మ‌హేష్ బాబుతో తాను తెర‌కెక్కిస్తున్న‌ వార‌ణాసి సినిమాకు సంబందించి ఫ‌స్ట్ లుక్, టైటిల్‌తో పాటు కాన్సెప్ట్ ట్రైల‌ర్ లాంచ్ చేసిన ఈవెంట్లో రాజ‌మౌళి ఎన్న‌డూ లేని విధంగా కొంత భావోద్వేగానికి, అస‌హ‌నానికి గురైన సంగ‌తి తెలిసిందే. తాము ఏడాది పాటు క‌ష్ట‌ప‌డి రూపొందించిన వీడియోను అభిమానుల ముందు పెట్టే ముందు టెస్ట్ చేసుకుంటూ ఉంటే ఒక డ్రోన్ వ‌చ్చి డిస్ట‌ర్బ్ చేయ‌డం.. త‌ర్వాత టెస్టింగ్ లేకుండానే ఈవెంట్లో ట్రైల‌ర్‌ను ప్ర‌ద‌ర్శించ‌బోతే సాంకేతిక స‌మ‌స్య‌లు త‌లెత్త‌డం ప‌ట్ల రాజ‌మౌళి చాలా ఫీల‌య్యాడు. ఈ క్ర‌మంలోనే తాను నాస్తికుడిని అని చెబుతూ.. త‌న తండ్రి, భార్య న‌మ్మే హ‌నుమంతుడు ఈ స‌మ‌యంలో త‌మ‌కు సాయ‌ప‌డ‌లేదేంటి అన్న‌ట్లుగా రాజ‌మౌళి మాట్లాడాడు. ఈ వ్యాఖ్య‌ల ప‌ట్ల ఒక వ‌ర్గం తీవ్ర అభ్యంత‌రం వ్య‌క్తం చేసింది. తాను దేవుడిని న‌మ్మ‌న‌ని చెబుతూనే.. దేవుడిని త‌ప్పుబ‌ట్ట‌డం ఏంటి అని ప్ర‌శ్నించారు. రెండు రోజుల పాటు రాజ‌మౌళిని ఈ విష‌యంలో ట్రోల్ చేశారు. అదే స‌మ‌యంలో రాజ‌మౌళిని కొంద‌రు స‌మ‌ర్థించారు కూడా.

ఐతే ఈ విమ‌ర్శ‌ల నేప‌థ్యంలో వివాదం పెద్ద‌ది కాకుండా, సినిమా ప‌ట్ల వ్య‌తిరేక‌త పెర‌గ‌కుండా రాజ‌మౌళి త‌న మాట‌ల ప‌ట్ల పశ్చాత్తాపం వ్య‌క్తం చేస్తాడేమో, సారీ చెబుతాడేమో అనే చ‌ర్చ జ‌రిగింది. కానీ రాజమౌళి ఈ విష‌యాన్ని ప‌ట్టించుకోకూడ‌ద‌నే నిర్ణ‌యించుకున్నారు. ఆయ‌న ఈ ఈవెంట్‌కు సంబంధించి అంద‌రికీ థ్యాంక్స్ చెబుతూ ఎక్స్‌లో పోస్టులు పెట్టారు. ఈవెంట్ కోసం ఎక్క‌డో వాహ‌నాల‌ను పార్క్ చేసి మూడు కిలోమీట‌ర్లు న‌డ‌వ‌డంతో పాటు ఎంతో ఓపిక‌గా ఉంటూ స‌హ‌క‌రించిన మ‌హేష్ అభిమానుల‌కు రాజ‌మౌళి ముందుగా థ్యాంక్స్ చెప్పాడు. ఆ త‌ర్వాత ఏడాది పాటు ఈ వీడియో కోసం క‌ష్ట‌ప‌డిన వీఎఫెక్స్ టీం గురించి వివ‌రంగా చెప్పి వారికీ ధ‌న్య‌వాదాలు చెప్పాడు. ఇంకా ఈ ఈవెంట్‌ను ఏ అప‌శ్ర‌తులూ లేకుండా నిర్వ‌హించ‌డంలో తోడ్ప‌డిన పోలీసుల‌కు.. త‌న టీం అంత‌టికీ ఆయ‌న ధ‌న్య‌వాదాలు చెప్పారు. అంతే కాక ఎన్నో ఏళ్లుగా త‌న హెడ‌ర్‌గా ఉన్న ఆర్ఆర్ఆర్ పోస్ట‌ర్‌ను తీసేసి వార‌ణాసి పోస్ట‌ర్‌తో రీప్లేస్ కూడా చేశాడు జ‌క్క‌న్న‌.