ప్రియాంక చోప్రా.. అలా ఎంట్రీ ఇవ్వాల్సింది

admin
Published by Admin — November 16, 2025 in Movies
News Image

రాజ‌మౌళి ద‌ర్శ‌క‌త్వంలో సూప‌ర్ స్టార్ మ‌హేష్ బాబు న‌టిస్తున్న సినిమా పేరేంటో శ‌నివారం రివీల్ అయింది. ఇండియాస్ మోస్ట్ అవైటెడ్ మూవీకి  `వారణాసి` అనే పేరును ఖరారు చేస్తూ, `వారణాసి టు ద వరల్డ్` పేరుతో ఒక ప్రత్యేక వీడియోను విడుదల చేశారు.రామోజీ ఫిలిం సిటీలో భారీగా నిర్వ‌హించ‌బ‌డిన 'గ్లోబ్ ట్రాటర్' ఈవెంట్‌లో చిత్ర‌బృందం ఈ వివ‌రాల‌ను వెల్ల‌డించింది. ఈ చిత్రంలో మాజీ మిస్ వ‌ర‌ల్డ్ ప్రియాంక చోప్రా క‌థానాయిక‌గా న‌టిస్తున్న సంగ‌తి తెలిసిందే. 

ఇటీవ‌లే ఆమె పోషిస్తున్న మందాకిని పాత్ర ఫ‌స్ట్ లుక్ కూడా లాంచ్ చేశారు. దానికి మంచి స్పంద‌న కూడా వ‌చ్చింది. ఇప్పుడు ఇంత భారీ ప్రాజెక్టుతో ప్రియాంక చోప్రా టాలీవుడ్లోకి అడుగు పెడుతుండడం విశేష‌మే. కానీ ఆమె కెరీర్ తొలినాళ్ల‌లోనే తెలుగులో ఓ సినిమా చేసింద‌న్న విష‌యం చాలామందికి తెలియ‌దు. అంత‌కంటే ఆశ్చ‌ర్య‌క‌ర‌మైన విష‌యం ఏంటంటే.. అస‌లా సినిమా రిలీజే కాకుండా మ‌ధ్య‌లో ఆగిపోయింది. ఆ చిత్రం పేరు.. అపురూపం.


2000 సంవ‌త్స‌రంలో మిస్ వ‌ర‌ల్డ్ అయిన ప్రియాంక‌.. త‌మిళంలో 2002లో విజ‌య్ మూవీ త‌మిళ‌న్‌తో తెరంగేట్రం చేసింది. అదే ఏడాది హిందీలో స‌న్నీ డియోల్ స‌ర‌స‌న హీరో మూవీ చేసింది. అదే స‌మ‌యంలో ఆమెకు తెలుగులోనూ ఓ ఛాన్స్ వ‌చ్చింది. అదే.. అపురూపం. ఔను వాళ్లిద్ద‌రూ ఇష్ట‌ప‌డ్డారు మూవీలో న‌టించిన ప్ర‌స‌న్న‌తో పాటు మ‌ధుక‌ర్ అనే మ‌రో హీరో ఇందులో లీడ్ రోల్ చేశారు. జి.ఎస్.ర‌వికుమార్ ఈ చిత్రానికి ద‌ర్శ‌కుడు. ఐతే మేకింగ్ మ‌ధ్య‌లో ఉండ‌గా ఏవో కార‌ణాల‌తో ఈ సినిమా ఆగిపోయింది. 

అప్ప‌టికే ఈ చిత్రం నుంచి ఒక పాట‌ను కూడా విడుద‌ల చేశారు. అందులో మ‌ధుక‌ర్, ప్రియాంక న‌టించారు. ఆ పాట ఇప్ప‌టికీ యూట్యూబ్‌లో ఉంది. మ‌ధ్య‌లో ఆగిన ఆ మూవీ వ‌ల్ల ప్రియాంక టాలీవుడ్ డెబ్యూకు బ్రేక్ ప‌డిపోయింది. త‌ర్వాత ఆమె హిందీలో టాప్ హీరోయిన్ల‌లో ఒక‌రిగా ఎదిగింది. ఆపై హాలీవుడ్లోనూ సినిమాలు, టీవీ సిరీస్‌లు చేసింది. హాలీవుడ్ న‌టుడే అయిన నిక్ జోనాస్‌ను పెళ్లాడింది. కొన్నేళ్లుగా హిందీ చిత్రాలు కూడా చేయ‌ని ప్రియాంక‌.. ఇప్పుడిలా రాజ‌మౌళి-మ‌హేష్ మూవీతో ఇండియ‌న్ మూవీస్‌లోకి రీఎంట్రీ ఇస్తుండ‌డం విశేషం.

Tags
Priyanka Chopra Mahesh Babu Varanasi movie SS Rajamouli Tollywood Bollywood
Recent Comments
Leave a Comment

Related News