ఏపీ రాజ‌ధాని అమ‌రావ‌తి విస్త‌ర‌ణ‌పై రాష్ట్ర మంత్రి వ‌ర్గం కీల‌క నిర్ణ‌యం తీసుకుంది. సీఎం చంద్ర‌బాబు సార‌థ్యంలో శుక్ర‌వారం జ‌రిగిన కేబినెట్ స‌మావేశంలో అమ‌రావ‌తి నిర్మాణానికి సంబంధించిన భూముల స‌మీక‌ర‌ణ‌(రెండో ద‌శ‌)పై కీల‌కంగా చ‌ర్చించింది. వాస్త‌వానికి గ‌త రెండు నెల‌ల కింద‌టే ఈ భూముల‌ను రైతుల నుంచి తీసుకునేందుకు సిద్ధ‌మ‌య్యారు. అయితే.. అప్ప‌ట్లో కొంత వ్య‌తిరేక‌త క‌నిపించింది. దీంతో సేక‌ర‌ణ‌కు సిద్ధ‌మ‌య్యారు. నోటిఫికేష‌న్ కూడా ఇచ్చారు. కానీ, సీఎం చంద్ర‌బాబు జోక్యం చేసుకుని రైతుల‌ను బుజ్జ‌గించితీసుకోవాల‌ని సూచించారు.

 

ఈ క్ర‌మంలో సీఆర్ డీఏ అధికారులు 16,666 ఎక‌రాల భూస‌మీక‌ర‌ణ‌(ల్యాండ్ పూలింగ్‌) ద్వారా తీసుకోవాల‌ని ప్ర‌ణాళిక సిద్ధం చేశారు. దీనికి సంబంధించి తాజాగా కేబినెట్ భేటీలో చ‌ర్చించి నిర్ణ‌యం తీసుకున్నారు. ఈ స‌మీక‌ర‌ణ‌కు మంత్రి వ‌ర్గం ఆమోదం తెలిపింది. ఫ‌లితంగా రెండో ద‌శ అమ‌రావ‌తి రాజ‌ధాని ప‌నులు మ‌రింత వేగంగా ముందుకు సాగుతాయ‌ని కేబినెట్ భావిస్తోంది. ఇక‌, ఈ భూములు.. వైకుంఠపురం, పెదమద్దూరు, వడ్లమాను, హరిశ్చంద్రపురం త‌దిత‌ర గ్రామాల ప‌రిధిలో ఉన్నాయి.

 

త్వ‌ర‌లోనే ఇక్క‌డి రైతుల‌తో గ్రామ స‌భ‌లు పెట్టి.. ఆమోదం పొంద‌డం ద్వారా ఆయా భూముల‌ను స‌మీక‌రించ‌నున్నారు. ఈ భూములు ఇచ్చే రైతుల‌కు కూడా.. తొలిద‌శ‌లో భూములు ఇచ్చిన రైతుల‌కు ఇచ్చే ప‌రిహారం, ఇత‌ర సౌక‌ర్యాల‌ను క‌ల్పించ‌ను న్నారు. దీనికి కూడా కేబినెట్‌లో చ‌ర్చించి నిర్ణ‌యించారు. రైతుల‌కు అన్యాయం జ‌ర‌గ‌కూడ‌ద‌ని.. వారి సంతృప్తి అత్యంత కీల‌క‌మ ని ఈ సంద‌ర్భంగా సీఎం చంద్ర‌బాబు మ‌రోసారి అధికారుల‌కు సూచించారు. ఇక‌, ఈ స‌మావేశంలో 26 కీల‌క అంశాల‌పై చ‌ర్చించిన కేబినెట్.. వాటికికూడా ఆమోద ముద్ర వేసింది.

 

ప్ర‌ధానంగా అప‌రాలు(శ‌న‌గ‌లు, కందులు, మినుములు, పెస‌లు) పండించే రైతుల‌ను ఆదుకునేందుకు మార్క్‌ఫెడ్ ద్వారా 5000 కోట్ల రూపాయ‌ల‌ను రుణంగా తీసుకోవాల‌ని నిర్ణ‌యించారు. త‌ద్వారా గ‌త రెండేళ్లుగా గోదాముల్లో మూలుగుతున్న అప‌రాల‌ను కొనుగోలు చేయాల‌ని భావిస్తున్నారు. ఇక‌, నూర్‌బాషా, దూదేకుల సహకార ఫైనాన్స్‌ కార్పొరేషన్లను వేర్వేరుగా ఏర్పాటు చేయ‌నున్నారు. వాస్త‌వానికి ఇవి గ‌తంలోనూ ఉన్నాయి. అయితే.. కూట‌మి స‌ర్కారు వ‌చ్చాక వీటిని ర‌ద్దు suచేశారు. తిరిగి ఆయా వర్గాల విజ్ఞ‌ప్తి మేర‌కు ప్రారంభించ‌నున్నారు.

 

ఇక‌, విద్యుత్ శాఖ‌కు సంబంధించి కూడా కీల‌క నిర్ణ‌యం తీసుకున్నారు. రాష్ట్ర విద్యుత్ శాఖ త‌న అవ‌స‌రాల కోసం ప్ర‌జ‌ల‌పై భారాలు మోపుతున్న క్ర‌మంలో ఇక నుంచి భారాలు త‌గ్గించుకోవ‌డంతోపాటు.. ప్ర‌జ‌ల‌కు ఇబ్బంది క‌ల‌గ‌కుండా.. నాబార్డ్ నుంచి అప్పులు ఇప్పించాల‌ని నిర్ణ‌యించారు. వీటిని వ‌చ్చే 10 సంవ‌త్స‌రాల్లో తీర్చేలా ప్లాన్ చేశారు. అలాగే.. పెట్టుబ‌డి దారులకు ఇచ్చే ప్రోత్సాహ‌కాల‌ను మ‌రింత పెంచ‌నున్నారు. అదేవిధంగా భూముల కేటాయింపుల‌పైనా నిర్ణ‌యం తీసుకున్నారు.