టాలీవుడ్‌లో మరో సంచలన కాంబినేషన్‌కు తెరలేచింది. నందమూరి, దగ్గుబాటి వంశాల నుంచి ఇద్దరు స్టార్ హీరోలు ఒకే స్క్రీన్‌ను పంచుకోబోతున్నారు. విక్టరీ వెంకటేష్(Venkatesh), నందమూరి కల్యాణ్ రామ్ హీరోలుగా సక్సెస్‌ఫుల్ డైరెక్టర్ అనిల్ రావిపూడి దర్శకత్వంలో తెరకెక్కనున్న భారీ మల్టీస్టారర్ చిత్రం ఈరోజు హైదరాబాద్‌లో అట్టహాసంగా ప్రారంభమైంది. సినీ ప్రముఖుల సమక్షంలో జరిగిన ఈ పూజా కార్యక్రమానికి సంబంధించిన వీడియోలు, విజువల్స్ ప్రస్తుతం సోషల్ మీడియాలో విపరీతంగా వైరల్ అవుతున్నాయి.

దర్శకేంద్రుడు కె. రాఘవేంద్రరావు, లెజెండరీ నిర్మాత అల్లు అరవింద్ ఈ ఈవెంట్‌కు ముఖ్య అతిథులుగా హాజరై చిత్ర యూనిట్‌కు బెస్ట్ విషెస్ అందించారు. హీరోలు వెంకటేష్, కల్యాణ్ రామ్(Kalyan Ram) ఎంతో స్టైలిష్‌గా, చిరునవ్వులతో కెమెరాలకు చిక్కిన విజువల్స్ అభిమానులను విపరీతంగా ఆకట్టుకుంటున్నాయి. ఇద్దరు విభిన్న ఇమేజ్ ఉన్న హీరోలను అనిల్ రావిపూడి ఒకే ఫ్రేమ్‌లో ఎలా చూపించబోతున్నారనే క్యూరియాసిటీ ఈ వీడియో చూసిన ప్రతి ఒక్కరిలోనూ కలుగుతోంది.

ఈ క్రేజీ ప్రాజెక్ట్‌లో హీరోయిన్ల ఎంపిక కూడా సినిమాపై అంచనాలను డబుల్ చేసింది. వెంకీ సరసన జాతీయ అవార్డు గ్రహీత కీర్తి సురేశ్(Keerthy Suresh) నటిస్తుండగా, కల్యాణ్ రామ్‌తో కృతి శెట్టి జతకట్టనుంది. ఈ ఇద్దరు టాలెంటెడ్ బ్యూటీస్ రాకతో సినిమాకు మరింత గ్లామర్ యాడ్ అయింది. షైన్ స్క్రీన్స్ పతాకంపై సాహు గారపాటి నిర్మిస్తున్న ఈ భారీ చిత్రానికి సురేష్ ప్రొడక్షన్స్, జీ స్టూడియోస్ సంస్థలు భాగస్వాములుగా వ్యవహరిస్తున్నాయి.

నేషనల్ అవార్డ్ విన్నర్ జి.వి. ప్రకాశ్ కుమార్ ఈ చిత్రానికి సంగీతాన్ని అందిస్తున్నారు. అనిల్ రావిపూడి(Anil Ravipudi) మార్క్ ఎంటర్‌టైన్‌మెంట్‌తో పాటు ఇద్దరు హీరోల మాస్ ఎలిమెంట్స్ ఈ సినిమాలో నెక్స్ట్ లెవెల్‌లో ఉండబోతున్నట్లు టాక్. త్వరలోనే రెగ్యులర్ షూటింగ్ జరుపుకోనున్న ఈ సినిమాను 2027 సంక్రాంతి కానుకగా ప్రేక్షకుల ముందుకు తీసుకురావడానికి మేకర్స్ ప్లాన్ చేస్తున్నారు. ప్రస్తుతం ఈ మూవీ లాంచింగ్ వీడియో నెట్టింట టాప్ ట్రెండింగ్‌లో దూసుకుపోతోంది.