టాలీవుడ్(Tollywood) బుట్టబొమ్మ పూజా హెగ్డే గత కొంతకాలంగా వెండితెరపై ఆశించిన స్థాయిలో మెరవలేకపోతోంది. 'అల వైకుంఠపురములో' వంటి ఇండస్ట్రీ హిట్ తర్వాత ఆమె ఖాతాలో సరైన సక్సెస్ పడలేదు. అయితే, సినిమాల రిజల్ట్ ఎలా ఉన్నా.. ప్రస్తుతం సోషల్ మీడియాలో మాత్రం పూజా పేరు మార్మోగిపోతోంది. దానికి కారణం ఆమె ప్రొఫెషనల్ లైఫ్ కాదు, పర్సనల్ లైఫ్! ఈ పొడుగుకాళ్ల సుందరి ఒక బాలీవుడ్ యువ హీరోతో పీకల్లోతు ప్రేమలో మునిగి తేలుతోందనే వార్త ఫిలిం నగర్ వర్గాల్లో హాట్ టాపిక్ గా మారింది.

పూజా హెగ్డే(Pooja Hegde) ఎవరితోనైతే డేటింగ్ చేస్తోందని ప్రచారం జరుగుతుందో, అతను మరెవరో కాదు.. బాలీవుడ్ యంగ్ హీరో రోహన్ మెహ్రా. వీరిద్దరూ కలిసి ఇప్పటివరకు ఒక్క సినిమాలో కూడా నటించలేదు. అయినప్పటికీ వీరి మధ్య చిగురించిన స్నేహం కాస్తా ప్రేమగా మారిందని బాలీవుడ్ మీడియా కోడై కూస్తోంది. తాజాగా వీరిద్దరూ ముంబై వీధుల్లో చెట్టాపట్టాల్ వేసుకుని తిరుగుతుండటం ఈ రూమర్లకు మరింత బలాన్ని చేకూర్చింది.

రోహన్ మెహ్రా(Rohan Mehra)కు బలమైన సినిమా నేపథ్యం ఉంది. ఆయన దివంగత బాలీవుడ్ దిగ్గజ నటుడు వినోద్ మెహ్రా కుమారుడు. వినోద్ మెహ్రా మూడవ భార్య కిరణ్ కు రోహన్ జన్మించారు. తండ్రి స్టార్ నటుడైనప్పటికీ, రోహన్ పెరిగింది అంతా కెన్యాలో కావడం విశేషం. ఆ తర్వాత యూకేలో ఉన్నత చదువులు పూర్తి చేసిన రోహన్, సినిమాపై మక్కువతో భారత్ కు తిరిగి వచ్చారు. కేవలం నటుడిగానే కాకుండా, ప్రముఖ దర్శకుడు సంజయ్ లీలా భన్సాలీ వద్ద అసిస్టెంట్ డైరెక్టర్ గా పని చేసి సినిమా మెళకువలను నేర్చుకున్నారు.

రోహన్ మెహ్రా 2018లో వచ్చిన 'బజార్' సినిమాతో వెండితెరకు పరిచయమయ్యారు. సైఫ్ అలీ ఖాన్(Saif Ali Khan) ప్రధాన పాత్రలో నటించిన ఈ చిత్రంలో రోహన్ తన నటనతో విమర్శకుల ప్రశంసలు అందుకున్నారు. ఆ ఏడాది ఫిలింఫేర్ 'బెస్ట్ డెబ్యూ యాక్టర్' అవార్డును కూడా కైవసం చేసుకున్నారు. ఆ తర్వాత '420 IPC' వంటి లీగల్ డ్రామాతో ఓటీటీలో సత్తా చాటారు. ఇటీవలే 'కాలా' అనే వెబ్ సిరీస్ లోనూ కనిపించి నటుడిగా తనకంటూ ఒక గుర్తింపు తెచ్చుకున్నారు. ఇక పూజా హెగ్డే చేతిలో దళపతి విజయ్ తో చేస్తున్న 'జన నాయగన్' వంటి భారీ ప్రాజెక్టులు ఉన్నప్పటికీ, అందరి దృష్టి మాత్రం రోహన్ తో ఆమె సాగిస్తున్న ఈ లవ్ ట్రాక్ పైనే ఉంది. మరి ఈ జంట తమ రిలేషన్ షిప్ ను ఎప్పుడు అధికారికంగా ప్రకటిస్తుందో చూడాలి.