ఓ పెద్ద సినిమాకు ఒక టైటిల్ పెట్టడం.. ఆ టైటిల్‌ను ఆల్రెడీ రిజిస్టర్ చేసి ఉండడంతో రాయబారాలు నడవడం.. కొన్ని సందర్భాల్లో టైటిల్ ఎవరిదనే విషయంలో వివాదాలు చెలరేగడం చాలా సందర్భాల్లో చూశాం. గుణశేఖర్ దర్శకత్వంలో రవితేజ నటించిన ఓ సినిమాకు ‘కత్తి’ అని టైటిల్ పెట్టుకుంటే.. కళ్యాణ్ రామ్ సైతం తన చిత్రానికి అదే పేరు ఖరారు చేయడం..

 

దీనిపై వివాదం రాజుకోగా ‘కత్తి’ అనే టైటిల్ ముందు కళ్యాణ్ రామ్ తన పేరును జోడించి ముందుగా తన సినిమాను థియేటర్లలోకి దించేయడం గుర్తుండే ఉంటుంది. రవితేజ సినిమాకు ‘నిప్పు’ అనే టైటిట్ పెట్టి రిలీజ్ చేశారు. ఇంకో సందర్భంలో నాగార్జున మూవీ ‘రమ్మీ’ అనే టైటిల్ పెడదామనుకుంటే.. ఆ టైటిల్‌ను రిజిస్టర్ చేయించిన వాళ్లు ఎక్కువ డబ్బులు డిమాండ్ చేయడంతో నాగ్‌కు కోపం వచ్చి తన చిత్రానికి ‘కేడి’ అనే పేరు పెట్టి రిలీజ్ చేశాడు. ఇలాగే ‘ఖలేజా’ అనే టైటిల్ మీద వివాదం చెలరేగితే ఆ పేరు ముందు మహేష్ పేరు పెట్టి విడుదల చేశారు.

 

ఇప్పుడు మహేష్ కొత్త సినిమా విషయంలోనూ ‘ఖలేజా’ స్టైల్ ఫాలో అవుతున్నట్లు సమాచారం. రాజమౌళి దర్శకత్వంలో మహేష్ నటిస్తున్న కొత్త చిత్రానికి ‘వారణాసి’ అనే పేరును ఖరారు చేసిన సంగతి తెలిసిందే. ఐతే ఈ చిత్రానికి ఈ పేరు పెడుతున్నట్లు వార్తలు వచ్చిన సమయంలోనే ఓ చిన్న సినిమాకు ఆ టైటిలే పెట్టి ఫస్ట్ లుక్ లాంచ్ చేశారు. ఆ టైటిల్ మీద హక్కులు తమకే ఉన్నాయంటూ దాని నిర్మాత ప్రకటించుకున్నాడు.

 

దీంతో టైటిల్ కోసం రాజమౌళి అండ్ టీం ఆ వ్యక్తితో సంప్రదింపులు జరుపుతారనుకున్నారు. మరి సంప్రదింపులు జరిగాయో లేదో తెలియదు కానీ.. ఆ నిర్మాత దగ్గర్నుంచి వాళ్లు టైటిలేమీ తీసుకోలేదని తెలుస్తోంది. ఇతర భాషల్లో ‘వారణాసి’ పేరుతోనే సినిమాను రిలీజ్ చేయబోతున్న టీం.. తెలుగులో మాత్రం టైటిల్ ముందు రాజమౌళి అని చేర్చబోతోందట. ప్రచారంలో అందరూ ‘వారణాసి’ అనే చెప్పుకుంటారు కానీ.. పోస్టర్ మీద మాత్రం ‘రాజమౌళి వారణాసి’ అని ఉంటుంది.

 

అధికారికంగా సినిమా పేరు ప్రస్తావించాల్సిన చోట అలాగే చేస్తారు. టెక్నికల్‌గా ఇదొక చిన్న అడ్జస్జ్‌మెంట్ మాత్రమే. పాపులర్ టైటిళ్లను ముందే రిజిస్టర్ చేసి డబ్బులు డిమాండ్ చేసే వాళ్లకు చెక్ పెట్టడానికి మున్ముందు అందరూ ఇదే మార్గాన్ని అనుసరిస్తారేమో.