టాలీవుడ్ యంగ్ అండ్ డైనమిక్ హీరో, తన భారీ యాక్షన్ చిత్రాలతో మాస్ ఆడియెన్స్‌లో ప్రత్యేక గుర్తింపు తెచ్చుకున్న బెల్లంకొండ సాయి శ్రీనివాస్ త్వరలో బ్యాచిలర్ లైఫ్‌కు గుడ్ బై చెప్పబోతున్నారు. గత కొంతకాలం నుండి ఈ క్రేజీ హీరో పెళ్లి గురించి ఫిల్మ్ నగర్ సర్కిల్స్‌లో రకరకాల వార్తలు వినిపిస్తుండగా, తాజాగా ఆ వార్తలకు బలం చేకూరుస్తూ ఆయన నిశ్చితార్థానికి ముహూర్తం ఖరారైనట్లు తెలుస్తోంది.

విశ్వసనీయ వర్గాల సమాచారం ప్రకారం.. బెల్లంకొండ శ్రీ‌నివాస్ గత కొన్నేళ్లుగా ఒక యువతితో ప్రేమలో ఉన్నారని తెలుస్తోంది. వీరు కేవలం స్నేహితులే కాకుండా, ఒకరినొకరు పూర్తిగా అర్థం చేసుకున్న తర్వాతే వివాహ బంధంలోకి అడుగుపెట్టాలని నిర్ణయించుకున్నారట. ఈ క్రమంలోనే మార్చి 8న అత్యంత సన్నిహితులు మరియు కుటుంబ సభ్యుల సమక్షంలో ఈ జంట నిశ్చితార్థ వేడుక జరగనుందని టాక్.

సాధారణంగా సెలబ్రిటీల పెళ్లి అనగానే వధువు ఎవరనే దానిపై సర్వత్రా ఆసక్తి నెలకొంటుంది. అయితే, బెల్లంకొండ కుటుంబం ఈ విషయాన్ని చాలా ప్రైవేట్‌గా ఉంచుతోంది. ఆమె సినిమా పరిశ్రమకు చెందిన వ్యక్తి కాదని, శ్రీనివాస్‌కు ఎప్పటి నుంచో తెలిసిన స్నేహితురాలని సమాచారం. ఇరు కుటుంబాల పెద్దలు కూర్చొని మాట్లాడుకున్న తర్వాతే పచ్చ జెండా ఊపడంతో, ఇప్పుడు పెళ్లి పనులకు శ్రీకారం చుట్టారు. ప్రస్తుతం తన తదుపరి ప్రాజెక్టులతో బిజీగా ఉన్న శ్రీనివాస్, తన జీవితంలోనూ కొత్త అధ్యాయాన్ని ప్రారంభించబోతుండటంతో అభిమానులు ఫుల్ ఖుషీ అయిపోతున్నారు. ఇక త్వరలోనే వధువు వివరాలతో పాటు, వివాహ వేడుకకు సంబంధించిన పూర్తి వివరాలను బెల్లంకొండ కుటుంబం అధికారికంగా ప్రకటించే అవకాశం ఉంది.