చూడ్డానికి ఇంకా కుర్రాడి లాగే కనిపిస్తాడు కానీ.. రామ్ ఇండస్ట్రీలోకి అడుగు పెట్టి రెండు దశాబ్దాలు దాటిపోయింది. ఈ సుదీర్ఘ కెరీర్లో అతను ఎక్కువగా మాస్ మసాలా సినిమాలే చేశాడు. ఇండ‌స్ట్రీలోకి వ‌చ్చే ప్ర‌తి హీరో మాస్ ఇమేజ్ కోసం ప్ర‌య‌త్నించ‌డం కామ‌నే. దాని వ‌ల్లే ఫ్యాన్ ఫాలోయింగ్ పెరుగుతుంది. ఓపెనింగ్స్ కూడా వ‌స్తాయి. రామ్ కూడా అలాంటి ప్ర‌య‌త్న‌మే చేశాడు. కానీ రొటీన్ మాస్ మసాలా సినిమాలు చేసిన‌పుడు పెర్ఫామెన్స్‌కు పెద్ద‌గా స్కోప్ ఉండ‌దు. న‌ట‌న ఒక మూస‌లో సాగిపోతుంది. 

 

రామ్ మాస్ సినిమాల‌న్నీ చూస్తే న‌టనలో పెద్ద‌గా వైవిధ్యం క‌నిపించ‌దు. అత‌ను మాస్ చొక్కా వ‌దిలేసి మామూలు కుర్రాడిగా క‌నిపించిన‌పుడు త‌న‌లోని పెర్ఫామ‌ర్ బయ‌టికి వ‌స్తుంటాడు. నేను శైల‌జ‌, ఉన్న‌ది ఒక‌టే జింద‌గీ, హ‌లో గురూ ప్రేమ కోస‌మే లాంటి చిత్రాల్లో మామూలు కుర్రాడిగా త‌న న‌ట‌న ముచ్చ‌ట‌గొలుపుతుంది. అత‌ను ల‌వ‌బుల్‌గా అనిపిస్తాడు. అమ్మాయిల‌కు రామ్‌ను ఇలా చూడ్డ‌మే ఎక్కువ ఇష్టం. త‌న‌లోని ఈ బ‌లాన్ని రామ్ కూడా మ‌రిచిపోయాడు.

 

కానీ మాస్ మోజులో ప‌డి చాలా ఏళ్లుగా ఇలాంటి పాత్ర‌ల‌కు దూరంగా ఉండిపోయాడు రామ్. దాని వ‌ల్ల అత‌డిలోని న‌టుడు కూడా బ్యాక్ సీట్ తీసుకున్నాడు. కానీ రామ్ లేటెస్ట్ మూవీ ఆంధ్ర కింగ్‌లో మాత్రం త‌న‌లోని పెర్ఫామ‌ర్‌ను చూసే ఛాన్స్ ద‌క్కింది. ఒక స్టార్ హీరోను అభిమానించే స‌గ‌టు అభిమానిగా అత‌డి న‌ట‌న ప్ర‌శంస‌లు అందుకుంటోంది. మాస్ సినిమాల్లోచూసే అతికి ఏమాత్రం స్కోప్ ఇవ్వ‌కుండా.. స‌టిల్‌గా, కుదురుగా న‌టిస్తూ రామ్ అంద‌రి ప్ర‌శంస‌లు అందుకుంటున్నాడు. పాత్ర తాలూకు అమాయ‌క‌త్వాన్ని రామ్ త‌న న‌ట‌న‌లో చూపించిన తీరు అభినంద‌నీయం.

 

అభిమానుల‌కే కాక అన్ని వ‌ర్గాల ప్రేక్ష‌కుల‌కూ అత‌డి న‌ట‌న న‌చ్చుతోంది. ముఖ్యంగా అమ్మాయిలు అయితే చాలా ల‌వ‌బుల్‌గా అనిపిస్తున్న త‌న లుక్స్‌, న‌ట‌న‌కు ఫిదా అయిపోతుంటార‌న‌డంలో సందేహం లేదు. ఎప్పుడూ ఇలాంటి సినిమాలే చేయాల‌ని రామ్‌కు ఎవ్వ‌రూ చెప్ప‌లేరు. మాస్ సినిమాలూ అవ‌స‌ర‌మే. కానీ మ‌ధ్య మ‌ధ్య‌లో అయినా ఇలాంటి క్లాస్ ట‌చ్ ఉన్న‌, వైవిధ్య‌మైన‌, పెర్ఫామెన్స్‌కు స్కోప్ ఉన్న పాత్ర‌లు, సినిమాలు చేస్తే బాగుంటుంద‌నే అభిప్రాయం వ్య‌క్త‌మ‌వుతోంది. ఈ సినిమా క‌మ‌ర్షియ‌ల్ హిట్ అయితే రామ్ ఇలాంటి ప్ర‌య‌త్నాలు మ‌రిన్ని చేస్తాడ‌ని ఆశించ‌వ‌చ్చు.