రాజకీయాల్లో నాయకుడిగా రాణించాలంటే ప్రజాసమస్యలపై గళం విప్పాలి, నిరంతరం ప్రజల్లో ఉండాలి. కానీ, ఓ ప్రాంతీయ పార్టీలో మాత్రం లీడర్ల అర్హతలకు కొత్త నిర్వచనం పుట్టుకొచ్చింది. పార్టీలో భవిష్యత్తు ఉండాలన్నా, రాబోయే ఎన్నికల్లో టికెట్ దక్కించుకోవాలన్నా ముందుగా పోలీస్ స్టేషన్ మెట్లు ఎక్కడం, జైలు పాలవ్వడం మస్ట్ అనే సరికొత్త చర్చ ఇప్పుడు రాజకీయ వర్గాల్లో హాట్ టాపిక్‌గా మారింది. కేవలం పార్టీ కార్యాలయాల్లో కూర్చుని ప్రెస్‌మీట్లు పెడితే సరిపోదని, ప్రభుత్వంతో నేరుగా అమీతుమీ తేల్చుకుంటూ అరెస్టుల వరకు వెళ్లినవారికే వైసీపీ(YCP) హైకమాండ్ గ్రీన్ సిగ్నల్ ఇస్తోందనే ప్రచారం జోరుగా సాగుతోంది.

గత కొంతకాలంగా మారుతున్న రాజకీయ సమీకరణాలను గమనిస్తే ఈ కొత్త ట్రెండ్ స్పష్టంగా అర్థమవుతుంది. ప్రభుత్వ విధానాలను ప్రశ్నిస్తూ రోడ్డెక్కిన నేతలపై కేసులు నమోదవుతుండగా, ఆ పరిణామాలనే కొందరు నేతలు తమ పొలిటికల్ కెరీర్‌కు మైలురాళ్లుగా మలుచుకుంటున్నారు. ఎప్పుడైతే ఒక నాయకుడు అరెస్టు అయి జైలుకు వెళ్తాడో, ఆ వెంటనే పార్టీ అధినాయకత్వం నుంచి అతనికి ఊహించని రేంజ్‌లో మైలేజ్ దక్కుతోంది. అధినేత జ‌గ‌న్‌(Jagan) స్వయంగా రంగంలోకి దిగి మద్దతు ప్రకటించడం, సోషల్ మీడియాలో భారీ క్యాంపైన్ నిర్వహించడం, జైలు ముగింపు పరామర్శలు చేయడం వంటి పరిణామాలు మిగతా నాయకులలో సరికొత్త ఆలోచనలను రేకెత్తిస్తున్నాయి.

అరెస్టు అయితేనే అసలుసిసలు లీడర్ అనే అభిప్రాయం పార్టీ శ్రేణుల్లో బలపడుతుండటంతో, లీడర్లు సైతం దూకుడు పెంచేందుకు తెగిస్తున్నారు. వ్యాపారాలు దెబ్బతింటాయనో, అనవసరమైన కేసులు ఎందుకనో వెనకడుగు వేస్తున్న సీనియర్లకు ఇది ఒక రకమైన హెచ్చరికగా మారుతోంది. కష్టకాలంలో పార్టీ కోసం రిస్క్ చేసేవారికే భవిష్యత్తులో పట్టం కడతామని హైకమాండ్ పంపిస్తున్న సిగ్నల్స్ స్పష్టంగా కనిపిస్తున్నాయి. శ్రీకాకుళం(Srikakulam) నుంచి రాయలసీమ వరకు జిల్లాల్లో జరుగుతున్న పరిణామాలు ఇదే నిజమని నిరూపిస్తున్నాయి. ఏది ఏమైనా, టికెట్ రేసులో నిలవాలంటే ముందుగా జైలు గోడలు చూడాలనే ఈ వింత రూల్ ఇప్పుడు వైసీపీ కేడర్‌లో గుబులు రేపుతూనే, దూకుడుగా ఉండే వారికి కొత్త జోష్ ఇస్తోంది.