అంచనాలకు భిన్నంగా కొత్త విషయాల్నివెల్లడించింది తాజాగా విడుదలైన రిపోర్టు. అమెరికాలో విదేశీ విద్యార్థుల్లో అత్యధికంగా భారత్ కు చెందిన విద్యార్థులే ఉన్న విషయం వెల్లడైంది. ట్రంప్ ప్రభుత్వ విధానాలతో పరిస్థితుల్లో మార్పులు వచ్చాయని.. భారత విద్యార్థులు అమెరికాలో ఉన్నత చదువులు చదివేందుకు అంత ఆసక్తిని చూపటం లేదన్న మాటలో నిజం లేదన్న విషయం తాజా రిపోర్టు స్పష్టం చేసింది.

ఆసక్తికరమైన మరో అంశం ఏమంటే గత ఏడాది కంటే ఎక్కువగా భారత విద్యార్థులు ఈ ఏడాది ఉన్నత చదువు కోసం అమెరికాకు వచ్చినట్లుగా తేలింది. గత విద్యా సంవత్సరం 3.30 లక్షల మంది విద్యార్థులతో తొలి స్థానంలో నిలవగా.. ఈ విద్యా సంవత్సరంలో (2024-25) ఆ సంఖ్య 3.62 లక్షలకు పెరిగినట్లుగా పేర్కొన్నారు. గత ఏడాది ముందు వరకు అమెరికాకు వచ్చే విదేశీ విద్యార్థుల్లో చైనా విద్యార్థులు ముందుండేవారు.

2023-24 నుంచి భారత విద్యార్థులు పెరుగుతుంటే.. మరోవైపు చైనా విద్యార్థుల సంఖ్య తగ్గుతోంది. గత ఏడాది కంటే పది శాతం ఎక్కువగా భారత విద్యార్థులు అమెరికాకు వస్తే.. చైనా విద్యార్థులు మాత్రం 4 శాతం తగ్గిన విషయాన్ని ఓపెన్ డోర్స్ రిపోర్టు 2025లో వెల్లడైంది. తాజా గణాంకాల్ని 2024 ఆగస్టు నుంచి 2025 మే వరకు పరిగణలోకి తీసుకున్నారు. అమెరికాలో రెండు విద్యా సీజన్ల ఉండటం తెలిసిందే. ఆగస్టులో ఆడ్మిషన్లను ఫాల్ సీజన్ అని.. మే ను సమ్మర్ సీజన్ అని పేర్కొనటం తెలిసిందే.

2024 ఫాల్ సీజన్ నాటికి అమెరికా అధ్యక్షుడు ట్రంప్ ఎన్నిక కాలేదు. ట్రంప్ ప్రభుత్వం కొలువు తీరిన తర్వాత తీసుకున్న నిర్ణయాలతో అనిశ్చితి వాతావరణం చోటు చేసుకుంది. దీంతో 2025 ఫాల్ సీజన్ లోనే ప్రభావం పడింది. దీంతో ఎంత మంది విద్యార్థులు తగ్గారన్న విషయం వచ్చే ఏడాది నవంబరులో విడుదల చేసే రిపోర్టు తెలియజేస్తుందని చెప్పాలి. ఇప్పటివరకు వస్తున్న అంచనాల ప్రకారం చూస్తే.. ఫాల్ సీజన్ లో విదేశీ విద్యార్థులు 17 శాతం తగ్గారని.. అందులో భారత విద్యార్థుల వాటా 40 శాతం వరకు తగ్గి ఉంటారని భావిస్తున్నారు.

అమెరికాలో ఉన్నత విద్య కోసం వచ్చే విదేశీ విద్యార్థుల్లో 57 శాతం మంది సైన్స్.. టెక్నాలజీ.. ఇంజినీరింగ్.. మ్యాథ్స్ కోర్సులుచదువుతున్నట్లుగా తేలింది. మొత్తం భారత విద్యార్థుల్లో 43.4 శాతం మంది కంప్యూటర్ సైన్స్.. 22.8 శాతం ఇంజినీరింగ్.. 11.30 శాతం బిజినెస్ మేనేజ్ మెంట్ కోర్సులు చదువుతున్నట్లుగా రిపోర్టు వెల్లడించింది.