భారతీయ సినీ పరిశ్రమలో ఎంతోమంది స్టార్‌ హీరోలు ఉండొచ్చు.. కానీ 'డార్లింగ్' ప్రభాస్(Prabhas) శైలే వేరు. వెండితెరపై భారీ కటౌట్‌తో ఎంతటి రాజ‌సాన్ని ప్రదర్శిస్తారో, నిజ జీవితంలో ఆతిథ్యం ఇవ్వడంలో అంతటి అమాయకమైన, ఆప్యాయతతో కూడిన ప్రేమను చూపిస్తుంటారు. ఆయనతో ఒక్క సినిమా చేసినా, ఒక్క రోజైనా కలిసి పనిచేసినా సరే.. ఆయన చూపించే అభిమానానికి అభిమాని కాకుండా ఉండలేరు. తాజాగా ‘ఫౌజీ’ సినిమా హీరోయిన్ ఇమాన్వీ విషయంలో మరోసారి ఇది నిజమని నిరూపితమైంది.

ప్రస్తుతం హను రాఘవపూడి(Hanu Raghavapudi) దర్శకత్వంలో తెరకెక్కుతున్న పీరియాడిక్ లవ్ స్టోరీలో ప్రభాస్‌కు జోడీగా ఇమాన్వీ నటిస్తోంది. ఈ సినిమాతోనే ఆమె తెలుగు తెరకు పరిచయం కాబోతోంది. తాజాగా ఇమాన్వీ పుట్టినరోజు సందర్భంగా ప్రభాస్ ఆమెకు ఇచ్చిన సర్ప్రైజ్ ఇప్పుడు సోషల్ మీడియాను షేక్ చేస్తోంది. సెట్స్‌లో ఉండే ప్రతి ఒక్కరినీ తన సొంత మనుషుల్లా చూసుకునే ప్రభాస్, హీరోయిన్ బర్త్‌డే వేడుకను మరువలేని జ్ఞాపకంగా మార్చడానికి ఒక భారీ 'ఫుడ్ ట్రీట్' పంపించారు.

నోరూరించే రకరకాల వంటకాలతో నిండిన ఆ ట్రీట్‌ను చూసి ఇమాన్వీ(Imanvi) ఫిదా అయిపోయారు. ఈ ఆనందాన్ని తట్టుకోలేక సోషల్ మీడియా వేదికగా స్పందిస్తూ.. "ఈ సర్ప్రైజ్‌తో నా మనసు, కడుపు రెండూ నిండిపోయాయి" అని ఎమోషనల్ అవుతూ ప్రభాస్‌కు హృదయపూర్వక ధన్యవాదాలు తెలిపారు. తన తొలి సినిమాతోనే పాన్ ఇండియా స్టార్ సరసన నటించే అవకాశం రావడమే కాకుండా, ఆయన చూపించిన ఈ ప్రత్యేక ఆతిథ్యానికి ఆమె మురిసిపోతున్నారు.

చిత్రీకరణ సెట్స్‌లో తోటి నటీనటులకు, టెక్నీషియన్లకు టేబుల్ నిండా రకరకాల ప్రసిద్ధ వంటకాలతో విందు ఇవ్వడం ప్రభాస్‌కు అలవాటే. గతంలో శృతి హాసన్(Shruti Haasan), అమితాబ్ బచ్చన్, పృథ్వీరాజ్ సుకుమారన్, కృతి సనన్ వంటి దిగ్గజాలు సైతం ప్రభాస్ ఇచ్చే విందు వైభవానికి ఆశ్చర్యపోయి సోషల్ మీడియాలో పోస్టులు పెట్టిన సంగతి తెలిసిందే. ఇప్పుడు కొత్తగా ఇండస్ట్రీలోకి వస్తున్న ఇమాన్వీకి కూడా అదే స్థాయిలో ఆత్మీయతను పంచడంతో "ప్రభాస్ అంటే అంతే మరి.. ఎంత ఎదిగినా ఒదిగి ఉండే నైజం ఆయనది!" అంటూ అభిమానులు ఈ వార్తను తెగ షేర్ చేస్తున్నారు.