శ‌ర్వానంద్ చివ‌ర‌గా ఎప్పుడు ఓ పెద్ద‌ హిట్టు కొట్టాడు అని అడిగితే.. త‌న ఫ్యాన్స్ కూడా స‌మాధానం చెప్ప‌డానికి ఇబ్బంది ప‌డ‌తారేమో. 2017లో వ‌చ్చిన మ‌హానుభావుడు త‌ర్వాత అత‌డికి నిఖార్స‌యిన హిట్టు ప‌డ‌లేదు. కొన్నేళ్ల ముందు ఒకే ఒక జీవితం మంచి సినిమా అని టాక్ తెచ్చుకున్న‌ప్ప‌టికీ స‌రిగా ఆడలేదు. ఆ త‌ర్వాత చాలా గ్యాప్ తీసుకుని గ‌త ఏడాది మ‌న‌మే సినిమాతో ప‌ల‌క‌రించాడు శర్వా. అదీ ఫ్లాప్ అయింది. మ‌ళ్లీ గ్యాప్ త‌ప్ప‌లేదు. ఐతే ఈసారి కొంచెం ముందు వెనుక‌గా మూడు సినిమాలు సెట్ చేసుకుని రంగంలోకి దిగిన శ‌ర్వా.. ముందుగా బైక‌ర్‌తో ప్రేక్ష‌కుల‌ను ప‌ల‌క‌రించాల‌నుకున్నాడు. 

ఇంతకుముందు శ‌ర్వాతో ర‌న్ రాజా ర‌న్, ఎక్స్‌ప్రెస్ రాజా లాంటి సూప‌ర్ హిట్లు తీసిన యువి క్రియేష‌న్స్‌లో తెర‌కెక్కిన సినిమా ఇది. లూజ‌ర్ వెబ్ సిరీస్ ద‌ర్శ‌కుడు అభిలాష్ రెడ్డి ఈ చిత్రాన్ని రూపొందించాడు. ఈ చిత్రాన్ని డిసెంబ‌రు 6న రిలీజ్ చేయ‌బోతున్న‌ట్లు టీజ‌ర్ లాంచ్ టైంలో అనౌన్స్ చేసింది టీం. ఆ దిశ‌గా కొన్ని వారాలు ప్ర‌మోష‌న్లు కూడా చేశారు. కానీ ఇటీవ‌ల టీం సైలెంట్ అయింది. అప్పుడే సినిమా వాయిదా ప‌డ‌బోతోంద‌నే సంకేతాలు వ‌చ్చాయి.

ఇప్పుడు ఆ అనుమానాల‌ను నిజం చేస్తూ బైక‌ర్ టీం అధికారిక ప్ర‌క‌ట‌న చేసింది. త‌మ సినిమా డిసెంబ‌రు 6న రాబోద‌ని.. వాయిదా వేస్తున్నామ‌ని ప్ర‌క‌టించింది. ఐతే కొత్త డేట్ గురించి ఏ స‌మాచారం ఇవ్వ‌లేదు. బైక‌ర్ మూవీ కోసం ఎంతో క‌ష్ట‌ప‌డ్డామ‌ని, ఇంకా ప‌డుతున్నామ‌ని.. తెలుగు ప్రేక్ష‌కుల‌కు నెవ‌ర్ బిఫోర్ ఎక్స్‌పీరియ‌న్స్ ఇవ్వ‌డం కోసమే త‌మ ప్ర‌య‌త్న‌మ‌ని.. అందులో భాగంగా సినిమాను ఇంకా మెరుగ్గా తీర్చ‌దిద్ద‌డానికి, విడుద‌ల‌కు సిద్ధం చేయ‌డానికి ఇంకా టైం ప‌డుతుంద‌ని.. అందుకే వాయిదా అని బైక‌ర్ టీం స్టేట్మెంట్ రిలీజ్ చేసింది. 

ఈ చిత్రాన్ని ఐమ్యాక్స్, 4డీఎక్స్‌లోనూ రిలీజ్ చేయ‌బోతున్న‌ట్లు ఈ సంద‌ర్భంగా టీం వెల్ల‌డించింది. ఈ స్టేట్మెంట్‌ను బ‌ట్టి చూస్తే డిసెంబ‌రులో.. త‌ర్వాతి వారాల్లోనూ బైక‌ర్ రిలీజ‌య్యేలా లేదు. సంక్రాంతికి ఎలాగూ ఖాళీ లేదు కాబ‌ట్టి జ‌న‌వ‌రి నెలాఖ‌రులో బైక‌ర్‌ను రిలీజ్ చేసే అవ‌కాశ‌ముంది. డిసెంబ‌రు 5న బాల‌య్య భారీ చిత్రం అఖండ‌-2 రాబోతుండ‌డంతో.. బైక‌ర్ రిలీజ్ డేట్ అనౌన్స్ చేసిన‌పుడే చెప్పిన డేటుకి సినిమా వ‌స్తుందా అనే సందేహాలు క‌లిగాయి. చివ‌రికి ఆ సందేహాలే నిజ‌మ‌య్యాయి.