ప్రజాస్వామ్య వ్యవస్థలో చట్టసభలు కేవలం చర్చా వేదికలు మాత్రమే కావు, ప్రజల గళాన్ని అధికార పక్షం ముందు వినిపించే అత్యున్నత ప్రజాస్వామ్య దేవాలయాలు. అయితే కాలం మారుతున్న కొద్దీ రాజకీయ వ్యూహాలు మారుతున్నాయి. సమస్యలపై సభలోనే పోరాడాల్సిన నాయకులు, నేడు సభలను బహిష్కరించే సంస్కృతి వైపు మొగ్గుచూపుతున్నారు. ఈ క్రమంలోనే ఆంధ్రప్రదేశ్(Andhra Pradesh) రాజకీయాల్లో ప్రధాన ప్రతిపక్షంగా ఉండాల్సిన వైఎస్ఆర్ కాంగ్రెస్ పార్టీ అనుసరిస్తున్న వైఖరి ప్రస్తుతం రాష్ట్ర రాజకీయాల్లో తీవ్ర చర్చనీయాంశంగా మారింది.

గత ఎన్నికల ఫలితాల అనంతరం అసెంబ్లీ(Assembly) సమావేశాలు ప్రారంభమై సుదీర్ఘకాలం గడుస్తున్నా, ఆ పార్టీ సభ్యులు సభ వైపు కన్నెత్తి చూడకపోవడం గమనార్హం. తమకు శాసనసభలో తగిన సంఖ్యాబలం లేకపోయినా, ప్రతిపక్ష హోదా దక్కాలని ఆ పార్టీ ఆశిస్తోంది. అయితే నిబంధనలు ఇందుకు అంగీకరించవని స్పీకర్ కార్యాలయం స్పష్టం చేయడంతో, వైసీపీ శాసనసభకు పూర్తిగా దూరంగా ఉంటోంది. ఎలాంటి అనివార్య పరిస్థితుల్లోనైనా ప్రజా సమస్యలను అసెంబ్లీ వేదికగా ఎండగట్టాల్సింది పోయి, ఇలా సమావేశాలను ఏళ్ల తరబడి బాయ్‌కాట్ చేయడం దేశ రాజకీయ చరిత్రలోనే ఒక వింతైన రికార్డుగా మారుతోందని రాజకీయ పరిశీలకులు భావిస్తున్నారు.

చట్టసభల బహిష్కరణల చరిత్రను పరిశీలిస్తే, గతంలోనూ వివిధ సందర్భాల్లో పలు పార్టీలు, నేతలు నిరసన గళాలు వినిపించారు. నాటి రోజుల్లో ఎన్టీఆర్ ప్రతిపక్షంలో ఉన్నప్పటికీ, ఆయన పార్టీ నేతలు సభకు హాజరై ప్రభుత్వాన్ని నిలదీశారు. అలాగే తమిళనాడులో నాటి ప్రతిపక్ష నేత జయలలిత సభలో జరిగిన తీవ్ర పరిణామాల నేపథ్యంలో ప్రతిజ్ఞ చేసి బయటకు వచ్చి, తిరిగి ప్రజల తీర్పుతో ముఖ్యమంత్రిగా సభలో అడుగుపెట్టారు. ఇక ఏపీలోనూ గతంలో చంద్రబాబు నాయుడు లాంటి నేతలు సభలో జరిగిన అవమానాల కారణంగా నిరసన తెలిపి బయటకు వచ్చిన సందర్భాలున్నాయి. కానీ, ఏకపక్షంగా సుదీర్ఘకాలం పాటు సభను పూర్తిగా బహిష్కరించి ప్రజాస్వామ్య విధులకు దూరంగా ఉండటం మాత్రం ప్రస్తుత వైసీపీ(YCP) ట్రెండ్‌కే ప్రత్యేకమని ప్రత్యర్థులు విమర్శిస్తున్నారు.

కాగా, ప్రజాస్వామ్యంలో అధికార పక్షం తప్పులను సరిదిద్దాలన్నా, ప్రజల సమస్యలపై ప్రభుత్వంతో పోరాడాలన్నా చట్టసభలే సరైన వేదిక. అలా కాకుండా సభకు దూరంగా ఉండటం వల్ల ప్రజల గళం శాసనసభలో మూగబోయే ప్రమాదం ఉంది. ఏది ఏమైనప్పటికీ, సభకు డుమ్మా కొట్టే ఈ కొత్త రాజకీయ సంస్కృతి ప్రజాస్వామ్య స్ఫూర్తిని ఎంతవరకు కాపాడుతుందనేది కాలమే నిర్ణయించాలి.