జూబ్లీహిల్స్ ఫలితాలతో జగన్‌కు ఎదురుదెబ్బ..!

admin
Published by Admin — November 15, 2025 in Politics
News Image

జూబ్లీహిల్స్ ఉప ఎన్నికల్లో కాంగ్రెస్ పార్టీ ఘన విజయం సాధించిన సంగ‌తి తెలిసిందే. ఆ పార్టీ అభ్య‌ర్థి న‌వీన్ యాద‌వ్.. 25 వేల ఓట్ల మెజార్టీతో గెలుపొందారు. అయితే కాంగ్రెస్ గెలుపు తెలంగాణ రాజకీయాలను మాత్రమే కాకుండా ఆంధ్రప్రదేశ్ పాలిటిక్స్‌నూ కుదిపేసింది. ముఖ్యంగా జూబ్లీహిల్స్ ఫలితాలతో వైసీపీ అధినేత‌, మాజీ ముఖ్య‌మంత్రి వైఎస్ జ‌గ‌న్‌కు పెద్ద ఎదురుదెబ్బ త‌గిలిన‌ట్లైంది.

అనుకున్నట్లుగా బీఆర్ఎస్ గెలవకపోవడంతో వైసీపీ లెక్కలు పూర్తిగా త‌ప్పాయి. తన మిత్రుడు బలపడితే తాను కూడా రాజకీయంగా బలపడతానని భావించిన జగన్‌కు ఈ ఫలితం అసలు మింగుడుపడలేదు. జగన్, కేసీఆర్ మధ్య ఉన్న రాజకీయ స్నేహం ఇప్ప‌టిది కాదు. 2014 రాష్ట్ర విభజన నుంచి మొదలైన ఈ దగ్గర సంబంధం… కాంగ్రెస్ వ్యతిరేకతతో మరింత బలపడింది. కేసీఆర్ బలపడితే జగన్ కూడా బలపడతాడు అన్న అంచనాలే ఇప్పటివరకు వైసీపీ స్ట్రాటజీకి బేస్. అయితే జూబ్లీహిల్స్ ఫలితం ఆ అంచనాలను ఒక్క దెబ్బకు పాడు చేసింది.

తెలంగాణలో వైసీపీ నేరుగా ఎన్నికల్లో లేకపోయినా.. సెటిలర్ ఓటర్లపై పార్టీకి ఉన్న ప్రభావం మాత్రం బలంగానే ఉంటుంది. ఈసారి కూడా వైసీపీ సానుభూతిపరులు బీఆర్ఎస్ కోసం బలంగా పనిచేశారు. మ‌రోవైపు తెలుగుదేశం పార్టీ తటస్థంగా ఉన్నప్పటికీ.. వారి శ్రేణులు మాత్రం ఎక్కువగా కాంగ్రెస్ వైపు మొగ్గు చూపారు. క‌ట్ చేస్తే బీఆర్ఎస్ ఓట‌మి వైసీపీకి తీవ్ర నిరాశ‌ను మిగిల్చింది.

తెలంగాణ అసెంబ్లీ, కంటోన్మెంట్, పార్లమెంట్ ఎన్నికల్లో  బీఆర్ఎస్ వరుస పరాజయాలు ఎదుర్కొంది. కొన్ని పార్లమెంట్ నియోజకవర్గాల్లో డిపాజిట్లు కూడా దక్కనంత పరిస్థితి. ఇప్పుడు జూబ్లీహిల్స్‌లో దారుణంగా ఓడిపోవడంతో గులాబీ పార్టీ పూర్తిగా అస్తవ్యస్తమైంది. బీఆర్ఎస్ బలపడితే మనకూ లాభమని భావించిన వైసీపీకి ఈ ఫలితం మరో పెద్ద దెబ్బ.

Tags
Jubilee Hills YS Jagan BRS YSRCP Congress Ap Telangana
Recent Comments
Leave a Comment

Related News