విజ‌య‌వాడ‌లో మావోయిస్టులు మ‌కాం వేశార‌న్న వార్త న‌గ‌రాన్ని ఉలిక్కిప‌డేలా చేసింది. దీంతో పోలీసులు హుటాహుటిన రంగంలోకి దిగి మావోయిస్టులు మ‌కాం వేసిన ఆటోన‌గ‌ర్‌లోని భ‌వ‌నంపై దాడి చేశారు. సుమా రు 20 మందిని అరెస్టు చేశారు. అదేవిధంగా కృష్ణాజిల్లా, కాకినాడ జిల్లాల్లోనూ మావోయిస్టులు ఉన్నార‌న్న స‌మాచారంతో పోలీసులు దాడులు చేశారు. ఈ క్ర‌మంలో మొత్తంగా 31 మందిని అరెస్టు చేసినట్టు డీజీపీ హ‌రీష్ కుమార్ గుప్తా తెలిపారు. వీరిలో 9 మంది సెంట్ర‌ల్ క‌మిటీ స‌భ్యులు ఉన్నార‌ని చెప్పారు.

ఎలా చిక్కారు?

అల్లూరి సీతారామ‌రాజు జిల్లాలో మంగ‌ళ‌వారం ఉద‌యం మావోయిస్టుల‌కు-పోలీసుల‌కు మ‌ధ్య ఎదురు కాల్పులు జ‌రిగాయి. ఈ క్ర‌మంలో ఆరుగురు మావోయిస్టులు మృతి చెందారు. వీరిలో అగ్ర‌నేత హిడ్మా కూడా ఉన్న‌ట్టు అధికారులు తెలిపారు. కాగా.. వీరి నుంచి స్వాధీనం చేసుకున్న కొన్నిపుస్త‌కాల‌ను ప‌రిశీలించారు. వీటిలో విజ‌య‌వాడ‌, కాకినాడ‌, కృష్ణాజిల్లాల్లో మావోయిస్టులు మకాం వేసిన‌ట్టు గుర్తించారు. అక్క‌డి నుంచి స్థానిక అధికారుల‌కు వెంట‌నే స‌మాచారం అంద‌డంతో రంగంలోకిదిగిన ఆక్టోప‌స్ పోలీసులు మావోయిస్టుల‌ను అదుపులోకి తీసుకున్నారు.

అయితే.. విజ‌య‌వాడ‌లోనూ ఎన్ కౌంట‌ర్ జ‌రిగింద‌న్న ప్ర‌చారం జ‌రిగింది. దీనిపై అధికారులు స్ప‌ష్ట‌త ఇవ్వాల్సి ఉంది. విజ‌య‌వాడ‌లోని న్యూ ఆటోన‌గ‌ర్‌లోని ఓ ఇంట్లో గ‌త కొన్ని రోజులుగా మావోయిస్టులు మ‌కాం వేసిన‌ట్టు గుర్తించారు. ఆ ఇంటిపై దాడులు చేసిన పోలీసులు.. 20 మందిని అరెస్టు చేశారు. ఇత‌ర జిల్లాల్లోనూ మ‌రికొంద‌రిని ప‌ట్టుకున్నారు. మొత్తం 31 మందిని అదుపులోకి తీసుకున్నారు. వీరిలో మ‌హిళ‌లు కూడా ఉన్నార‌ని అధికారులు చెప్పారు.