పవిత్రమైన అయ్యప్ప స్వామి దీక్ష అనగానే భక్తుల పాఠంలో మొదటి మాట శుద్ధి, నిబద్ధత, నియమం. 41 రోజుల పాటు కఠోర ఆచరణలతో చేసే శబరిమల యాత్ర భక్తి మార్గంలో అత్యంత పవిత్రమైనదిగా భావిస్తారు. అయితే ఈ పవిత్రత మధ్యలో రాజకీయ రంగుల చొరబాటు భక్తుల్లో అసహనంతో పాటు ఆగ్రహాన్ని రగిలిస్తోంది. తాజాగా విశాఖ జిల్లా పెందుర్తి ప్రాంతానికి చెందిన కొంతమంది వైసీపీ నేతలు, కార్యకర్తలు అయ్యప్ప మాలలు ధరించి శబరిమలకు బయలుదేరిన సందర్భంలో చేసిన రాజకీయ హడావుడి ఇప్పుడు పెద్ద వివాదంగా మారింది. 

యాత్ర ప్రారంభ వేళ వారు పెద్ద పెద్ద ఫ్లెక్సీలను ప్రదర్శించారు. అవి సాధారణ ఫ్లెక్సీలు కాదు.. వాటిపై జగన్, మాజీ మంత్రి గుడివాడ అమర్నాథ్, ఇతర స్థానిక నేతల ఫొటోలు, అలాగే భారీ అక్షరాల్లో ‘జగన్ 2.0’ అనే పదాలు కనిపించాయి. ఈ ఫ్లెక్సీలను ప్ర‌ద‌ర్శిస్తూ ‘జై జగన్’ అంటూ చేసిన నినాదాలు వీడియోల్లో రికార్డ్ కావడంతో సోషల్ మీడియాలో వేగంగా వైరల్ అవుతున్నాయి. కొన్ని రోజుల క్రితం అనకాపల్లి జిల్లాలోని పాయకరావుపేట నుంచి వెళ్లిన వైసీపీ అయ్యప్ప భక్తులు కూడా ఇదే తరహా ప్రదర్శన చేసి విమర్శలకు గురయ్యారు. 

ఆ వివాదం చల్లబడక ముందే పెందుర్తిలో మళ్లీ ఇటువంటి చర్య పునరావృతం కావడం భక్తుల్లో తీవ్ర అసహనాన్ని రేకెత్తించింది. పవిత్ర శబరిమల యాత్రను రాజకీయ ప్రచార వేదికగా మార్చడంపై హిందూ సంఘాలు, అయ్యప్ప భక్తులు గట్టిగా స్పందిస్తున్నారు. ఇది భక్తి యాత్రా? ప్రచార యాత్రా? అంటూ వైసీపీ నేత‌ల‌పై ఫైర్ అవుతున్నారు. అయ్యప్ప స్వామి దీక్ష అనేది పార్టీ, రాజకీయాలకు అతీతమని, మణికంఠుడి యాత్ర మానసిక శుద్ధితో ఉండాలని వారు స్పష్టంగా చెబుతున్నారు. రాజకీయ ప్రచారాన్ని మత యాత్రల్లో కలపడం సంప్రదాయానికి మచ్చలాంటిదిగా అభివర్ణిస్తున్నారు. పవిత్రతను కాపాడే యాత్రలో ఇలాంటి చర్యలను అరికట్టాలని, భవిష్యత్తులో కఠినమైన నిబంధనలు పెట్టాలని సోషల్ మీడియాలో అనేక మంది భక్తులు డిమాండ్ చేస్తుండ‌డం గ‌మ‌నార్హం.