తెలంగాణ రాజకీయ ముఖచిత్రంపై మరోసారి హైదరాబాద్ సెంటిమెంట్ రాజుకుంది. జనసేన అధినేత, ఏపీ డిప్యూటీ సీఎం పవన్ కల్యాణ్ హైదరాబాద్ వేదికగా నిర్వహించాలనుకున్న సభకు అనుమతి నిరాకరణ వ్యవహారం ఇరు రాష్ట్రాల్లో హాట్ టాపిక్‌గా మారిన సంగ‌తి తెలిసిందే. అయితే, ఈ వివాదంపై తెలంగాణ ముఖ్యమంత్రి రేవంత్ రెడ్డి స్పందించిన తీరు ఇప్పుడు రాజకీయ వర్గాల్లో చ‌ర్చ‌కు దారితీసింది. పవన్ కల్యాణ్ లేవనెత్తిన ప్రశ్నలను రేవంత్ రెడ్డి పూర్తిగా తనదైన శైలిలో తిప్పికొట్టారు.

 

పవన్ కల్యాణ్ ఆరోపణలను సీరియస్‌గా తీసుకుని దానికి రాజకీయ రంగు పులమకుండా, చాలా సింపుల్‌గా లైట్ తీసుకున్నారు. సభకు పర్మిషన్ ఇవ్వకపోవడం వెనుక ఎలాంటి రాజకీయ కక్షసాధింపులు లేవని స్పష్టం చేస్తూనే.. శాంతిభద్రతల అంశాన్ని తెరపైకి తెచ్చారు. జూన్ 2 తెలంగాణ ఆవిర్భావ దినోత్సవం వేళ నగరంలో ట్రాఫిక్ సమస్యలు, ఇంటెలిజెన్స్ నివేదికల ఆధారంగానే పోలీసులు ఈ నిర్ణయం తీసుకున్నారని రేవంత్ వివరించారు. దీని ద్వారా ప్రభుత్వం కావాలని చేయడం లేదని, అంతా పోలీస్ మాన్యువల్ ప్రకారమే జరుగుతోందనే సందేశాన్ని ప్రజల్లోకి బలంగా పంపగలిగారు.

 

కేవలం తెలంగాణలోనే విపక్షాల సభలకు అడ్డంకులు సృష్టిస్తున్నారన్న జనసేన శ్రేణుల విమర్శలకు రేవంత్ రెడ్డి ఏపీ రాజకీయాన్నే ఉదాహరణగా చూపిస్తూ మైండ్ గేమ్ ఆడారు. గతంలో ఆంధ్రప్రదేశ్‌లో వైఎస్ జగన్ మోహన్ రెడ్డి నిర్వహించిన కొన్ని కార్యక్రమాలకు కూడా అక్కడి సెక్యూరిటీ విభాగాలు అనుమతులు నిరాకరించిన ఉదంతాలను ఆయన గుర్తు చేశారు. శాంతిభద్రతలను కాపాడటంలో పోలీసులు తీసుకునే అంతర్గత నిర్ణయాలకు ప్రాంతీయ విద్వేషాలను ఆపాదించడం సరికాదని హితవు పలికారు. ఈ ఒక్క ఉదాహరణతో జనసేన విమర్శల్లోని తీవ్రతను రేవంత్ రెడ్డి చాలా చాకచక్యంగా తగ్గించేశారు.

 

ఇక ఈ వివాదంలో రేవంత్ రెడ్డి వేసిన అసలైన మాస్టర్ స్ట్రోక్ ఏంటంటే.. తన క్యాబినెట్ మంత్రి పొన్నం ప్రభాకర్‌కు ఇచ్చిన పూర్తి మద్దతు. పవన్ కల్యాణ్ వ్యాఖ్యలపై పొన్నం చేసిన ఘాటు కౌంటర్లను సీఎం వంద శాతం సమర్థించారు. తెలంగాణ ఉద్యమంతో అసలు ఎలాంటి సంబంధం లేని వ్యక్తులు వచ్చి ఇక్కడి రాజకీయ స్థిరత్వాన్ని ప్రశ్నిస్తే.. స్థానిక నేతలుగా ఆగ్రహం రావడం, స్పందించడం అత్యంత సహజమని రేవంత్ రెడ్డి తేల్చిచెప్పారు. మొత్తానికి హైదరాబాద్ అందరిదేనని, పవన్ కల్యాణ్ ఎప్పుడైనా ఇక్కడికి రావచ్చు, పోటీ కూడా చేసుకోవచ్చని చెబుతూనే.. స్థానిక సెంటిమెంట్‌ను దెబ్బతీసేలా మాట్లాడితే మాత్రం ఊరుకునేది లేదనే బలమైన పరోక్ష హెచ్చరికను రేవంత్ రెడ్డి పంపారు.