దక్షిణాది సినీ పరిశ్రమలో తన నటనా ప్రతిభ, నృత్య నైపుణ్యాలతో ఒక యుగాన్ని వెలిగించిన భానుప్రియ గురించి ప‌రిచ‌యాలు అవ‌స‌రం లేదు. భావోద్వేగ పాత్రలు, డ్యాన్స్ ఆధారిత రోల్స్, సాఫ్ట్ రొమాంటిక్ సీన్స్ ఇలా ఏది ఇచ్చినా పర్ఫెక్ట్‌గా క్యారీ చేస్తూ కోట్లాది ప్రేక్ష‌కుల హృద‌యాల్లో స్థానం సంపాదించుకున్న భానుప్రియ‌.. కేవ‌లం ఒకే భాష‌కే ప‌రిమితం కాలేదు. తెలుగుతో పాటు త‌మిళ్‌, మ‌ల‌యాళం, క‌న్న‌డ‌, హిందీ స‌హా అనేక భాష‌ల్లో న‌టించి అపూర్వ‌మైన గుర్తింపు సంపాదించుకున్నారు.

ఇంతటి ప్రతిభకు నిలువెత్తు రూపమైన భానుప్రియ ప్రస్తుతం తీవ్రమైన ఆరోగ్య సమస్యలతో పోరాడుతుండటం అభిమానులను తీవ్ర ఆందోళనకు గురిచేస్తోంది. ఇటీవల ఒక ఇంటర్వ్యూలో భానుప్రియ మాట్లాడుతూ.. గత కొన్ని నెలలుగా తన జ్ఞాపకశక్తి బలహీనమవుతోందని, నేర్చుకున్న విష‌యాలు, డైలాగ్‌లు కూడా మరచిపోతున్నానని ఆవేదన వ్యక్తం చేసింది. చిన్నప్పటి నుంచి తన ప్రాణంగా భావించిన నృత్యానికి కూడా ఇప్పుడు దూరమవుతున్నానని, ఇంట్లో ప్రాక్టీస్‌ చేయడం కూడా మానేశానని చెప్పింది.

అంతేకాదు, తన మాజీ భర్త ఆదర్శ్ కౌశల్ 2018లో గుండెపోటుతో అకస్మాత్తుగా మ‌ర‌ణించ‌డం తనను తీవ్రంగా కుంగదీసిందని.. ఆ దుర్ఘటనే తన ఆరోగ్యంపై భారీ ప్రభావం చూపిందని, ఆ మానసిక క్షోభ‌ నుంచి బయటపడడం చాలా కష్టంగా మారిపోయిందని భానుప్రియ కన్నీరుమున్నీరు అయ్యారు. కాగా, ఇండస్ట్రీలో ఒకప్పుడు మిలమిల మెరిసిన ఈ డాన్స్‌ క్వీన్‌ ఇప్పుడు ఇలా జ్ఞాపకశక్తి లోపంతో బాధ‌ప‌డ‌టం, ప్రియమైన కళను చేపట్టలేకపోవడం అభిమానుల‌ను క‌ల‌చివేస్తుంది. సోషల్ మీడియాలో ఆమె ఆరోగ్యం పై అనేక కామెంట్లు వెల్లువెత్తుతున్నాయి. తన కఠోర శ్రమతో తెలుగు సినిమాకు ఎన్నో అమూల్యమైన పాత్రలు అందించిన భానుప్రియ మళ్లీ ఆరోగ్యంగా నిలబడాలని, ఆమె చిరునవ్వు తిరిగి చూడాలని అభిమానులంతా కోరుకుంటున్నారు.