తెలంగాణ మాజీ ముఖ్య‌మంత్రి, బీఆర్ ఎస్ పార్టీ అధినేత కేసీఆర్ 2023 ఎన్నిక‌ల త‌ర్వాత‌.. ప్ర‌జ‌ల మ‌ధ్య‌కు పెద్ద‌గా రావ‌డం లేద‌న్న విష‌యం తెలిసిందే. కేవ‌లం మూడు సార్లు మాత్రమే ఆయ‌న బ‌య‌ట‌కు వ‌చ్చారు. ఒక‌సారి అసెంబ్లీ బ‌డ్జెట్ స‌మావేశా ల‌కు.. మ‌రోసారి న‌ల్ల‌గొండ‌లో పార్టీ కార్య‌క్ర‌మానికి, త‌ర్వాత‌.. కాళేశ్వ‌రం క‌మిష‌న్ ముందు హాజ‌ర‌య్యేందుకు మాత్ర‌మే ఆయ‌న ప‌రిమితమ‌య్యారు. అయితే.. త‌ర‌చుగా మాత్రం కేసీఆర్ వ‌స్తున్నార‌న్న చ‌ర్చ బీఆర్ ఎస్ వ‌ర్గాల్లో వినిపిస్తూనే ఉంది.

 

ఇక‌, కాంగ్రెస్ పార్టీ నాయ‌కులు కేసీఆర్‌ను టార్గెట్ చేస్తూనే ఉన్నారు. ముఖ్యంగా సీఎం రేవంత్ రెడ్డి కేసీఆర్‌పై విమ‌ర్శ‌లు గుప్పి స్తున్న విష‌యం తెలిసిందే. అయితే.. తాజాగా కేసీఆర్ ఎందుకు రావ‌డంలేద‌న్న‌.. చ‌ర్చ‌జోరుగా సాగుతున్న నేప‌థ్యంలో ఆయ‌న కుమారుడు, బీఆర్ ఎస్ పార్టీ వ‌ర్కింగ్ ప్రెసిడెంట్ కేటీఆర్ స్పందించారు. స‌మ‌యం కోసం కేసీఆర్ వేచి చూస్తున్నార‌ని తెలిపారు. టైమ్ చూసుకుని వ‌స్తార‌ని కేటీఆర్ చెప్పారు. ``కేసీఆర్ ఎప్పుడు వ‌చ్చినా స‌మ‌యం చూసుకుని వ‌స్తారు. ఎప్పుడు పేలాలో.. ఎప్పుడు బ‌య‌ట‌కు రావాలో కేసీఆర్‌కు బాగా తెలుసు`` అని కేటీఆర్ వ్యాఖ్యానించారు.

 

తాజాగా తెలంగాణ ఉద్య‌మం కోసం కేసీఆర్ నిరాహార దీక్ష చేప‌ట్టిన రోజును పుర‌స్క‌రించుకుని బీఆర్ ఎస్ పార్టీ నాయ‌కత్వంలో `దీక్షాదివ‌స్‌`ను చేప‌ట్టారు. ఈ కార్య‌క్ర‌మంలో పాల్గొన్న కేటీఆర్‌.. సీఎం రేవంత్ రెడ్డి .. కేసీఆర్‌పై చేస్తున్న విమ‌ర్శ‌ల‌పై స్పందించా రు. ``కేసీఆర్ క‌నిపించ‌డం లేద‌ని అంటారు.. ఆయ‌న మాట వినిపించ‌డం లేద‌ని అంటారు. కానీ, చిత్ర‌మేంటో తెలుసా? కేసీఆర్ మౌనంగా ఉన్నా సంచ‌ల‌న‌మే.`` అని వ్యాఖ్యానించారు. కేసీఆర్ ప‌ని అయిపోయింద‌న్న ప్ర‌తిసారీ.. ఆయ‌న ఉవ్వెత్తున ఎగిసిప‌డ్డార‌ని ఈ సంద‌ర్భంగా గ‌తాన్ని గుర్తు చేశారు.

 

కేసీఆర్‌ను ఎవ‌రూ మ‌రిచిపోలేద‌న్న కేటీఆర్‌..చివ‌ర‌కు ప్ర‌భుత్వం(కాంగ్రెస్‌)లో ఉన్న‌వారు కూడా ఆయ‌న‌ను త‌లుచుకోని రోజు లేద‌ని అన్నారు. సీఎం రేవంత్ రెడ్డి ఏదో ఒక రూపంలో కేసీఆర్‌ను త‌లుస్తూనే ఉన్నాడ‌ని చెప్పారు. ``ఎక్క‌డ మైకు పుచ్చుకు న్నా.. కేసీఆర్ నామ‌స్మ‌ర‌ణ ఉండాల్సిందే. మ‌రిచిపోయిందెవ‌ళ్లు?`` అని ప్ర‌శ్నించారు. స‌మ‌యం కోసం కేసీఆర్ వెయిట్ చేస్తున్నా ర‌ని.. త్వ‌ర‌లోనే ఆయ‌న బ‌య‌ట‌కు వ‌స్తార‌ని తెలిపారు. కాగా.. మ‌రో రెండు సంవ‌త్స‌రాల వ‌ర‌కు.. కేసీఆర్ బ‌య‌ట‌కు వ‌చ్చే ప‌రిస్థితి లేద‌ని రాజ‌కీయ వ‌ర్గాలు చెబుతున్నాయి.