చిత్రపరిశ్రమలో శాశ్వత విజయాలు గానీ, శాశ్వత పరాజయాలు గానీ ఉండవు. ఇక్కడ ఎప్పుడు ఎవరి టైమ్ మారుతుందో చెప్పడం కష్టం. అందుకే ఒక విభాగంలో ఆశించిన గుర్తింపు రానప్పుడు, మరో విభాగంలో అదృష్టాన్ని పరీక్షించుకోవడం ఇండస్ట్రీలో ఎప్పటి నుంచో ఉన్నదే. దర్శకులు నటులుగా మారడం, నటులు దర్శకులుగా అవతారమెత్తడం మనం చూస్తూనే ఉంటాం. తాజాగా ఒక‌ప్ప‌టి టాలీవుడ్(Tollywood) స్టార్ డైరెక్టర్ మెహర్ రమేష్ సైతం ఇదే బాట పట్టారు. దర్శకత్వానికి కాస్త గ్యాప్ ఇచ్చి, మళ్లీ తన పాత వృత్తి అయిన నటన వైపు ఆయన అడుగులు వేస్తుండటం ఇప్పుడు ఫిలిం నగర్‌లో హాట్ టాపిక్‌గా మారింది.

మెహర్ రమేష్ అనగానే టాలీవుడ్ ప్రేక్షకులకు భారీ కాస్టింగ్‌తో కూడిన కమర్షియల్ సినిమాలే గుర్తొస్తాయి. ఎన్టీఆర్‌(NTR)తో ‘కంత్రి’, ‘శక్తి’, రెబల్ స్టార్ ప్రభాస్‌తో ‘బిల్లా’ వంటి భారీ చిత్రాలను ఆయన తెరకెక్కించారు. అయితే, ఆశించిన స్థాయిలో సక్సెస్ రేట్ లేకపోవడంతో ఆయన కెరీర్ ఒడిదొడుకుల మధ్య సాగింది. ఇక లాంగ్ గ్యాప్ తర్వాత మెగాస్టార్ చిరంజీవితో చేసిన రీమేక్ మూవీ ‘భోళాశంకర్’ కూడా బాక్సాఫీస్ వద్ద ఘోర పరాజయాన్ని చవిచూసింది. ఈ సినిమా రిజల్ట్ తర్వాత మెహర్ రమేష్ కోలీవుడ్, టాలీవుడ్ సర్కిల్స్‌కు కాస్త దూరంగా ఉంటూ వచ్చారు. మధ్యలో తన కుమార్తె వివాహ వేడుకల్లో బిజీగా గడిపిన ఆయన, ఇప్పుడు మళ్లీ కెరీర్‌ను గాడిలో పెట్టేందుకు సరికొత్త ప్లాన్‌తో ముందుకొచ్చారు.

అయితే ఈసారి ఆయన డైరెక్టర్ సీట్లో కూర్చోవడం లేదు.. లాంగ్ గ్యాప్ తర్వాత కెమెరా ముందుకు రాబోతున్నారు. నిజానికి మెహర్ రమేష్ సినీ ప్రస్థానం దర్శకుడిగా కంటే ముందే నటుడిగా ప్రారంభమైంది. 2002లో మహేష్ బాబు(Mahesh Babu) హీరోగా వచ్చిన ‘బాబీ’ సినిమాలో ఆయన ఒక చిన్న పాత్రలో నటించారు. ఆ తర్వాతే కన్నడ ఇండస్ట్రీ ద్వారా దర్శకుడిగా మారి.. ఆపై తెలుగులో వరుస సినిమాలు చేశారు. ఇప్పుడు దర్శకుడిగా కంటే నటుడిగానే తన సెకండ్ ఇన్నింగ్స్ స్టార్ట్ చేయాలని ఆయన గట్టి నిర్ణయం తీసుకున్నట్లు తెలుస్తోంది.

ప్రస్తుతం టాలీవుడ్‌లో తెరకెక్కుతున్న ఒక క్రేజీ ప్రాజెక్ట్‌లో మెహర్ రమేష్ ఒక కీలకమైన పాత్ర పోషిస్తున్నారనే వార్త గట్టిగా వినిపిస్తోంది. అంతేకాదు, ఎవరికీ తెలియకుండా సైలెంట్‌గా ఈ సినిమాకు సంబంధించిన కొంత భాగం షూటింగ్ కూడా పూర్తి చేశారట. దాదాపు 24 సంవత్సరాల సుదీర్ఘ విరామం తర్వాత ఆయన మళ్లీ ముఖానికి రంగు వేసుకోవడం విశేషం. మెగాఫోన్ పట్టి మెప్పించలేకపోయిన మెహర్ రమేష్(Meher Ramesh).. మరి క్యారెక్టర్ ఆర్టిస్ట్‌గానైనా టాలీవుడ్‌లో బిజీ అవుతారేమో చూడాలి.