సిద్ధంగా భోగాపురం ఎయిర్‌పోర్ట్‌.. తొలి ఫ్లైట్ టేకాఫ్ అయ్యేది అప్పుడే!

admin
Published by Admin — November 30, 2025 in Politics, Andhra
News Image

ఉత్తరాంధ్ర ప్రజలు దశాబ్దాలుగా ఎదురుచూస్తున్న భోగాపురం అంతర్జాతీయ విమానాశ్రయం ఇప్పుడు పూర్తిస్థాయి రూపం దాల్చుతోంది. నిర్మాణ పనులు శరవేగంగా సాగుతున్న ఈ ప్రాజెక్ట్‌ ప్రస్తుతం ఫినిషింగ్ టచ్‌ దశలో ఉంది. మొత్తం పనుల్లో 92 శాతం ఇప్పటికే పూర్తవ్వగా, అత్యంత కీలకమైన రన్‌వే నిర్మాణం దాదాపు కంప్లీట్ అయిపోయింది. ఈ వేగం చూస్తుంటే, భోగాపురం ఆకాశంలో తొలి విమానం ఎగరడానికి ఎక్కువ సమయం లేద‌ని స్ప‌ష్టం అవుతోంది.

విభజన హామీల్లో భాగంగా ఏర్పడిన ఈ ప్రాజెక్ట్‌ను 2019లో అప్పటి ముఖ్యమంత్రి చంద్రబాబు నాయుడు శంకుస్థాపన చేశారు. కానీ తర్వాతి ప్రభుత్వం కాలంలో పనులు నత్తనడకన సాగడంతో విమానాశ్రయం నిర్మాణం నిలకడకు వచ్చింది. 2024లో కూటమి ప్రభుత్వం అధికారంలోకి రావ‌డం, కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు బాధ్యతలు చేపట్ట‌డంతో ప్రాజెక్టు పనులు కొత్త ఊపుతో ముందుకు దూసుకెళ్తున్నాయి. ఆయన ప్రతి 15 రోజులకు ఒకసారి స్వయంగా సైట్‌ను సందర్శించి పరిశీలనలు చేస్తుండటంతో, గడువులు పాటించేలా అధికారులు, ఇంజనీరింగ్ టీమ్‌పై ఒత్తిడి పెరిగింది.

ఫలితంగా, డిసెంబర్ చివరి వారం లేదా జనవరి మొదటి వారంలో టెస్ట్ ఫ్లైట్ నిర్వహించేలా ఏర్పాట్లు జరుగుతున్నాయి. అంటే… ఉత్తరాంధ్ర ఆకాశాన్ని విమానం చీల్చే ఆ క్షణం దాదాపు దగ్గర్లోనే ఉంది. దేశంలోనే అత్యంత పొడవైన రన్‌వేలలో ఒకటిగా నిలవబోయే 3.8 కిలోమీటర్ల రన్‌వేకు 99 శాతం పనులు పూర్తయ్యాయి. టెర్మినల్ భవనం 90 శాతం పూర్తవగా, ఏటీసీ టవర్‌ కూడా 72 శాతం వరకు రూపం దాల్చింది. మత్స్యాకార ఆకృతిలో డిజైన్ చేస్తున్న ఈ విమానాశ్రయంలో ఉత్తరాంధ్ర సంస్కృతి ప్రతిబింబించేలా ఇంటీరియర్‌ను తీర్చిదిద్దుతున్నారని అధికారులు చెబుతున్నారు.

విమానాశ్రయం ప్రారంభమైతే విశాఖపట్నం నుంచి భోగాపురం వరకు మెట్రో మార్గం, పోర్టులు కలిపే ప్రత్యేక రహదారులు, రీజినల్ కనెక్టివిటీ వంటి ప్రాజెక్టులు కూడా పురోగతి సాధించే అవకాశం ఉంది. పర్యాటక, పారిశ్రామిక రంగాలు విస్తరించి, ఉత్తరాంధ్రలో ఆర్థిక కార్యకలాపాలు వేగంగా పెరగనున్నాయి. కాగా, ఈ ఎయిర్‌పోర్ట్‌కు స్వాతంత్ర్య సమరయోధుడు అల్లూరి సీతారామరాజు పేరు ఖరారు చేయడంతో ఉత్తరాంధ్ర ప్ర‌జ‌లు హర్షం వ్య‌క్తం చేస్తున్నారు. 

Tags
Bhogapuram International Airport Test Flight Bhogapuram Ap News Bhogapuram Airport Rammohan Naidu
Recent Comments
Leave a Comment

Related News

Latest News