నందమూరి బాలకృష్ణ కెరీర్లో ‘అఖండ’ను చాలా ప్రత్యేకంగా చెప్పుకోవాలి. ‘యన్.టి.ఆర్’, రూలర్ చిత్రాలతో కెరీర్లో పెద్ద డౌన్ ఫాల్ చూసిన బాలయ్య.. ‘అఖండ’తో మామూలుగా బౌన్స్ బ్యాక్ అవ్వలేదు. ‘సింహా’, ‘లెజెండ్’ చిత్రాలతో బాలయ్యకు గతంలో బ్రేక్ ఇచ్చినట్లే ఈ మూవీతోనూ నందమూరి హీరోకు అత్యావశ్యకమైన విజయాన్నందించాడు బోయపాటి శ్రీను. ఆ సమయానికి బాలయ్య కెరీర్లో ‘అఖండ’ అతి పెద్ద హిట్‌గా నిలిచింది.

 

ఈ చిత్రం ఓటీటీలోకి వచ్చాక వేరే భాషల వాళ్లను సైతం ఆకట్టుకుంది. తమిళ స్టార్ హీరోల్లో ఒకడైన ధనుష్ సైతం ఈ సినిమా చూసి ఫిదా అయిపోయాడట. ‘అఖండ’ సినిమా రిలీజైన తొలి రోజుల్లోనే ధనుష్ థియేటర్‌కు వెళ్లి మరీ ఈ సినిమా చూశాడట. ఆ సినిమా గురించి మలయాళ హీరోయిన్ సంయుక్త దగ్గర చాలా గొప్పగా చెప్పాడట. ధనుష్, సంయుక్త కలిసి ‘సార్’ సినిమాలో నటించిన సంగతి తెలిసిందే. ఆ సినిమా చిత్రీకరణ సమయంలో ‘అఖండ’ గురించి తన దగ్గర ధనుష్ ఎంతగా ఎగ్జైట్ అయ్యాడో.. ‘అఖండ-2’ ప్రి రిలీజ్ ఈవెంట్లో సంయుక్త గుర్తు చేసుకుంది.

 

‘‘సార్ షూటింగ్ జరుగుతున్నపుడే ‘అఖండ’ సినిమా రిలీజైంది. రెండో రోజే ధనుష్ సార్ ఆ సినిమా చూశారు. చూసి వచ్చాక ఆయన ఎగ్జైట్మెంట్ మామూలుగా లేదు. అఘోరా పాత్రలో బాలయ్య పెర్ఫామెన్స్ చూసి ఆయన ఆశ్చర్యపోయారు. దాని గురించి.. అలాగే తమన్ మ్యూజిక్ గురించి నా దగ్గర చాలా గొప్పగా మాట్లాడారు. తర్వాత నేను కూడా అఖండ సినిమా చూశాను. నాకూ ఎంతో నచ్చింది. అలాంటిది నేను ‘అఖండ-2’లో భాగం అవుతానని అస్సలు ఊహించలేదు. ఇలాంటి సినిమాలో నటించినందుకు చాలా గొప్పగా అనిపిస్తోంది’’ అని సంయుక్త చెప్పింది. ‘అఖండ’లో మాదిరే ‘అఖండ-2’లోనూ బాలయ్య ద్విపాత్రాభినయం చేస్తుండగా.. యంగ్ బాలయ్యకు సంయుక్త జోడీగా నటించింది.