దేశ వ్యాప్తంగా సంచలనంగా మారిన ఐబొమ్మ నిర్వాహకుడు రవిని రెండోసారి కస్టడీకి తీసుకొని పోలీసులు విచారిస్తున్న సంగతి తెలిసిందే. మొదటి దఫా కస్టడీలోకి తీసుకున్న సమయంలో మాట్లాడిన మాటలకు.. రెండోసారి కస్టడీలోకి తీసుకొని విచారిస్తున్న సమయంలో అతడి మాటలో తేడా స్పష్టమని చెబుతున్నారు. తాజా విచారణలో రవి వినియోగించిన సాంకేతికత.. దేశ, విదేశాల్లో అతని ఏజెంట్లు.. ఉద్యోగుల వివరాల్ని సేకరిస్తున్నారు.

పైరసీ గుట్టు బయటపడినా.. విదేశీ పౌరసత్వంతో తప్పించుకోవచ్చని తాను భావించినట్లుగా రవి వెల్లడించారు. అదే ధీమా తనకుండేదని చెప్పినట్లు తెలిసింది. ఆరేళ్లుగా తననెవరూ గుర్తించలేదని..ఈ ధీమాతో తన నెట్ వర్కును మరింత విస్తరించినట్లుగా చెప్పిన రవి.. తనను ఎవరూ పట్టుకోలేరని భావించినట్లు చెప్పారు.

డబ్బులు సంపాదించాలన్న ఉద్దేశంతోనే తాను ఈ పని చేసినట్లు చెప్పిన రవి.. తాను చేస్తున్నది తప్పు అని తాను గుర్తించలేదన్నారు. తాజాగా పోలీసుల ఎదుట పశ్చాత్తాపం ప్రదర్శించిన అతను.. తాను జైలు నుంచి విడుదలైన తర్వాత పైరసీ జోలికి వెళ్లనని.. పూర్తిగా మారిపోతానన్న మాట చెప్పినట్లు తెలుస్తోంది. ఈ సందర్భంగా పోలీసులను ప్రాధేయపడినట్లుగా తెలుస్తోంది.

మొదటిసారి కస్టడీకి తీసుకున్నప్పుడు రవి వ్యవహార శైలికి.. ఇప్పటికి చూస్తే మార్పు కొట్టొచ్చినట్లుగా కనిపిస్తోందని తెలుస్తోంది. మొదటిసారి కస్టడీలో భాగంగా ఐదు రోజుల విచారణను ఎదుర్కొన్న రవి.. తాజాగా మరో మూడు రోజులు పోలీసుల కస్టడీలోకి తీసుకొని విచారిస్తున్న సంగతి తెలిసిందే. మొదటిసారి కస్టడీకి తీసుకొని విచారించిన సమయంలో అడిగిన ప్రశ్నల్లో కొన్నింటికి మాత్రమే బదులిచ్చే వాడని.. కొన్ని అంశాల్ని మర్చిపోయినట్లుగా చెప్పటం.. కొన్ని విషయాల్ని వివరంగా చెప్పిన రవి మాటలో ధీమా కనిపించేదని.. ఇప్పుడు మాత్రం అదేమీ లేదన్నట్లుగా పోలీసుల మాటలు ఉన్నాయి.