగా అంచనా వేస్తున్నారు.

ఇంతకూ ఇంతటి అగ్నిప్రమాదం ఎలా సంభవించింది? దీని వెనుకున్న కారణమేంటి? హాంకాంగ్ లాంటి మహానగరంలో ఒక అగ్నిప్రమాదం జరిగితే.. మ్రతుల సంఖ్య ఇంత ఎక్కువగా ఉండటానికి కారణాలేంటి? తక్కువ వ్యవధిలోనే మంటలు అంతలా విస్తరించటానికి దారి తీసిన పరిస్థితులేంటి? తాజా అగ్నిప్రమాదం తీవ్రత ఎంత ఎక్కువ? మంటల్ని ఆర్పేందుకు ఎంత మంది సిబ్బంది ప్రయత్నిస్తున్నారు? భారీగా శ్రమిస్తున్నా.. మంటలు అదుపులోకి రాకపోవటానికి కారణమేంటి? లాంటి ప్రశ్నలకు సమాధానాలు వెతికితే కొత్త అంశాలు వెలుగు చూస్తాయి. 

అవేమిటన్నది చూస్తే.. హాంకాంగ లోని తైపో జిల్లాలో ఒక అపార్ట్ మెంట్ బ్లాక్స్ (వాంగ్ ఫు కోర్ట్)లో భారీ అగ్నిప్రమాదం చోటు చేసుకుంది. దాదాపు 2 వేలకు పైగా ఫ్లాట్లు ఉన్న ఈ హైరేజ్ భవన సముదాయంలో దాదాపు 5 వేల మంది (కచ్ఛితంగా అయితే 4800 మంది) వరకు నివసిస్తూ ఉంటారని చెబుతారు. ఎనిమిది బ్లాకుల్లో 2వేల ఫ్లాట్లు ఉంటాయి. హాంకాంగ్ కాలమానం ప్రకారం బుధవారం మధ్యాహ్నం 2.51 గంటల వేళలో మంటలు చెలరేగాయి. ఈ సమాచారం కాసేపటికి అగ్నిమాపక విభాగానికి సమాచారం అందింది.

దీంతో వారు రంగంలోకి దిగారు. అయితే.. అప్పటికే మంటల తీవ్రత ఎక్కువగా ఉండటంతో అదనపు ఫైరింజన్లను రంగంలోకి దించారు. దాదాపు 700 మంది అగ్నిమాపక సిబ్బంది మంటలు ఆర్పేందుకు తీవ్రంగా శ్రమిస్తున్నారు. ఈ క్రమంలో అగ్నిమాపక సిబ్బందిలో ఒకరు మరణించారు. మంటల్లో చిక్కుకొని 36 మంది మరణించారని తెలుస్తోంది. 279 మంది కనిపించకుండా పోయినట్లుగా అంతర్జాతీయ మీడియా కథనాలు వెల్లడిస్తున్నాయి. ఎంత మంది భవనాల్లో చిక్కుకుపోయారన్న దానిపై స్పష్టత రావట్లేదు.

బుధవారం మధ్యాహ్నం మొదలైన మంటలు.. రాత్రి వేళకు కూడా అదుపులోకి రాలేదని చెబుతున్నారు. 128 ఫైరింజన్లు సహాయక చర్యలు చేపట్టగా.. 57 అంబులెన్సులు ఘటనాస్థలంలో మొహరించారు. తీవ్ర అగ్నిప్రమాదానికి గురైన ఈ భారీ భవన సముదాయం సముద్ర తీరానికి దగ్గరగా ఉంటుంది. ఈ భవన మరమ్మతు పనుల కోసం భవనాల బయట కట్టిన వెదురుబొంగుల కారణంగా మంటలు వేగంగా వ్యాపించినట్లుగా చెబుతున్నారు.

దీనికి తోడు హాంకాంగ్ లోని హౌసింగ్ సొసైటీలు చాలా చిన్నవిగా ఉంటాయి. భవనాల మధ్య దూరం తక్కువ. జనసాంద్రత ఎక్కువగా ఉండటంతో అగ్నిప్రమాదం ప్రభావం తీవ్రంగా ఉంది. దీన్ని లెవల్ ఫైవ్ అగ్ని ప్రమాదంగా ప్రకటించారు. హాంకాంగ్ లో అత్యంత తీవ్ర ప్రమాదాలను లెవల్ 5గా పేర్కొంటారు. మంటల తీవ్రత భారీగా ఉన్న నేపథ్యంలో సమీపంలోని భవనాలను పోలీసులు ఖాళీ చేయించారు. చాలా రోడ్లు మూసేశారు. 30కి పైగా బస్సు రూట్లను మళ్లించారు.

హాంకాంగ్ లోని ఫ్లాట్లు సాధారణంగా 400-500చదరపు అడుగుల పరిమాణంలో ఉంటాయి. ఈ అగ్ని ప్రమాదంపై తైపో జిల్లా కౌన్సిలర్ ముయ్ సియూ ఫంగ్ మాట్లాడుతూ.. మొత్తం 8 భవనాల్లో ఏడు భవనాలపై ప్రభావం ఉంటుందని పేర్కొన్నారు. దాదాపు వెయ్యి మందికి పైగా ప్రజల్ని షెల్టర్లకు తరలించామని.. వీల్ చైర్లు.. వాకింగ్ స్టిక్స్ ఉపయోగించే వారిని తొలి ప్రాధాన్యతగా తాత్కాలిక షెల్టర్లకు తరలించారు. దాదాపు 17 ఏళ్ల తర్వాత హాంకాంగ్ లో ఇంత తీవ్రమైన అగ్నిప్రమాదం ఇప్పుడే చోటు చేసుకున్నట్లు చెబుతుననారు.

2008లో మాంగ్ కాక్ లోని వాణిజ్య జిల్లా కార్న్ వాల్ కోర్ట్ మంటల్లో చిక్కుకుంది. అప్పట్లో నలుగురు మరణించారు. భారీ అగ్నిప్రమాదం చోటు చేసుకున్న ప్రాంతం హాంకాంగ్ కు ఉత్తర భాగంలో ఉంటుంది. ఇక్కడి భవన నిర్మాణ రంగంలో వెదురు బొంగుల వాడకం సర్వసాధారణం. వీటి కారణంగా భద్రతా సమస్యలు ఎదురవుతాయని గతంలోనే ఇక్కడి అధికారులు ప్రభుత్వానికి నివేదించినట్లుగా చెబుతున్నారు. అయితే.. వెదురుబొంగుల వాడకం దశల వారీగా తొలగిస్తామని ఈ ఏడాది ఆరంభంలో ప్రభుత్వం పేర్కొంది. అంతలోనే ఈ ఘోర అగ్ని ప్రమాదం చోటు చేసుకుంది.