ఇమ్మ‌డి ర‌వి!. ఇప్పుడు ఈ పేరు రెండు తెలుగు రాష్ట్రాల్లోనే కాదు.. ద‌క్షిణాది రాష్ట్రాల్లోనూ వినిపిస్తోంది. దీనికి కార‌ణం.. ద‌క్షిణాది సినిమాలు ఇలా విడుద‌ల అయ్యి.. అవ‌డంతోనే మ‌రు గంట‌లోనే అవి పైర‌సీకి చోటు చేసుకున్నాయి. ఫ‌లితంగా వంద‌ల వేల కోట్ల రూపాయ‌లు ఖ‌ర్చు చేసి తీసిన సినిమాలు తీవ్రంగా న‌ష్ట‌పోతున్నాయి. `పైర‌సీ భూతం` ఎక్క‌డో లేదు.. ఇమ్మ‌డి ర‌వి రూపంలో మ‌న‌మ‌ధ్యే ఉందంటూ.. సినీ రంగం గ‌గ్గోలు పెట్టింది.

దీనిపై దృష్టి పెట్టిన తెలంగాణ ప్ర‌భుత్వం, పోలీసులు కూడా ర‌వికి గ‌తంలోనే గ‌ట్టిగా వార్నింగ్ ఇచ్చారు. అయితే.. వాటిని బేఖాత‌రు చేస్తూ.. త‌న‌ను ఇబ్బంది పెడితే.. కుద‌ర‌ద‌ని.. ల‌క్షల మంది డేటా త‌న వ‌ద్ద ఉంద‌ని స‌వాల్ రువ్విన ర‌విని మ‌రింత ప్ర‌తిష్టాత్మ‌కంగా భావించిన హైద‌రాబాద్ పోలీసులు అరెస్టు చేశారు. అతని ద్వారా ఐబొమ్మ‌, బొప్పం వంటి పైర‌సీ సైట్ల‌ను మూయించారు. ఇదేస‌మ‌యంలో అత‌ని నోటి ద్వారా.. నిజాలు క‌క్కించారు.

పోలీసులు తెలిపిన వివ‌రాల ప్ర‌కారం.. ర‌వి సుమారు 21 వేలకు పైగా కీల‌క చిత్రాల‌ను(ఇవి ద‌క్షిణాది భాష లు) పైర‌సీ చేశాడు. ఇదేస‌మ‌యంలో 50 ల‌క్షల మందికి పైగా డేటాను కూడా త‌న వ‌ద్ద పెట్టుకున్నాడు. అంతేకాదు.. పైర‌సీ ఒక భాగ‌మైతే.. బెట్టింగు యాప్‌ల‌ను కూడా విస్తృతంగా ప్రోత్స‌హించాడ‌ని పోలీసులు గుర్తించారు. ఈ ప్ర‌భావంతో  అనేక మంది యువత ఆత్మ‌హ‌త్య‌లు చేసుకున్నారు. ర‌విపై ఐటీ యాక్ట్‌, కాపీ రైట్‌ యాక్ట్‌ కింద మరో 4 కేసులు నమోదు చేశారు.

త‌న న‌కిలీ సామాజ్రాన్ని అమెరికా స‌హా ఇత‌ర దేశాల్లో విస్త‌రించాడు. మొత్తం 65 మిర్రర్‌ వెబ్‌సైట్లు నిర్వహించాడు.1972లో విడుదలైన గాడ్‌ఫాదర్‌ నుంచి  ఇటీవ‌లే  వచ్చిన సినిమాల వరకు పైర‌సీ చేశాడు.  మొత్తం ఈ న‌కిలీ సామ్రాజ్యం ద్వారా 20 కోట్ల రూపాయ‌లు వెనుకేసుకున్నాడు.  50 లక్షల మంది సబ్‌స్క్రైబర్ల డేటాను త‌న వ‌ద్ద పెట్టుకున్నాడు.  అంతేకాదు.. పోలీసులు త‌న‌ను ఎక్క‌డ ప‌ట్టుకుంటారో అనే భ‌యంతో ఏకంగా దేశ పౌర‌స‌త్వాన్ని వ‌దులుకుని.. ఎక్క‌డో ఉన్న కరేబియన్‌ దీవుల్లోని అతి చిన్న దేశం సెయింట్‌ కిట్స్‌ అండ్‌ నెవిస్‌(ఈ పేరు కూడా ఇప్ప‌టి వ‌ర‌కు ఎవ‌రు వినిఉండ‌రు) దేశ పౌరసత్వం  తీసుకున్నాడు.

ఇంత‌కీ.. ర‌వి ఎక్క‌డి వాడోకాదు.. ఏపీలోని విశాఖ‌ప‌ట్నానికి చెందిన వారు. పైగా బీఎస్సీ కంప్యూట‌ర్స్ చేశాడు. దీంతో గౌర‌వ ప్ర‌ద‌మైన ఉద్యోగం నెల‌కు 2-3 ల‌క్ష‌లు సంపాయించుకునే ఉద్యోగం చేసుకునే అవ‌కాశం ఉన్నా.. దారి త‌ప్పి.. ఎంద‌రినో బ‌లి తీసుకున్నాడు. సినీ రంగానికి కొన్ని వేల కోట్ల న‌ష్టం క‌లిగించాడు.