ప్రపంచవ్యాప్తంగా గుర్తింపు పొందిన దర్శకుడు ఎస్‌.ఎస్‌. రాజమౌళి, ఇటీవల గ్లోబ్ ట్రాటర్ ఈవెంట్‌లో చేసిన వ్యాఖ్యలు ప్రస్తుతం పెద్ద దుమారానిక్కారణమయ్యాయి. హనుమంతుడి గురించి మాట్లాడిన తీరు భక్తుల మనోభావాలను దెబ్బతీసిందని సోషల్ మీడియా అంతటా విమర్శలు వెల్లువెత్తుతున్నాయి. హ‌నుమాన్ రాజ‌మౌళి వెనుక ఉండి ఈ సినిమా తీయించార‌ని విజ‌యేంద్ర‌ప్ర‌సాద్ అన్నారు.

అయితే `వారణాసి` మూవీ గ్లింప్స్ రిలీజ్‌కు వరుస సాంకేతిక ఆటంకాలు రావడంతో తీవ్ర ఆస‌హ‌నానికి లోనైన రాజ‌మౌళి ఈవెంట్ లో త‌న తండ్రి కామెంట్స్ పై రియాక్ట్ అవుతూ నోరు జారారు. `హనుమంతుడు నా వెనుక నిలబడి ఈ సినిమా చేయిస్తున్నాడ‌ని మా నాన్న అంటుంటారు, కానీ నాకు దేవుడిపై నమ్మకం మాత్రం పెద్దగా లేదు` అని రాజ‌మౌళి వ్యాఖ్యానించారు.

వారణాసి మూవీ గ్లింప్స్ రిలీజ్‌కు వరుసగా టెక్నిక‌ల్ ఇష్యూస్ రావ‌డంతో “ఇదేనా నడిపించేది?” అంటూ రాజ‌మౌళి అస‌హ‌నం వ్య‌క్తం చేయ‌డం హనుమాన్ భక్తులను మరింత ఆగ్రహానికి గురిచేసింది. దీంతో జ‌క్క‌న్న‌పై సోష‌ల్ మీడియాలో ట్రోల్స్ వెల్లువెత్తుతున్నాయి. టెక్నికల్ టీమ్ వైఫల్యాన్ని దేవుడిపై నెట్టడం ఏంటని నెటిజన్లు ప్రశ్నిస్తున్నారు. దేవుడిని నమ్మనంటూనే, సమస్యలు రాగానే హనుమంతుడిని నిందించడం సరైంది కాదంటూ భక్తులు మండిపడుతున్నారు. ఈ వివాదం ఇప్పుడు తెలుగు సినీ ఇండస్ట్రీలో హాట్ టాపిక్‌గా మారింది.

ఈ వివాదం గురించి పక్కన పెడితే, రాజమౌళి–మహేశ్ బాబు కాంబినేషన్‌లో వస్తున్న వారణాసి మూవీ గ్లింప్స్ మాత్రం ప్రేక్షకులను విశేషంగా ఆక‌ట్టుకుంది. హాలీవుడ్ రేంజ్ సెట్లు, టాప్ క్లాస్ వీఎఫ్ఎక్స్‌ వర్క్, త్రీడీ విజువల్స్ సినిమాపై అంచనాలను గ్లోబల్ లెవెల్‌లో పెంచేశాయి.