ఒక‌టి కాదు.. రెండు కాదు.. ఏకంగా మూడు ఎన్నిక‌లు, 11 సంవ‌త్స‌రాల సుదీర్ఘ నిరీక్ష‌ణ అనంత‌రం కాంగ్రె స్ పార్టీ జూబ్లీహిల్స్ గ‌డ్డ‌పై జెండా పాతింది. ఒక‌ప్పుడు కాంగ్రెస్ కంచుకోటే అయినా.. త‌ర్వాత‌.. త‌ర్వాత చోటు చేసుకున్న మార్పుల‌తో 2014 నుంచి 2023 వ‌ర‌కు ఆ పార్టీ విజ‌యం ద‌క్కించుకోలేక పోయింది. అంతేకాదు.. ఒక‌ద‌శ‌లో డిపాజిట్ కూడా పోగొట్టుకునే స్థాయికి చేరుకుంది. అలాంటి చోట సుదీర్ఘ నిరీక్ష‌ణ ఫ‌లించి.. తాజాగా విజ‌యం ద‌క్కించుకుంది.

తాజాగా జ‌రిగిన ఉప ఎన్నిక‌లో కాంగ్రెస్ పార్టీ అభ్య‌ర్థి న‌వీన్ యాద‌వ్ 24,658 ఓట్ల భారీ మెజారిటీతో విజ‌యం ద‌క్కించుకున్నారు. వాస్త‌వానికి 2009లో ప‌బ్బ‌తి రెడ్డి జ‌నార్ద‌న్ రెడ్డి 20 వేల ఓట్ల మెజారిటీతో విజ‌యం ద‌క్కించుకున్న త‌ర్వాత‌.. ఇప్పుడే కాంగ్రెస్ పార్టీ ఇక్క‌డ పాగా వేసింద‌ని చెప్పాలి. ఈ మ‌ధ్య‌లో 2014, 2018, 2023 ఎన్నిక‌ల్లో మాగంటి గోపీనాథ్ టీడీపీ, బీఆర్ ఎస్ పార్టీల త‌ర‌ఫున పోటీ చేసి విజ‌యం ద‌క్కించుకు న్నారు. ఆ త‌ర్వాత‌.. ఇప్పుడు కాంగ్రెస్ పార్టీ విజ‌యం సాధించ‌డం విశేషం.

ప‌క్కా వ్యూహం..

కాంగ్రెస్ పార్టీ లేటుగానే ప్ర‌చారం ప్రారంభించింది. అయితే.. సీఎం రేవంత్ రెడ్డి ప‌క్కా వ్యూహంతో పదునైన రాజ‌కీయ ర‌చ‌న‌ను ఇక్క‌డ చేశారు. వార్డులు, గ‌ల్లీల వారీగా నేత‌ల‌కు బాధ్య‌త‌లు అప్ప‌గించారు. ప్ర‌ధాన ప్ర‌చారాన్ని తాను స్వ‌యంగా తీసుకున్నారు. ఇంటా , బ‌య‌టా కూడా.. నాయ‌కులు ఏక‌మ‌య్యేలా ప్రోత్స‌హించారు. భేష‌జాల‌కు పోకుండా.. నాయ‌కులుక‌ల‌సి క‌ట్టుగా ముందుకు సాగాల‌ని చెప్పారు.

దీనికితోడు బీఆర్ ఎస్ పార్టీని విమ‌ర్శించ‌డంలోనూ.. అదేస‌మ‌యంలో వక్తిగ‌తంగా త‌న వ్యూహాన్ని కూడా ఇక్క‌డ స‌ఫ‌లం అయ్యేలా వ్య‌వ‌హ‌రించారు. ఫ‌లితంగా.. మూడు ఎన్నిక‌లు, 11 సంవ‌త్స‌రాల నిరీక్ష‌ణ అనంత‌రం.. కాంగ్రెస్ పార్టీ గుండెకాయ వంటి జూబ్లీహిల్స్ ఉప ఎన్నిక‌లో విజ‌యం ద‌క్కించుకుని.. త‌న హ‌వాను నిల‌బెట్టుకుంది.