సాధారణంగా సినిమా ఇండస్ట్రీలో రిచెస్ట్ పర్సన్ అంటే మనకు వెంటనే షారుఖ్ ఖాన్ లేదా అమితాబ్ బచ్చన్ వంటి స్టార్ హీరోల పేర్లే గుర్తొస్తాయి. కానీ, మన వెండితెర వెనుక ఒక రియల్ కుబేరుడు ఉన్నారన్న విషయం మీకు తెలుసా? ఆయన సంపాదన ముందు బాలీవుడ్ బాద్‌షా ఆస్తులు కూడా తక్కువేనంటే నమ్మగలరా? ఫోర్బ్స్ 2026 తాజా జాబితా ప్రకారం, భారతీయ చలనచిత్ర పరిశ్రమలో అత్యంత సంపన్న నిర్మాతగా కళానిధి మారన్ మరోసారి తన ఆధిపత్యాన్ని చాటుకున్నారు.

కళానిధి మారన్ కేవలం ఒక నిర్మాత మాత్రమే కాదు, ఆయనొక మీడియా మొఘల్. ఫోర్బ్స్ నివేదిక ప్రకారం ఆయన నికర ఆస్తి విలువ అక్షరాలా రూ. 26,000 కోట్లు (2.8 బిలియన్ డాలర్లు). ఈ అంకె వింటేనే సామాన్యులకే కాదు, సెలబ్రిటీలకు సైతం మైండ్ బ్లాక్ అవ్వడం ఖాయం. బాలీవుడ్ దిగ్గజ నిర్మాతలు కరణ్ జోహార్, ఆదిత్య చోప్రాలతో పాటు షారుఖ్ ఖాన్ ఆస్తులన్నీ కలిపినా కళానిధి మారన్ సంపదలో సగానికి కూడా సరిపోవంటే ఆయన రేంజ్ ఏంటో అర్థం చేసుకోవచ్చు.

ఈ భారీ సంపద వెనుక ఆయన దశాబ్దాల కష్టం ఉంది. 1993లో కేవలం ఒక ఛానెల్‌తో మొదలైన `సన్ నెట్‌వర్క్` ప్రస్థానం.. నేడు 37 ఛానెళ్లతో దేశంలోని 14 కోట్ల ఇళ్లకు చేరువైంది. అటు టీవీ రంగంలోనే కాకుండా, `సన్ పిక్చర్స్` బ్యానర్‌పై రజనీకాంత్ వంటి అగ్ర హీరోలతో `రోబో`, `జైలర్` వంటి బిగ్గెస్ట్ బ్లాక్ బస్టర్లను అందిస్తూ వెండితెరను కూడా శాసిస్తున్నారు. ప్రస్తుతం అల్లు అర్జున్ వంటి పాన్ ఇండియా స్టార్లతో కూడా ఆయన భారీ ప్రాజెక్టులు ప్లాన్ చేస్తున్నారు.

సినిమాలు, టీవీ నెట్‌వర్క్ మాత్రమే కాదు.. క్రీడా రంగంలోనూ మారన్ ముద్ర బలంగా ఉంది. ఐపీఎల్ జట్టు సన్‌రైజర్స్ హైదరాబాద్ (SRH) తో పాటు విదేశీ క్రికెట్ లీగ్‌లలోనూ ఆయనకు జట్లు ఉన్నాయి. ఒక చిన్న పత్రికా ప్రచురణ సంస్థ నుంచి ప్రారంభమై, నేడు వేల కోట్ల సామ్రాజ్యాన్ని నిర్మించిన కళానిధి మారన్ ప్రయాణం నిజంగా ఎందరికో స్ఫూర్తిదాయకం. వరుసగా నాలుగో ఏడాది కూడా రిచెస్ట్ ప్రొడ్యూసర్‌గా నిలిచి ఆయన తన రికార్డును తానే తిరగరాశారు.