టాలీవుడ్ బాక్సాఫీస్ దగ్గర 'డార్లింగ్'(Darling) ప్రభంజనం సృష్టిస్తోంది. సుమారు 16 ఏళ్ల క్రితం విడుదలైన ఈ చిత్రం, ఇప్పుడు 4K వెర్షన్‌లో థియేటర్లలోకి వచ్చి ప్రస్తుత స్టార్ హీరోల సినిమాలకు పోటీనిస్తోంది. ప్రభాస్ క్రేజ్ ముందు పాత, కొత్త అనే తేడా లేదని ఈ వసూళ్లు నిరూపిస్తున్నాయి.

రెబల్ స్టార్ ప్రభాస్, క్యూట్ హీరోయిన్ కాజల్ అగర్వాల్(Kajal Aggarwal) జంటగా నటించిన 'డార్లింగ్' సినిమా అంటే తెలుగు ప్రేక్షకులకు ఒక ఎమోషన్. 2010లో క్లాసిక్ హిట్‌గా నిలిచిన ఈ రొమాంటిక్ కామెడీ, ఇప్పుడు 4K క్వాలిటీతో మళ్లీ థియేటర్లలోకి రాగా.. అభిమానుల హంగామా అంబరాన్ని తాకుతోంది. విడుదలైన మొదటి రోజే సుమారు రూ. 7.59 కోట్ల గ్రాస్‌తో టాలీవుడ్ రీ-రిలీజ్ చరిత్రలోనే రెండో అతిపెద్ద ఓపెనింగ్ సాధించిన చిత్రంగా రికార్డు సృష్టించింది.

కేవలం మూడు రోజుల వ్యవధిలోనే ఈ సినిమా ప్రపంచవ్యాప్తంగా రూ. 10.44 కోట్ల గ్రాస్ వసూలు చేసి ట్రేడ్ వర్గాలను సైతం విస్మయానికి గురిచేసింది. సాధారణంగా రీ-రిలీజ్ సినిమాలకు వీకెండ్ తర్వాత వసూళ్లు తగ్గుతాయి, కానీ 'డార్లింగ్' విషయంలో మాత్రం పరిస్థితి భిన్నంగా ఉంది. ఓవర్సీస్‌లోనూ, తెలుగు రాష్ట్రాల్లోనూ హౌస్‌ఫుల్ బోర్డులు దర్శనమిస్తుండటం ప్రభాస్(Prabhas) మాస్ అండ్ క్లాస్ ఇమేజ్‌కు నిదర్శనం.

దర్శకుడు ఎ. కరుణాకరన్(A.Karunakaran) అద్భుతమైన టేకింగ్, జీవీ ప్రకాశ్ అందించిన క్లాసిక్ మెలోడీలు ఈ సినిమాను ఎప్పటికీ ఫ్రెష్‌గా ఉంచుతున్నాయి. శ్రీ వెంకటేశ్వర సినీ చిత్ర బ్యానర్‌పై బి.వి.ఎస్.ఎన్ ప్రసాద్ నిర్మించిన ఈ చిత్రాన్ని ఇప్పుడు కేదార్ ఫిల్మ్స్ పంపిణీ చేయగా, ఫ్యాన్స్ కటౌట్లు, బాణాసంచాతో థియేటర్లను పండుగ వేదికలుగా మార్చేశారు. ఈ కలెక్షన్ల జోరు చూస్తుంటే లాంగ్ రన్ లో 'డార్లింగ్' మరిన్ని రికార్డులను తిరగరాయడం ఖాయంగా కనిపిస్తోంది.