రోటీన్ కు భిన్నమైన అనుభవాలు.. అనుభూతుల కోసం జనాలు ఎంతలా తపిస్తున్నారో ప్రత్యేకంగా చెప్పాల్సిన అవసరం లేదు. భయం పుట్టించే కొన్నిథీమ్ పార్కులకు డబ్బులు పెట్టి మరీ వెళ్లి వణికిపోయే అనుభూతిని సొంతం చేసుకోవటం తెలిసిందే. ఇప్పుడు చెప్పే ఉదంతం ఆ కోవకు చెందినది కాకున్నా... అదిరే అనుభూతుల్ని పంచే ఆకాశ రెస్టారెంట్. తెలుగు రాష్ట్రాల్లోనూ ఈ తరహా రెస్టారెంట్ హైదరాబాద్ లో కొంతకాలం నడిచింది.

ఆ తర్వాతి కాలంలో కమర్షియల్ గా వర్కువుట్ కాకపోవటంతో దాన్ని తీసేశారు. ఆ విషయాన్ని పక్కన పెడితే.. ఈ తరహా రెస్టారెంట్ లో చక్కటి అనుభూతి కోసం వెళ్లిన ఒక ఫ్యామిలీ భయంతో ఉక్కిరిబిక్కిరి కావటమే కాదు.. ఆ గండం నుంచి క్షేమంగా బయటపడితే అదే పదివేలు అనుకున్న పరిస్థితి. ఇంతకూ ఈ ఉదంతం ఎక్కడ చోటు చేసుకుంది? అసలేం జరిగింది? ఆ సమయంలో ఎలాంటి పరిస్థితులు ఎదురయ్యాయి? లాంటి అంశాల్లోకి వెళితే..

కేరళలోని ఇడుక్కి జిల్లాలో ఈ ఆకాశ రెస్టారెంట్ ఉంది. భూమి నుంచి 150 అడుగుల ఎత్తులో క్రేన్ ను వేలాడదీసి.. దాన్ని బుక్ చేసుకున్న అతిధిగా పసందైన భోజనం పెట్టి పంపుతారు. ఎప్పటిలానే పైకి వెళ్లిన తర్వాత క్రేన్ లో చోటు చేసుకున్న సాంకేతిక సమస్యతో మధ్యలో ఆగిపోయింది. దీంతో.. పైన ఉన్న వారు కిందకు రాలేని దుస్థితి. దీంతో.. అందులో చిక్కుకుపోయిన వారు  భయంతో వణికిపోయిన పరిస్థితి.

గాల్లో మధ్యలో చిక్కుకుపోయిన కుటుంబంలో ఇద్దరు చిన్నారులతో పాటు తల్లిదండ్రులు తీవ్ర భయాందోళనకు గురయ్యారు. దాదాపు ఈ హైడ్రామా సాగుతున్న వేళలోనే పోలీసులు.. అగ్నిమాపక సిబ్బంది సాయంతో ఎట్టకేలకు వారు క్షేమంగా బయటపడ్డారు. అయితే.. ఈ రెస్టారెంట్ లో చోటు చేసుకున్న సాంకేతిక సమస్యలపై అధికారులకు సమాచారం ఇవ్వని తీరును తప్పు పడుతున్నారు. ఏమైనా థ్రిల్ కోసం వెళ్లిన ఆకాశ రెస్టారెంట్ జీవితంలో మర్చిపోలేని దడను మిగిల్చిందని చెప్పక తప్పదు.