దేశవ్యాప్తంగా సినిమాలు, ఓటీటీ కంటెంట్‌ను గంటల వ్య‌వ‌ధిలోనే పైరసీ చేసి విడుదల చేస్తున్న ఐ-బొమ్మ నిర్వాహకుడు ఇమ్మడి రవిని సైబర్ క్రైమ్ పోలీసులు అరెస్టు చేసి నాంపల్లి కోర్టులో హాజరుపరచగా, కోర్టు 14 రోజుల రిమాండ్ విధించింది. అనంతరం రవిని చంచల్‌గూడ జైలుకు తరలించారు. ఫ్రాన్స్‌ నుంచి హైదరాబాద్‌కు వచ్చిన రవి, కూకట్‌పల్లిలోని రెయిన్ విస్టా అపార్ట్‌మెంట్‌లో తలదాచుకున్న సమయంలో పోలీసులు అతడిని అదుపులోకి తీసుకున్నారు. అక్కడి నుంచి కంప్యూటర్లు, హార్డ్‌డిస్క్‌లు, మొబైల్స్‌ను స్వాధీనం చేసుకున్నారు. అతడి బ్యాంకు ఖాతాలో ఉన్న రూ. 3 కోట్లను కూడా ఫ్రీజ్ చేశారు.

సైబర్ క్రైమ్ దర్యాప్తులో రవి కరేబియన్ దీవుల్లో కూర్చుని ఐ-బొమ్మ వెబ్‌సైట్‌ను నడుపుతున్నట్లు బయటపడింది. ఇప్పటికే ఐ బొమ్మ, బప్పమ్ వంటి పైరసీ వెబ్‌సైట్లను అధికారులు బ్లాక్ చేశారు. ఐ బొమ్మ వెబ్‌సైట్‌లో నెలకు 35–40 లక్షల మంది సినిమాలు చూస్తున్నారని పోలీసులు చెబుతున్నారు. ఈ ట్రాఫిక్‌ను బెట్టింగ్ యాప్‌ల ప్రచారం కోసం ఉపయోగించి, 1Xబెట్‌ వంటి యాప్‌ల నిర్వాహకులతో రవి కోట్ల రూపాయల డీల్స్ చేసుకున్నట్లు విచారణలో తెలిసింది. ఐ-బొమ్మలో రెగ్యులర్‌గా బెట్టింగ్ ప్రకటనలు రావడం కూడా ఇదే నెట్‌వర్క్‌లో భాగమని పోలీసులు తెలిపారు.

సైబర్ క్రైమ్ పోలీసుల దర్యాప్తులో ఇమ్మ‌డి ర‌వి గురించి కొన్ని షాకింగ్ ఫ్యాక్ట్స్ వెలుగులోకి వ‌చ్చాయి. విశాఖపట్నం స్వస్థలమైన ఇమ్మడి రవి ముంబై యూనివర్సిటీలో ఎంబీఏ పూర్తి చేశాడు. టెక్ బ్యాక్‌గ్రౌండ్ కలిగి ఉండడంతో డిజిటల్ ప్లాట్‌ఫారమ్‌లపై మంచి జ్ఞానం ఉంది. కేరీబియన్ దీవులకు వెళ్లే ముందు రవి హైదరాబాద్‌లో ER Infotech అనే సాఫ్ట్‌వేర్ కంపెనీని స్థాపించి, సీఈఓగా పనిచేశాడు. ఇదే టెక్నికల్ స్కిల్ తరువాత పైరసీ ఆపరేషన్లకు వాడినట్లు పోలీసులు భావిస్తున్నారు.

నెదర్లాండ్స్, కరేబియన్ దీవుల్లో ఉండి క్లౌడ్‌ఫ్లేర్, ఓటీటీ సర్వర్లను హ్యాక్ చేసి సినిమాలను కాపీ చేసే వ్యవస్థను అభివృద్ధి చేశాడు. అక్కడి నుంచే ఐ బొమ్మ, బప్పం, ఐ విన్, బప్పం టీవీలలో కంటెంట్ అప్‌లోడ్ చేస్తున్నాడు. 1Xబెట్‌ బెట్టింగ్ లింకులను ట్రేస్ చేస్తుండ‌గా ఐ-బొమ్మ లింక్ దొరికిన‌ట్లు పోలీసులు వెల్లడించారు. ఆ ఆధారాలే రవి అరెస్టుకు దారితీశాయి. సినిమా ప్రేక్షకుల్ని పైరసీ ద్వారా ఆకర్షించి, తరువాత బెట్టింగ్ యాప్‌లకు మళ్లించడం రవి బ్లూప్రింట్‌గా ఉన్నట్లు దర్యాప్తు చెబుతోంది. ఈ రెండు నెట్‌వర్క్‌లను కలిపి రవి భారీగా డబ్బు సంపాదించాడు. క‌ట్ చేస్తే ఇప్పుడు జైల్లో ఊచ‌లు లెక్క‌పెడుతున్నాడు.