వందలాది కోట్ల రూపాయిల ఆదాయాన్ని తెచ్చి పెడుతోంది కోకాపేట ప్రభుత్వ భూముల వేలం. వేలం జరిగిన ప్రతిసారీ కొత్త రికార్డుల్ని నమోదు చేస్తున్న వేలం.. తాజాగా మరో రికార్డును నమోదు చేసింది. మొన్నటికి మొన్న జరిగిన వేలంలో ఎకరం రూ.137 కోట్లకు వెళ్లగా.. తాజాగా జరిగిన వేలంలో ఎకరం రూ.151.25 కోట్ల చొప్పున అమ్ముడు కావటం గమనార్హం. ప్లాట్ నెంబరు 15లో ఎకరం రికార్డు స్థాయి ధర పలికింది.ఈ వేలాన్ని హైదరాబాద్ మెట్రో డెవలప్ మెంట్ అథారిటీ నిర్వహించింది.

ప్లాట్ నెంబరు 15లో రూ.151.25 కోట్ల ధర పలకగా.. ప్లాట్ నెంబరు 16లో ఎకరానికి రూ.147.75 కోట్ల ధర పలికింది. రెండో విడతలో 9.06 ఎకరాల భూమికి ప్రభుత్వానికి రూ.1352 కోట్ల భారీ మొత్తం ప్రభుత్వానికి ఆదాయంగా లభించింది. ప్లాట్ నెంబరు 15లో 4.03 ఎకరాలకు రూ.609.55 కోట్లు.. ప్లాట్ నెంబరు 16లో5.03 ఎకరాలకు రూ.743 కోట్లు హెచ్ఎండీకి లభించాయి.

హెచ్ఎండీ పరిధిలోని ఈ భూముల వేలం శుక్రవారంతో ముగిసింది. నిజానికి ఎకరం రూ.150 కోట్ల మార్క్ గత వేలంలోనే నమోదవుతుందని హెచ్ఎండీఏ అధికారులు భావించారు. కానీ.. దానికి దగ్గరగా వచ్చినప్పటికి.. రూ.150 కోట్ల మార్కును టచ్ చేయలేదు. తాజాగా మాత్రం అందుకు భిన్నంగా భారీ మొత్తం లభించింది. తాజా వేలంలో భాగంగా కోకాపేట.. మూసాపేట తదితర ప్రాంతాల్లో మొత్తం 42 ఎకరాల భూముల్ని వేలంలో పెట్టారు.

రెండేళ్లలో భూమల ధరలు ఎంత భారీగా పెరిగాయన్న దానికి గతంలోనమోదైన గణాంకాల్ని చూస్తే ఇట్టే అర్థమవుతుంది. 2023లో జరిగిన వేలంలో ఎకరం రూ.73 కోట్లు పలికితే.. అందుకు భిన్నంగా తాజాగా రెట్టింపు ధర నమోదుకావటం.. రూ.150కోట్ల మార్క్ ను దాటటం గమనార్హం. రెండేళ్ల క్రితంతోపోలిస్తే తాజా ధరలు 87 శాతం పెరిగినట్లుగా అధికారులు చెబుతున్నారు.

ఆసక్తికరమైన అంశం ఏమంటే.. కోకాపేటలో భూముల వేలం జరిగిన ప్రతిసారీ.. ధర అంతకంతకూ పెరుగుతూ వెళుతోంది. రెండు నెలల క్రితం బాచుపల్లి.. మేడ్చల్.. తుర్కయాంజల్ తదితర ప్రాంతాల్లో భూములు వేలం వేసినప్పటికీ.. అక్కడి భూములకు పెద్దగా స్పందన లేదు. అదే సమయంలో కోకాపేటలో మాత్రం భూముల ధరలు భారీగా పెరుగుతున్నాయి.