ప్రస్తుతం ఇండియాలో రాజమౌళికి ఉన్న ఫాలోయింగ్ మరే దర్శకుడికీ లేదు అంటే ఆ మాటను ఎవ్వరూ ఖండించరు. ఈగ, బాహుబలి, ఆర్ఆర్ఆర్ చిత్రాలతో దేశవ్యాప్తంగా ఆ స్థాయిలో ఫాలోయింగ్ సంపాదించాడు జక్కన్న. ప్రేక్షకులకు అద్భుతమైన, ప్రపంచ స్థాయి కంటెంట్ ఇవ్వాలని ఆయన పడే తపనే అంతటి అభిమానాన్ని తెచ్చిపెట్టింది. తన చేతలతో పాటు మాటలు సైతం అందరినీ ఆకట్టుకుంటూ ఉంటాయి. రాజమౌళిపై విమర్శలు రావడం అరుదు. 

కానీ నిన్నటి ‘వారణాసి’ ఈవెంట్లో రాజమౌళి చేసిన ప్రసంగం మాత్రం ఆయన మీద కొంత విమర్శలకు దారి తీసింది. ఒక డ్రోన్ కారణంగా ముందుగా టెస్ట్ చేసుకోకపోవడంతో భారీ ఎల్‌ఈడీ స్క్రీన్ మీద కాన్సెప్ట్ టీజర్‌ను ప్రదర్శించడంలో ఆలస్యం జరగడంతో రాజమౌళి తీవ్ర ఆవేదన చెందాడు. ఎన్నో రోజుల నుంచి తాను పడ్డ కష్టానికి ఫలితం దక్కట్లేదని ఆయన బాధ పడడాన్ని అందరూ అర్థం చేసుకున్నారు.

కానీ ఈ క్రమంలో ఆయన దేవుడి గురించి చేసిన కామెంట్లు మాత్రం కొందరికి రుచించలేదు. తాను దేవుడిని పెద్దగా నమ్మను అని చెబుతూనే.. హనుమంతుడు వెనుక ఉండి నడిపిస్తాడంటూ తన తండ్రి చెప్పే మాటలను ఉటంకిస్తూ మరి నడిపించలేదేంటి అనే బాధ కలిగిందన్నాడు రాజమౌళి. అలాగే హనుమంతుడితో తన భార్య ఒక ఫ్రెండులాగా మాట్లాడుతూ ఉంటుందని, ఈ సమయంలో ఆయన ఏం చేయట్లేదేంటి అన్నట్లు రాజమౌళి వ్యాఖ్యానించాడు. 

ఐతే కారణాలు ఏవైనప్పటికీ.. టీజర్ ఆలస్యం జరగడంలో టీం వైఫల్యం ఉందన్నది వాస్తవం. దానికి దేవుడిని నిందించడం ఏంటి అంటూ సోషల్ మీడియాలో విమర్శలు మొదలయ్యాయి. ఓవైపు తాను దేవుడిని నమ్మను అని చెబుతూ.. ఇంకోవైపు తమ టీంలో జరిగిన తప్పుకి దేవుడిని నిందించడం కరెక్ట్ కాదనే చర్చ మొదలైంది. ఓవైపు దేవుడి మీద సినిమా తీస్తూ.. తాను దేవుడిని నమ్మని అని చెబుతూ.. మళ్లీ దేవుడిని నిందించడం పట్ల విమర్శలు వస్తున్నాయి. ఈ కామెంట్ రాజమౌళి అవాయిడ్ చేయాల్సిందనే అభిప్రాయం బలంగా వినిపిస్తోంది.