ప్రపంచ దిగ్గజ విమానాల తయారీ సంస్థ అయిన ఎయిర్ బస్ కు చెందిన పాపులర్ మోడల్ ఏ320కు సూరీడి షాక్ తగిలింది. ప్రపంచవ్యాప్తంగా ఈ మోడల్ కు చెందిన విమానాలు 8100 ఉన్నాయి. ఇందులో దాదాపు 6 వేల వరకున్న విమానాలకు సాఫ్ట్ వేర్ సమస్యలు ఎదురయ్యాయి. దీనికి కారణం సోలార్ రేడియేషన్ దాడి చేయటంగా చెబుతున్నారు. దీంతో ఎదురైన సాంకేతిక సమస్యను చక్కదిద్దేందుకు యుద్ధ ప్రాతిపదిక పనులు చేపట్టారు. దీంతో ఎయిర్ బస్ ఏ320 మోడల్ విమానాల ప్రయాణాల్లో ఇబ్బందులు ఎదురయ్యాయి.

 

మన దేశంలోని విమానయాన సంస్థలు అత్యధికంగా ఎయిర్ బస్ ఏ320 విమానాల్ని వినియోగిస్తున్నాయి. ప్రపంచ వ్యాప్తంగా ఈ మోడల్ విమానాల అమ్మకాలు ఎక్కువ. మన దేశంలో ఈ మోడల్ విమానాలు మొత్తంగా 338 వరకు ఉన్నాయి. ఇండిగో.. ఎయిరిండియా.. ఎయిర్ ఇండియా ఎక్స్ ప్రెస్ సంస్థలు ఈ మోడల్ విమానాల్ని వినియోగిస్తున్నాయి. సోలార్ రేడియేషన్ ద్వారా ఎదురవుతున్న సాంకేతిక సమస్యల్ని చక్కదిద్దేందుకు వీలుగా పలు విమానాల్లో సాఫ్ట్ వేర్ అప్డేషన్.. కొన్ని విమానాల్లో హార్డ్ వేర్ ను అప్డేట్ చేయాల్సి వచ్చింది.

 

అసలీ సమస్యను ఎలా గుర్తించారంటే.. గత నెల 30న మెక్సికో నుంచి అమెరికాలోని న్యూజెర్సీకి బయలుదేరిన జెట్ బ్లూ ఎయిర్ బస్ ఏ320 విమానంలో టెక్నికల్ ఇష్యూ తెర మీదకు వచ్చింది. ఈ విమానం ప్రయాణిస్తున్న ఎత్తు హటాత్తుగా 100 అడుగుల మేర కిందకు వచ్చింది.వేగంగా చోటు చేసుకున్న ఈ పరిణామంతో పదిహేను మంది ప్రయాణికులు గాయపడ్డారు. దీంతో అప్రమత్తమైన పైలట్లు విమానాన్ని దారి మళ్లించారు. వెంటనే అమెరికాలోని ఫ్లోరిడా తీరంలోనితంపా ఎయిర్ పోర్టులో విమానాన్ని ల్యాండ్ చేశారు.

 

సోలార్ రేడియేషన్ కారణంగా విమానంలోని ఎలివేటర్.. ఎలిరాన్ కంప్యూటర్ వ్యవస్థలో వచ్చిన మార్పుల్ని గుర్తించి.. అందుకు అవసరమైన పరిష్కారాన్ని సిద్ధం చేశారు. ఇదే సమస్యను ప్రపంచ వ్యాప్తంగా ఉన్న ఏ320 మోడల్ విమానాలకు ఎదురయ్యే వీలుందని భావించి.. తక్షణమే సాఫ్ట్ వేర్ అప్డేట్ చేసుకోవాలని ఎయిర్ బస్ సంస్థ శుక్రవారం తమ విమానాల్ని వినియోగించే విమానయాన సంస్థలకు మార్గదర్శకాలు జారీ చేసింది.

 

దీంతో విమానయాన సంస్థలు సాఫ్ట్ వేర్ అప్డేట్ మీద ఫోకస్ చేశాయి. దీంతో.. విమాన రాకపోకల్లో అంతరాయం చోటు చేసుకుంది. 60 నుంచి 90 నిమిషాల పాటు ఆలస్యంగా నడిచాయి. భారత్ లోని 338 ఏ320 మోడల్ విమానాల్లో శనివారం రాత్రికి 270 విమానాల్లో సాఫ్ట్ వేర్ అప్డేట్ పూర్తైంది. ప్రపంచ వ్యాప్తంగా ఉన్న 8100 విమానాల్లో 6వేల విమానాలకు సాఫ్ట్ వేర్ అప్డేట్ అవసరమని గుర్తించి.. అందుకు తగిన ఏర్పాట్లు పూర్తి చేశారు. ఈ కారణంగా ప్రపంచ వ్యాప్తంగా ఎయిర్ బస్ ఏ320 విమాన రాకపోకల్లో అంతరాయం చోటు చేసుకుంది.