రాజకీయాల్లో అధికారంలో ఉన్నప్పుడు పార్టీని నడిపించడం వేరు, ప్రతిపక్షంలో కూర్చుని ప్రభుత్వాన్ని నిలదీయడం వేరు. విపక్ష పాత్ర అనేది నాయకుడి నిజమైన తెగువను, వ్యూహాలను, ప్రజాపోరాట పటిమను బట్టబయలు చేసే అసలుసలా అగ్నిపరీక్ష. సరిగ్గా ఇదే కోణంలో ఇప్పుడు తెలుగు రాష్ట్రాల్లోని ఇద్దరు ప్రముఖ విపక్ష నేతల తీరుపై తీవ్రమైన చర్చ జరుగుతోంది. ఒకవైపు తెలంగాణలో గులాబీ పార్టీని కాపాడుతూ దూసుకెళ్తున్న కేటీఆర్, మరోవైపు ఏపీలో వైసీపీ(YCP)ని వెనకేసుకొచ్చి పోరాడుతున్న వైఎస్ జగన్ తీరును బేరీజు వేస్తే.. ఆ విషయంలో జగన్ కన్నా కేటీఆర్‌రే బెటరా అనే ప్రశ్న రాజకీయ వర్గాల్లో బలంగా వినిపిస్తోంది.

ఆంధ్రప్రదేశ్(Andhra Pradesh) లో 2024 ఎన్నికల్లో పరాభవం తర్వాత వైసీపీ పరిస్థితి పూర్తిగా మారిపోయింది. టెక్నికల్‌గా అసెంబ్లీలో ప్రతిపక్ష హోదా లేకపోయినా, కూటమి ప్రభుత్వానికి ఏకైక ప్రత్యామ్నాయంగా జగనే ఆ పాత్రను పోషించాలి. అయితే జగన్(Jagan) చేస్తున్న పరామర్శ యాత్రలు, ఓదార్పు పర్యటనలు క్షేత్రస్థాయిలో ప్రజల సమస్యలను వెలికితీయడంలో కొంతమేర వెనుకబడుతున్నాయనే విమర్శలున్నాయి. తిరుమల లడ్డు వివాదం, విశాఖ కేటాయింపులు, లేదా పార్టీ నేతల వ్యక్తిగత సమస్యలపై సాగే పర్యటనలు కేవలం పార్టీ శ్రేణుల్లో ఉత్సాహం నింపడానికే పరిమితమవుతున్నాయనే వాదన ఉంది. ప్రజల సమస్యల కంటే పార్టీ ప్రయోజనాలే ఎజెండాగా మారుతున్నాయన్న భావన ప్రజల్లోకి వెళ్తోంది. దీనికి తోడు ఆయన తరచూ బెంగళూరుకే పరిమితమవడం, గతంలో తాను చేసిన అభివృద్ధి ప్రకటనలకు, ప్రస్తుత విమర్శలకు పొంతన కుదరకపోవడం వంటి అంశాలు ఆయనను కాస్త వెనక్కిలాగుతున్నాయి.

తెలంగాణ రాజ‌కీయాల విష‌యానికి వ‌స్తే.. బీఆర్ఎస్ పార్టీ అధికారం కోల్పోయిన తర్వాత క్షేత్రస్థాయిలో పార్టీ క్యాడర్‌ను కాపాడుకోవడంలో కేటీఆర్ అద్భుతంగా వ్యవహరిస్తున్నారు. పార్టీ వర్కింగ్ ప్రెసిడెంట్‌గా, కేసీఆర్(KCR) తనయుడిగా ఆయన భుజాన వేసుకున్న బాధ్యతలు చిన్నవి కావు. అధికార కాంగ్రెస్ ప్రభుత్వం అనుసరిస్తున్న విధానాలపై కేటీఆర్ నిత్యం విమర్శనాస్త్రాలు సంధిస్తున్నారు. హైడ్రా కూల్చివుల నుంచి కాళేశ్వరం ప్రాజెక్టు వివాదాల వరకు, రైతుల సమస్యల నుంచి నిరుద్యోగుల ఆందోళనల వరకు ప్రతి అంశాన్ని ఆయన చాలా షార్ప్‌గా పట్టుకుంటున్నారు. ప్రభుత్వ వైఫల్యాలను ఎండగట్టడంలో సోషల్ మీడియాను, మీడియా సమావేశాలను ఏకకాలంలో సమర్థవంతంగా వాడుకుంటూ ప్రభుత్వానికి నిద్ర లేకుండా చేస్తున్నారు.  

ఫైన‌ల్‌గా ఈ ఇద్దరు నేతల శైలిని గమనిస్తే.. కేటీఆర్(KTR) పూర్తిగా ప్రజా సమస్యలను, ప్రభుత్వ వైఫల్యాలను ఏకీకృతం చేస్తూ నిత్యం జనంలో ఉంటున్నారు. వాక్చాతుర్యంతో, షార్ప్ కౌంటర్లతో ప్రత్యర్థులను డిఫెన్స్‌లో పడేస్తున్నారు. కానీ జగన్ మాత్రం ప్రజా సమస్యల కంటే కేవలం పార్టీ పునర్నిర్మాణం, క్యాడర్ భరోసా చుట్టే తన పర్యటనలను తిప్పుతున్నారు. ప్రెస్ మీట్లలో ఆయన చేసే ఆరోపణలు సోషల్ మీడియాలో ట్రెండ్ అవుతున్నప్పటికీ, క్షేత్రస్థాయిలో ప్రభుత్వాన్ని ఇరుకున పెట్టే బలమైన ప్రజా ఉద్యాలుగా మారడం లేదు. అన్ని కోణాలను బేరీజు వేసి చూస్తే.. ప్రస్తుత రాజకీయ పరిస్థితుల్లో విపక్ష నేతగా ప్రజల నడిమధ్యలో ఉంటూ దూకుడు ప్రదర్శించడంలో జగన్ కన్నా కేటీఆర్‌రే ఒక మెట్టు పైన ఉన్నారనే అభిప్రాయం స్పష్టంగా కనిపిస్తోంది.